banner 728x90

Bainhira mak akonteese eleisaun lejislativa 2023

banner 120x600

G-NEWS (DILI) – Artigu ida ne’e, G-News kopia hosi Pájina Ofisiál Francisco Guterres Lú Olo nian, tanba G-News konsidera Artigu ida ne’e importante, no konsidera hanesan Eis Prezidente da Repúblika, nune’e importante ba G-News atu transmite informasaun hirak ne’e ba públiku.

Tuir artigu 93°, pontu 4, Konstituisaun RDTL nian, deputadus Parlamentu Nasional sira-nia mandatu dura tinan lima. Mandatu tinan lima deputadus V Lejislatura ba períodu 2018-2023 hahú iha inísiu lejislatura ho primeira reuniaun plenária hala’o iha 13 juñu 2018. Nune’e, eleisaun lejislativa sei akontese iha tinan 2023.

banner 325x300

Maibé bainhira loos mak sei akontese eleisaun lejislativa 2023? Tuir artigu 86, c), Prezidente Repúblika mak iha kompeténsia atu marka data eleisoins ba Parlamentu Nasional, hanesan akontese mós ho eleisaun Prezidente Repúblika, tinan lima-lima.
Maibe, ba eleisaun lejislativa 2023, liuhusi audiénsia ho Sua Exelénsia Prezidente Repúblika, iha 6 fevereiru 2023, partidu FRETILIN husu ba Prezidente Repúblika atu konsidera artigu 99, pontu 5 Konstituisaun RDTL, ne’ebé refere ba mandatu deputadus Parlamentu Nasional lejislatura atuál.

Pontu 5 artigu 99° K-RDTL hatete :
“Wainhira hetan disolusaun karik, Parlamentu Nasional ne’ebé foin hili hahú lejislatura foun, ho dada tan nia durasaun ba tempu ne’ebé presiza atu kompleta períodu ida- ne’ebé korresponde ba sesaun lejislativa ne’ebé hala’o dadaun to’o loron eleisaun nian”.

Iha ita nia istória ukun an, eleisaun antesipada akontese dala ida de’it. Akontese iha 12 maiu 2018, hafoin Prezidente Repúblika haree katak la iha ona dalan seluk atu hakotu krize institusionál grave iha tempu ne’ebá. Maibé, molok foti desizaun disolve Parlamentu Nasional, Prezidente Repúblika konsulta uluk partidus polítikus ho asentu iha Parlamentu Nasional no Konsellu Estadu.

Haree ba artigu 100°, pontu 2 K-RDTL nian, “disolusaun Parlamentu Nasionál la hamate mandatu deputadus sira-nian to’o Parlamentu Nasionál nia reuniaun dala uluk, liu tiha eleisaun subsekuente sira.

Entretantu, partidu polítiku no jurista balun defende katak siklu eleitorál tinan lima ne’ebé eleisaun tenke halo iha fulan maiu 2023.
Loos duni katak ita nia lei eleitoral la define loloos períodu ne’ebé ita tenke halo eleisaun lejislativa atu Prezidente Repúblika bele hili data ida hodi Povu ezerse ninia soberania tuir Konstituisaun haruka. Maibé ida ne’e labele impede fali Prezidente Repúblika dekreta kalendáriu eleitoral bazeia ba art.99 K-RDTL, hafoin rona tiha governu no partidus polítikus ho asentu iha Parlamentu Nasional.

Biar uluk ita lafó atensaun didiak ba durasaun ljislatura, importante hanoin hamutuk atu oinsá hadi’ak ba oin atu kada mandatu deputadus kontempla regras hatuur iha ita nia lei inan. Katak kada lejislatura ho durasaun tinan 5 korresponde mós ho sessaun legislativa ba kada tinan ne’ebé hahú sura husi 15 Setembru no ramata iha 14 de Set tinan tuir kedas.

Sura husi períodu lejislativu ne’e, ita bele konklui ona ho lia loos katak lejislatura atuál, ho tinan 5, sei iha mandatu fulan tolu tan no sei ramata mandatu bainhira akontese plenária dahuluk ho mandatu foun.

