banner 728x90

DALAN BA ELEIÇÃO: OINSA ITA BELE HARE HETAN POLÍTICA MELHOR IHA TEMPO CAMPANHA? Tuir Roman Encíclica Fratelli Tutti

Hakerek na'in
banner 120x600

 Artigu ne’e responsável tomak hakerek na’in : José Felix Camilo

INTRODUÇÃO

banner 325x300

Ohin loron, ema hotu-hotu iha Timor inclui Timor oan sira nebé namkari iha ema nia rain, husi ki’ik to’o bo’ot, feto ho mane, katuas ho ferik, hatene mos-mos candidato ba PR período 2022-2027. Basá, oras ne’e daudaun candidato 16 nebé CNE publica officialmente, hala’o hela sira nia campanha haleu Timor, hodi halo promoção no divulgaçao ba sira nia programa no política atu bele convence sira nia militantes, apoiantes no simpatizantes atu bele vota ba sira iha eleição. Entre candidato 16 ne’e nebé concorre, Timor precisa ida de’it mak atu ba tur iha Aitarak laran, tan ne’e sira tenke esforço makas atu bele compete iha eleição, balun esforço makas atu bele manan iha primeira ronde, maibé balun mos iha esperança atu tama ba segunda ronde.

Balun candidato husi partido ka tau tara partido nian, balun fali avança ho fiar-an la husu benção, nem tane liman ba partido ka liderança se de’it. Candidato sira ne’e hotu, prenche ona requesitos nebé hatur iha Constituição RDTL artigo 75, no sira ida-idak mai ho nia caracter, capacidade no habilidade nebé diferente. Ba povo Timor, eleição ne’e la’os ona buat foun tamba hasoru dala barak ona no hanorin ona buat barak, nune’e mos campanha política partido sira nian, la’os ona buat foun, tamba rona dala barak ona lider partido sira nia lian, iha palco político no hare ho matan no koko ho experiência rasik, buat hotu nebé lider sira halo ona ba rai no povo ida ne’e, tanto experiência midar como experiência moruk. Ba militante sira nebé iha espírito democrático, sempre hakarak atu hein hodi rona nafatin programa no política foun saida husi candidato 16 ne’e. Tamba ne’e, nia sei fo voto tuir experiência nebé nia hasoru durante campanha no nia bele muda nia voto tuir nia lógica rasik, ba programa no política candidato ida nian.

Militante nebé mai ho espírito radicalismo, nia sei la halai sai husi nia partido no nia candidato favorito, mesmo que nia partido ka nia candidatura ne’e, sai ona PR ka ocupa ona cargo ruma, maibé estuda mak barak, la’o mak barak, koalia ulun-ain, halo cómico mak barak, comentario mak barak, halo confusão mak barak, cria impasse mak barak, maibé tamba radicalismo kesi metin nia, então nia taka matan ba nia razão ho nia consciência rasik, hodi cria mos odio no vingança ba partido seluk ho sira nia militante.

Militante nebé neutro, nia la kesi an ba partido A ka B, maibé nia hare de’it rame iha nebé nia tuir, naran katak partido ne’e fo netik buat ruma ba nia iha tempo campanha nia laran, no nia comprometido atu vota ba partido nebé fo ona buat balun ba nia, hodi haluha tiha katak nia fo voto dala ida, maibé nia rasik castigo ema barak durante tinan 5 nia laran, tamba de’it ema nebé nia hili ne’e la fihir didiak. No fim sai PR, maibé ema seluk mak kaer remote ka ema seluk mak volante, hodi la hatur nia an ho nia capacidade tuir procedimentos legais nebé iha, no difuculta mos desenvolvimento ba rai no povo ida ne’e.

Husi campanha política nebé lao mak ita bele hare no tetu didiak candidato se mak mai ho política melhor, se mak lae. Tamba ne’e, labele taka tilun ba programa no política, nebé candidato sira lori mai, hodi hanoin de’it atu buka rame iha campanha, hodi hamosu mos barulho iha quinto canto, maibé tenke participa ho maduro, consciente no responsavel, nune’e ita bele exerce didiak ita nia direito de voto.

