banner 728x90

CAC halo buska no aprensaun ba Ministru MAPKOMS iha fatin-3

Ministru MAPKOMS Francisco Martins da Costa Pereira Jerónimo. Foto: Social Mídia
banner 120x600

G-NEWS (DILI) – Comissão Anti Corrupção (CAC) liuhosi ekipa Medida Prevensaun no Kombate Korrupsaun, Segunda-Feira (17102022), halo tan buska no aprensaun ba dokumentu iha gabinete Ministériu Assuntu Parlamentár no Komunikasaun Sosiál (MAPKOMS) hodi haklean investigasaun ba kazu instalasaun Set-top Box RTTL, E.P.

Bainhira too iha Palasiu Governu, ekipa CAC nian direitamente sae ba iha gabinete MAPKOMS hodi halo esplikasaun kona-ba razaun sira nia prezensa.

banner 325x300

Tuir ajenda ne’ebé ekipa media Primeiru-Ministru Taur Matan Ruak fahe, iha loron Segunda-Feira 17 de Outubru, oras 09:00 OTL, Ministru MAPKOMS Francisco Martins da Costa Pereira Jerónimo iha enkontru regular ho Xefe Governu, maibé Ministru MAPKOMS rasik labele atende, tamba iha tuku 8 liu deit minutu balun, ekipa ida husi CAC akompaña ho Polísia Servisu Investigasaun Kriminal, iha ona Palasiu Governu hodi halo aprensaun no buska tuir mandadu Tribunál.

Investigador CAC ne’ebé lidera buska no aprensaun ne’e, hala’o tiha esplikasaun ba Ministru MAPKOMS, atual Prezidente Federasaun Futebol Timor LEste (FFTL) kona-ba sira nia prezensa iha Gabinete Ministru nian, kontinua halo servisu hodi rekolla evidensia sira liu-liu ba dokumentu sira ne’ebé iha relasaun ho instalasaun Set-top Box RTTL, E.P.

Ekipa konjunta CAC ne’ebé akompana husi Polísia Servisu Investigasaun Kriminal Nasionál halo mós identifikasaun ba MAPKOMS, hodi halo aprensaun ba dokumentu box rua inklui komputador ida ho marka Imac (Apple).

Ministru MAPKOMS Francisco Martins da Costa Pereira Jerónimo Foto: Sosial Mídia Facebook ofisial Ministério dos Assuntos Parlamentares e Comunicação Social

Bainhira prosesu identifikasaun ba governante ne’e lao hela, CAC no Polísia Servisu Investigasaun Kriminal Nasionál husu ba eskoltu ka guarda seguransa pessoal sira, atu retira husi gabinete ka husik fatin servisu Ministru nian, nune’e investigador sira bele halo servisu ho diak. Rona tiha instrusaun husi CAC no Polísia Servisu Investigasaun Kriminal Nasionál, parte seguransa mós retira husi Gabinete hodi hein deit iha liur to’o prosesu identifikasaun ne’ebé lao kuaze oras tolu ne’e remata.

Hafoin remata iha Gabinete MAPKOMS, iha oras tuku 11:30 Otl, CAC lori mos Ministru refere ba iha nia servisu fatin Federasaun Futebol Timor Leste (FFTL) hodi halo mós aprensaun ba dokumentu importante balun no remata husi FFTL ekipa CAC hamutuk kontinua ho MAPKOMS ba nia rezidénsia iha Munisípu Liquiça hodi kontinua halo aprensaun ba dokumentu sira ne’ebé iha relasaun ho kazu instalasaun Set-Top Box RTTL, E.P.

Tuir observasaun, iha Palasiu Governu hare katak, funsionáriu sira iha Palasiu Governu sai hotu mai akompaña prosesu buska no aprensaun ne’ebé CAC halo ba membru governu ne’e.

Relasiona ho kazu detensaun ba Ministeriu MAPCOMS ne’e, Jornalista G-News tenta konfirma ho Komisáriu KAK Sergio Hornai iha nia servisu fatin Fárol Dili, maibé nia labele halo komentáriu tanba informasaun seidauk kompletu.

“Ha’u seidauk bele halo informasaun tanba ekipa iha terenu seidauk fila mai Edifisiu KAK nian, tamba ne’e orsida ha’u fó informasaun mós kotu-kotu (la kompletu) sé bele orsida lokraik hanesan ne’e, ekipa iha terenu fila mai mak bele fo informasaun”. Nia hakotu.

Jornalista  : Ekipa G-NEWS

Editór        : Amito Qonusere Araújo

 

banner 325x300

relavante