banner 728x90

Ahi mate lakan, estraga ona sasan elektrónika komunidade

banner 120x600
19 Views

G-NEWS (DILI) – Populasaun iha área Manleuana, Dili, preokupa ho linha eletrisidade ne’ebé sempre mate lakan iha, estraga ekipamentus elektrónika.

“Durante ne’e ahi mate lakan, ida ne’e fó impaktu ba ami nia sasan sira, liu-liu jeleira, Rice Cooker, no sasan seluk tan ne’ebé iha ligasaun ho listrik nian”, tenik Muzinho Lopes.

banner 325x300

Nia fundamenta, situasaun hirak ne’e mós halo labarik estudante sira labele estuda diak, tanba nu’udar sidadaun kumpri selu taxa ba Estado, Pulsa Listrik, monta pre-pagu ho legal, maibé sempre vítima ba linha elektrika.

Komunidade António Cardoso, hosi Suku Comoro, Kinta-Feira (09032023) informa ba G-News iha Rotunda Nicolau Lobato katak, Governu presiza fó atensaun sériu ba jestór EDTL, tanba ho sira nia planu ne’ebé la diak, implika ahi mate lakan, ikus mai estraga ekipamentus elektrónika sira.

Vítima seluk fali, Martinha Soares, iha Merkadu Comoro, informa ba G-News (Kinta-Feira, 09032023) katak, Nia família vítima ona ba aktus EDTL nian, kona-ba ahi ne’ebé mate lakan, tanba konsege estraga ninia ekipamentus hanesan Televizaun no Rice Cooker.

“Ha’u vítima ona. Ha’u nia sasan at ona, hanesan Televizaun, Rice cooker. Ami preokupa ahi mate lakan ne’e, ida ne’e tanba sá mak akontese nune’e?. Ami povu kiik mak sempre vítima. Ami nia sasan at ne’e se mak mai troka?, Ami mak fila-liman, mak sosa”, Martinha koalia ho lian makaas.

Populasaun sira husu ba Governu atu tau atensaun sériu ba lideransa EDTL, nune’e bele hadia sistema sira ne’ebé la diak, ne’ebé implika ba linha elektrika durante ne’e.

Tuir observasaun G-News, semana ikus-ikus ne’e, ahi EDTL iha kapítal Dili sempre mate lakan, iha ne’ebé situasaun hirak ne’e, estraga sasan komunidade sira nian.

To’o informasaun ne’e fó sai, G-News seidauk hetan konfirmasaun hosi Prezidente EDTL tanba okupadu ho servisu seluk.

Jornalista      : Ekipa G-News
Editór Testu   : Amito Qonusere Araújo

relavante