Dala barak mos, ita hare candidato sira hala’o sira nia campanha nakonu ho insultos, hodi cria mos odio no vingança entre povo. Afinal, sira haluha tiha katak campanha ne’e mos meios ida atu educa militante sira, hodi la bele hahoris radicalismo iha sira nia fuan laran, hodi hamosu odio no vingança ba malu, maibé hamoris paz no estabilidade iha sira nia fuan laran, atu sai militante nebé maduro hodi tetu no hili candidato ida nebé mak mai ho política melhor.

Tamba ne’e, iha artigo ida ne’e hau hakarak explora hau nia hanoin ruma hodi contribui mos iha dalan ba eleição, atu ita ida-idak bele hala’o didiak ita nia direito de voto hodi hili, ema nebé soi atu ukun rai lulik TIMOR no ita bele hare mos candidato sira ne’e, se mak fuan bot ba rai no povo ida ne’e. Contudo, hau sei elabora artigo ida ne’e baseia ba Papa Francisco nia Encíclica Fratelli Tutti nebé Papa usa hodi bolu atenção ba político sira atu hala’o política melhor, no mos hanesan roman ida hodi leno ita iha tempo campanha nee’e atu hatur didiak candidato sira nia política melhor mak ida nebé? Atu nune’e ita bele decide ho convicção candidaturura nebé merece. Mai ita ba hare hamutuk, saida mak POLÍTICA MELHOR ne’e lerek?

 

POLÍTICA MELHOR

Durante tempo campanha nebé lao no ita assiste dadaun ne’e, halo ita confusão atu identifica candidato ida nebé no partido ida nebé mak mai ho política melhor no ida nebé mak lae, tamba hotu-hotu mai ho programa funan-fuan, isulto quinto canto, conta história ulun ain, sura kolen la hotu rai, temi mak liafuan HAU “HAU mak halo ida ne’e, HAU mak halo ida neba, só HAU mak bele” hodi haketak ema seluk, hodi heuwai ema seluk nia sacrifício. Afinal, política ida nebé los tuir Nicolau Lobato ne’e mak NÓS “NÓS SOMOSum país pequeno e fraco. Entretanto, SABEMOS, e PODEMOS, e DEVEMOS VENCER” (NICOLAU, P. 226). Katak povo hotu-hotu hamutuk mak forma NÓS, no NÓS ne’e mak luta hodi hadau ukun rasik-an, la’os HAU de’it. Tan ne’e, sira mosu iha palco político ho sira nia política falsa sira, mosu iha povo sira nia let hodi halo povo confusão, tan sira mosu ho estima, mosu ho hako’ak, mosu ho han hamutuk, mosu ho tebe dahur, mosu ho hamnasa, mosu ho tik-tok to’o toba tan iha povo nia uma.

Afinal, buat hirak iha leten ne’e, sira usa de’it hanesan sira nia drama política iha tempo campanha atu dada povo sira nia atenção hodi hili sira. Basá, tempo babain ne’e, sira la naran mosu iha povo nia let, la hamutuk ho povo hanesan sira halo iha campanha, hetok ho sira nia careta vidro metan halai liu povo iha dalan la liga, maibé to’o ona tempo campanha hahu tula povo iha dalan, hahu para careta hodi kolia ho povo iha dalan, hahu enxe mina ba povo nia motor ho careta, hahu fahe nasi kotak ba povo iha dalan-dalan, hahu visita fatin-fatin nebé povo sira hela ba, hahu halo an hanesan ema kiak, ema simples no ema nebé besik liu povo; hahu promete tun, promete sae atu hadau de’it povo sira nia laran, tamba sira la’os foin mosu dala ida, maibé mosu bebeik ho promesa falsa nebé hanesan iha tempo campnha.

Basá, liu ona campanha sira la hare hetan povo, tamba óculo metan taka metin sira nia matan, careta vidro metin falun sira nia oin, hodi la conhece ona povo iha dalan, sepatu metan falun sira nia ain hodi la sama ona povo nia uma; gravata ho casaco rebo-rebo hodi falun metin sira nia consciência; AC malirin hadukur sira nia matan hodi sai delek ba povo nia realidade no povo nia sofrimento. Ne’eduni, povo sira tenke matan moris atu hare sinal política melhor nian iha tempo campanha ne’e, basá política melhor ne’e la’os halo hanesan drama iha momento campnaha de’it, maibé tem que halo iha tempo saida de’it no liliu iha tempo nebé povo hamonu matan ben tan hamlaha no hamrok, halerik ba condição no hakilar ho sira nia preocupação.