Art.99 n.5 K-RDTL estabelese regra hatutan tan tempu atu kompleta durasaun legislatura tinan 5. Ne’e normal tanba lei inan prevé kedas posibilidade akontese disolusaun Parlamentu Nasional no iha eleisaun antesipada. Tanba ne’e, importante ba Prezidente Repúblika konsidera kontájem tempu tuir n°5 art.99 Konstituisaun RDTL haruka, biar la iha lei oan define períodu espesífiku ba eleisaun lejislativa normal no ba bainhira akontese eleisaun antesipada.

Jurista balun argumenta katak Regimentu Parlamentu Nasional laiha forsa lei nian maibé ne’e laloos. Rejimentu Parlamentu Nasional ne’e iha forsa lei nian tanba tama iha lista kompeténsias Parlamentu Nasional define iha artigu 95, pontu 4 c) Konstituisaun RDTL ho lia fuan tuir mai: Kompete ba Parlamentu Nasional elabora no aprova ninia Rejimentu.Nune’e, Rejimentu refere la’ós elemento extra- konstitucionál, maibé intra- konstitusionál, katak halo parte Konstituisaun RDTL biar la’ós lei ida ho sentidu formál hanesan lei sira seluk ne’ebé aprova husi Parlamentu Nasional no promulga husi Prezidente Repúblika.

Rejimentu Parlamentu Nasional mós hetan publikasaun iha Jornal Repúblika no, tanba ne’e, nia mós iha forsa lei nian no la iha ema ida bele hakaat liu.

Bainhira mosu litíjiu ruma iha Parlamentu Nasional hodi halo contencioso judicial, tribunál sira julga mós liu husi Rejimentu ne’e nu’udar parâmetru hodi hakotu litígiu ne’e iha tribunal. Ida ne’e acontese dala barak ona iha Tribunal ba ita nia Parlamentu Nasional.

Saída loos mak Rejimentu Parlamentu Nasional prevé kona-ba asuntu ne’e?
Rejimentu ne’e prevé durasaun lejislatura tinan 5 no sessaun lejislativa ho durasaun tinan ida ida, no primeira sesaun lejislativa hahú husi 15 de Setembru no hotu iha 14 de Setembru iha tinan foun tuir kedas (subsequente).

Legislatura tinan 5-5 ne’e atu fó hanoin polítiku katak governu ida tun, ida sae, maibé Parlamentu Nasional kontinua ninia mandatu exeptu bainhira iha krize institusionál grave no Prezidente Repúblika la konsege hetan solusaun polítika seluk atu hakotu krize ne’e no tenke dekreta duni disolusaun ba órgaun lejislativu ne’e hanesan akontese iha tinan 2018.

Ikusliu, ha’u hakarak mós fó-hanoin ba maluk sira hotu katak reprezentantes Povu ne’ebé ohinloron tuur iha Parlamentu Nasional mai husi rezultadu eleisaun 12 maiu 2018. Kada deputadu hetan konfiansa ba mandatu tinan lima husi eleitór ida-idak ne’ebé vota ba partidu polítiku ida ne’ebé manán asentus iha Parlamentu Nasional tuir sistema Hondth. Ne’ebé rezultadu eleitorál reflekte vontade maioria Povu nian no nune’e, órgaun lejislativu ne’e merese respeitu husi ema hotu. Parlamentu Nasionál tenke funsiona nafatin tuir Konstituisaun RDTL haruka atu bele afirma-an nu’udar Estadu Direitu Demokrátiku.

Nu’udar timoroan, ha’u apela ba maluk sira hotu, liuliu ba líder nasionál sira atu tuur hamutuk no haree ba oin ho vontade koletiva atu hametin babeibeik ita-nia prosesu konstrusaun Estadu-Nasaun, pás no establidade governativa no lori ba oin dezenvovimentu ekilibradu no sustentável ho justisa sosial no, nune’e, benefisia Povu tomak.

Francisco Guterres Lú Olo
Jurista timoroan

banner 325x300

relavante