banner 728x90

TL kondena Junta Militár Myanmar kona-ba espulsaun diplomata

banner 120x600
27 Views

G-NEWS (DILI) – Sábadu (26082023) foin lalais ne’e, Governu Timor Leste hasai komunikadu imprensa ida, hodi kondena JUnta Militár Myanmar ne’ebé halo espulsaun ba diplomata timoroan, tanba la simu ho pozisaun hosi Timor nian ne’ebé foin lalais ne’e autoridade timoroan sira halo kona-ba Timor nia pozisaun Myanmar.

Tuir komunikadu Imprensa Governu da-sia ne’ebé lídera hosi Primeiru Ministru Kay Rala Xanana Gusmão kondena espulsaun ba diplomata timoroan no reafirma ninia solidariedade ho povu Myanmar.

banner 325x300

“Timor-Leste iha liña ho pozisaun ne’ebé asume husi ASEAN no Nasoins Unidas, reafirma importánsia hodi apoia esforsu hotu-hotu atu filafali ba orden demokrátika iha Myanmar no hato’o ninia solidariedade ho povu Myanmar, iha tempu hanesan insiste/husu ba Junta Militár hodi respeita direitus umanus no buka solusaun ida ne’ebé pasifika no konstrutiva ba krize ne’e”, haktuir iha komunikadu imprensa Governu nian.

Situasaun iha Myanmar sai ona preokupasaun globál hosi kedas golpe militár iha fulan-fevereiru tinan 2021. Junta Militár ne’e asume podér, hodi anula rezultadu hosi eleisoins demokrátikas no hamosu krize umanitária, ekonómika no polítika lubuk ida.

Komunidade Internasionál, inklui Timor-Leste, kontinua apela hodi rezolve krize ne’e ho dalan ida ne’ebé pasifika no respeitu ba direitu fundamentál sira povu Myanmar nian.

Portavós Governu Konstitusionál IX nian, Ministru Agio Pereira, hateten katak “Repúblika Demokrátika Timor-Leste nafatin firme ho ninia konviksaun katak liuhusi diálogu de’it no respeitu ba vontade povu nian maka bele alkansa solusaun ida ne’ebé pasifika no dura iha krize Myanmar”. No na’i-ulun ne’e mós, reafirma “ha’u apela ba komunidade internasionál atu hamutuk iha esforsu sira hodi promove restaurasaun orden demokrátika no direitus umanus iha rejiaun ne’e”

Antes ne’e, Junta Militar Myanmar hatun ordem atu expulsa enkarregadu negósiu Timor-Leste nian tanba la simu ho pozisaun hosi Timor nian ne’ebé foin lalais ne’e autoridade timoroan sira halo iha nasaun ne’e.

“Ministériu Negósiu Estranjeirus lori Governo República União Myanmar nia naran husu ba encarregado de negósiu embaixada RDTL nian Señor Avelino Fernandes Ximenes Pereira, atu husik Myanmar tarde liu to’o loron 01 fulan setembru”, hatete iha nota diplomasia hosi Myanmar ne’ebe Lusa hetan asesu

Hatan ba ne’e Prezidenti RDTL José Ramos Horta, konsidera katak Timor-Leste tenke sente orgullu tanba expulsaun ne’e hanesan resposta ida hosi defesa ba direitus humanus.

“Iha situasaun ne’e ita sente orgullu tebes. Ba aktus ne’ebé koerente ba denúnsia golpe militár no denúnsia ba krime grave kontra umanidade, nune’e, expulsu refere sai hanesan motivu ida hodi ita orgullu”.

Xefe Esatdu afirma katak Timor-Leste kontinua apoia pozisaun ASEAN ba esforsu no organizasaun hodi rezolve situasaun iha Myanmar.

“Timor-Leste la iha pozisaun ne’ebé la hanesan ho ASEAN hodi kondena golpe militár, massakre no populasaun sívil, feto no labarik. No Militár sira mak responsável ba krime umanidade iha Myanmar no Putin mak responsável ba krime kontra umanidade iha Ukrânia”, nia hateten.

Jornalista       : Ekipa G-News

Editór Testu : Amito Qonusere Araújo

relavante