Tamba ne’e, mak papa Francisco iha Nia encíclica Fratelli Tutti ensiste político sira atu hatur política melhor ne’e iha BEM COMUM “a política colocada ao serviço do verdadeiro bem comum” (Fratelli Tutti, p. 40), Papa fundamenta verdadeiro bem comum ne’e iha liafuan POVO no falun-an metin ho liafuan AMOR no CARIDADE, nebé kesi-an metin liu tan iha conceito CARIDADE POLÍTICA, no AMOR POLÍTICO. Mai no hare saida mak ne’e!

 

CARIDADE POLÍTICA

Agora ita ba hare, tansá Papa hatur liafuan caridade ne’e nudar fundamento iha actividade política ka ação político sira nian? Política em si ne’e, acto de caridade ida, tamba política ne’e mosu atu halo caridade liu husi organização da cidade, tamba ne’e actividade política ne’e tenke hala’o husi dedicação no organização hanesan ação caridade nian ida. Tamba, político sira dedica sira nia capacidade tomak atu organiza povo, nebé hela iha cidade ida nia laran, hodi lori povo sai husi kiak no mukit “um acto de caridade […] com objectivo de organizar e estruturar de modo que o próximo não se venha encontrar na miséria” (Fratelli Tutti, p, 49). Ne’eduni, objectivo husi organização da cidade ne’e atu garante justiça ba ema hotu no lori ema sai husi miséria.

Então, caridade política ne’e iha tamba por natureza ser humano ne’e, ser social ka ser nebé moris la’os ba nia an de’it, maibé moris iha ema seluk nia let ka capaz atu halo relação social ho ema seluk; atu tau matan ba malu ka moris atu tulun malu. Ita hare mos-mos caridade política iha ita nia rain ne’e, só lao iha momento campanha de’it, tan ne’e quando tama ona tempo campanha, lider partido sira mosu mai ho caridade política iha fatin-fatin, tulun familia ida ne’e, ida neba, tau matan ba kiak iha fatin-fatin, hakoak ema kiak, han ho ema kiak. Buat sira ne’e hotu, los no diak tamba sira hatudu caridade, maibé la bele halo de’it iha tempo forte hanesan campanha, maibé tenke halo hanesan Papa Francisco dehan “um acto do ser humano ou um dom da vida” (Fratelli Tutti, p. 51). Tamba ne’e, ba Nai-Ulun sira buat ida tulun ema kiak no ema susar ne’e, la bele mai ho intenção secundária, maibé mai hanesan dom da vida ida.

Entretanto, caridade política nebé Papa Francisco insiste ba político sira mak ida ne’e “insisto que ajudar os pobres com o dinheiro deve sempre ser um remédio provisório para enfrentar emergências. O verdadeiro objectivo deveria ser sempre consentir-lhes uma vida digna através do trabalho” (Fratelli Tutti, p. 42). Nai-Ulun sira la lika hanoin demais atu resolve povo nia problema hotu ho fahe osan ba povo hanesan halo iha campanha; tamba ida ne’e tuir Papa la kura terus no todan nebé povo sira hasoru, maibé oinsa político sira hatudu sira nia boa vontade hodi organiza no cria sistema nebé diak atu povo sira bele serviço rasik hodi hetan osan no bele sustenta moris.

Tan ne’e, osan nebé fahe iha tempo campanha sei mohu iha tempo badak, maibé quando incentiva povo sira ho sistema produção nebé diak, formação nebé diak,maka povo sira mos bele contribui ho sira nia capacidade no sira nia esforço tomak hodi colabora atu halakon kiak no mukit. Contudo, ba Papa Francisco liu husi condição de trabalho maka bele halo povo sira moris digno, la’os liu husi osan ho sasan nebé fahe iha tempo campanha. Tamba ne’e, diak liu iha imi nia campanha ne’e kolia konba oinsa atu muda povo nia moris husi kiak liu husi trabalho, tamba Papa dehan “não há pobreza pior do que aquele que priva do trabalho e da dignidade do trabalho” (Fratelli Tutti, p. 42). Portanto, trabalho ne’e mak dimenção essêncial iha vida social atu desenvolve sociedade ida nia moris, atu ema hotu moris ho digno.

            Tuir Papa Francisco caridade política ne’e maka dalan diak liu atu supera mentalidade individualista, tamba conduz político sira ba hadomi bem comum ka diak ema hotu nian “esta caridade política supõe ter maturado um sentido social que supera toda a mentalidade individualista: a caridade social leva-nos a amar o bem comum e a buscar efectivamente o bem de todas as pessoas” (Fratelli Tutti, p. 48). Caridade política ne’e, halo político sira kolu-an husi sira nia individualista, interesse grupo, partido no familia, hodi la tau grupo ida diak liu ka merece liu, maibé tau matan ba ema hotu-hotu nia diak no hare ema hotu-hotu hanesan.

Papa observa liu tan katak ohin loron ne’e, políticos balun fo conceito sala ba política no implica mos iha prática. Tamba ne’e, ita hare mos-mos iha candidatura sira nia campanha política nakonu ho bosok, nakonu ho lia bobar, corrupção no insultus sira “actualmente muitos possuem uma má noção da política, e não se pode ignorar que frequentemente, por trás deste facto, estão os erros, a corrupção e a ineficiência de alguns políticos” (Fratelli Tutti, p. 46). Caridade política ne’e, funciona atu ajuda ema sira nebé precisa político sira nia tulun; atu halibur ema hotu hanesan maun-alin no hatur justiça ba ema hotu “um individuo pode ajudar uma pessoa necessitada, mas, quando se une a outros para gerar processos sociais de fraternidade e justiça para todos entra no campo da cridade mais ampla a caridade política” (Fratelli Tutti, p. 47).

Iha carta pastoral Bispo sira nian, nebé foin sai iha dia 6 de Março liu ba mos, foti teólogo sira nia lifuan dehan político sira tenke hare política ne’e hanesan sacramento ida, tamba sacramento nebé Padre sira hala’o ne’e nia finalidade atu lori salvação ba sarani sira nia klamar, nune’e mos político sira halo política atu lori salvação ba povo sira nebé terus, tan hahan la iha, uma la iha, estrada la diak. Oinsá, político sira cria condição nebé diak atu povo sira bele bok an rasik, tamba condição quando diak ajuda povo sira atu bele hadia sira nia moris rasik.

Neduni, objectivo husi caridade política nebé Papa hatur ne’e maka “[…] organizar e estruturar a sociedade de modo que o próximo não se venha a encontrar na miséria […] para modificar as condições sociais que provocam o seu sofrimento. Alguém ajuda um idoso a atravessar um rio […], mas o político constrói-lhe uma ponte. […] se alguém ajuda outra pessoa fornecendo-lhe comida, mas o político cria-lhe um emprego, exercendo uma forma sublime de caridade que enobrece a sua acção política”, (Fratelli Tutti, p. 49). Político sira nia knar nebé folin liu maka cria condição diak no emprego justo ba povo sira, basá ida ne’e mak ação política ida nebé as liu no folin tebes iha povo sira nia matan no bele lori povo sira sai husi sofrimento.

Tamba ne’e, papa convida político sira atu hare política ne’e hanesan vocação ida, la’os oportunidade atu hariku an, maibé atu halo caridade hodi tane as bem comum “convido uma ves mais a revalorizer a política que é uma sublime vocação, é uma das formas mais preciosas de caridade, porque busca o BEM COMUM” (Fratelli Tutti, p. 48).

 

AMOR POLÍTICO

Ba Papa Francisco amor político ne’e tenke hatur iha caridade atu buka condição hodi lori ema kiak no mukit sira sai husi sira nia sofrimento, no caridade ne’e lori político sira atu hare ema hotu hanesan no bele iha compaixão ho povo sira nia sofrimento, no ida as liu maka reconhece ema kiak no mukit sira nia dignidade, respeito ema seluk nia cultura, no respeita ema hotu nebé hela iha sociedade ida nia laran. Sira ne’e hotu mak Papa hanaran “núcleo do autêntico espírito da política” (Fratelli Tutti, p. 49). Ne’eduni, candidato sira nebé mosu mai la ho espírito sira iha leten ne’e, naran seluk nebé Papa bolu mak “pragmatismo sem alma” (Fratelli Tutti, p. 49).

Tamba ne’e, Papa afirma liu tan katak “os políticos são chamados a cuidar da fragilidade, da fragilidade dos povos e das pessoas […] quer dizer força e ternura, luta e fecundidade, no meio dum modelo funcionalista e idividualista que conduz inexoravelmente a cultura descartes […] significa assumir o presente na sua situação mais marginal e angustiante e ser capaz de ungi-lo de dignidade”, (Fratelli Tutti, p. 50). Político sira nia serviço maka oinsa cuidado povo sira nebé kbi’it laek, no condição hotu nebé sira hasoru no tane as dignidade ema nian. Neduni, ba Papa político ne’e tenke operoso, constructor com grandes objectivos, com olhar amplo, realista e pragmático (Cfr., Fratelli Tutti, p. 50).

Papa encoraja mos político sira atu “sabe escutar o ponto de vista do outro”, la’os buat hotu iha nia de’it no halo nia an sai fali hanesan heroi bot, nebé ema hotu tenke hakru’uk ba nia hahalok imoral sira ne’e, hodi tau nia an as liu Constituição no lei sira; “facilitando um espaço a todos” loke dalan ba ema hotu, la’os taka dalan ba ema seluk, hodi loke de’it dalan ba nia partido, nia familia no nia grupo; “abertura a todos”, nakloke ba ema hotu, loke oportunidade ba ema hotu, la’os oportunidade ne’e iha de’it uma laran, no bikan laran. Tamba ne’e, mak papa dehan tan “o bom político dá o primeiro passo para que se ouçam as diferentes vozes” (Fratelli Tutti, p. 51). Político sira la bele hanoin atu hases an ka taka an ba povo nia lian no povo nia sofrimento, maibé nakloke atu rona ema seluk nia lian, liu-liu lian povo sira nian.

Sobretudo, papa Francisco hatur actividade política ne’e iha “amar com ternura” nebé hatur an metin liu iha amar o próximo ho amor concreto “É um movimento que brota do curação e chega aos olhos, aos ouvidos e as mãos” (Fratelli Tutti, p. 51). Katak político sira quando hare povo nia terus no susar fuan tenke bok an, hodi loke matan atu hare, loke tilun hodi rona, no lolo liman hodi fo tulun. Basá, amor com ternura ne’e, quando buras iha político ida nia nia fuan laran, nia laran sei susar ba povo nia sofrimento hodi buka dalan atu hadia. Ho ida ne’e, mak Papa dehan tan “No meio da actividade política, os mais pequeninos, frágeis e pobres devem enternecer-nos: eles têm o direito de arrebatar a nossa alma, o nosso curação. Sim eles são nosso irmãos e, como tais devemos amá-los e tratá-los” (Fratelli Tutti, p. 51). Iha atividade polítca ema nebé ki’ik iha buat hotu, fraku iha buat hotu no kiak iha buat hotu, ne’e merece político sira nia afecto no dedicação. Ne’eduni, hakarak tama iha campo político tenke iha semtimento sira ne’e, se la iha lalika obriga-an, tamba política ne’e hanesan vocação ida atu tau matan ba ema sira ne’e.

Portanto, Papa fo hanoin tan político sira katak, se tama iha político sem sentimento hirak ne’e, maibé tau as liu fali “busca de poder”, nia sei lakon domin ba povo, lakon preocupação ba povo nia moris, no lakon mos Maromak Nia domin iha sira nia an, no susar ba sira atu hatur caridade política no amor político, tamba iha sira nia an nakonu liu ho ambisão ba poder no halo buat hotu ema hare mos-mos katak sira hamrok poder.

Ne’eduni, Filósofo Norberto Bobio hare nanis ona katak: “o Alfa e Ómega da teoria política é o problema do poder: como poder é adquirido, como é conservado e perdido, como é exercido, e como é possivel defender”(Norberto Bobbio, Teoria Do Poder, p. 12). Neduni, ba sira nebé matan naklosu liu ba poder ne’e, ita hare mos-mos katak iha sira nia moris tomak, sira halo buat hotu atu assegura mak sira nia poder, tamba tauk atu lakon poder, luta atu hetan poder no defende nafatin poder, masmo que sira la hatudu espírito caridade política ho amor política iha sira nia ação política.

 

CONCLUSÃO

Oras ne’e daudaun, políticos sira preocupa liu atu halo programa funan-fuan hodi apresenta iha palco político atu dada militantes no simpatizantes sira nia laran atu vota ba sira. Hodi haluha mos katak sira tama iha campo político ne’e tenke hare política hanesan sacramento atu lori salvação ba kiak no mukit sira, la’os usa política hanesan meios ida atu bosok fali povo hodi hetan poder hodi hariku an ba beibeik. No liliu, político sira tenke hare política ne’e hanesan vocação ida, katak imi hetan bolu no hili, atu sai político hodi organiza no tau matan ba povo sira nebé moris iha situação no condição nebé la favoravél, la’os hetan bolu liu husi povo nia voto atu halo teatro no tik-tok iha serviço fatin, maibé hanoin ba katak imi hetan bolu nebé digno atu sente buat nebé povo sente, lao hamutuk ho povo iha tempo saida de’it, la’os de’it iha tempo campanha.

Basá, fatin diak nebé imi hetan; fatin mos, hatais diak, careta diak, no moris diak nebé imi iha ne’e, hetan mos contribuição husi povo sira nebé nehan la kose, hatais sabraut, la haris, han hemu la iha, uma la iha, sira ne’e mak fo voto ba imi. Ne’eduni, keta taka matan ba sira nia situação no taka fuan ba sira nia condição. Maibé, hamamar imi nia fuan atu sente buat nebé sira sente, loke matan atu hare buat nebé sira hasoru, no lolo liman atu tulun buat nebé sira kuran.

Ikus liu, ba ita hotu tenke hanoin ba katak ita nia voto mak bele muda futuro rai no povo ida ne’e. Ne’eduni, hare no fihir didiak candidato sira ne’e mak vota; vota ho consciência, vota ho maturidade, tetu ho fuan mos, sira nia programa, tetu ho neon matenek, sira nia política. La bele estraga voto, la bele gasta tempo, basá voto ne’e além de segredo, maibé mos sagrado.

Pergunta reflexão nian ba Nai-Ulun sira iha imi nia actividade política campanha nian no iha imi nia serviço fatin: Wainhira imi tur hanoin futuro ka programa campanha nian perguntas sei mosu: Para que? Para onde estou realmente apontado? Iha ne’e husu imi atu hatur didiak imi nia direção nebé justa ba rai no povo ida ne’e. Wainhira liu tiha tinan balu ka liu tiha eleição, quando imi hanoin fali imi nia passado, pergunta sei mosu: quantos me aprovaram, quantos votaram em mim, quantos tiveram um imagem positiva de mim? Ida ne’e husu saida mak imi halo ona. Dala ruma mos perguntas dolarosas sira sei mai tan: quanto amor coloquei no meu trabalho? Em que fiz progredir o Povo? Que marcas deixei na vida de sociedade? Que laços reais construi? Que forças positivas desencadei? Quanta paz social semei? Que produzi no lugar que me foi confiado? Boa reflexão!

 

Referências:

  1. FRANCISCO, Papa, Carta Encíclica, Fratelli Tutti: sobre a fraternidade e amizade social.
  2. Constituição RDTL.
  3. BOBBIO, Norberto, Teoria do poder.
  4. NICOLAU, Lobato, Sabemos, e Podemos, e Devemos Vencer.

 

Nome: José Felix Camilo

Classe: 3 Ano Teologia

Escola: Instituto Superior de Filosofia e de Teologia, Dom Jaime Garcia Goulart, Fatumeta.

 

banner 325x300

relavante