banner 728x90

Deonisia: Jogadora feto iha klubu Buibere

banner 120x600
20 Views

G-NEWS (DILI) – Deonisia Guimarães, feto morena ida , moris iha Lospalos, aldeia Tchai, iha loron 7 fulan Marsu tinan 2001. Nia hela Feto, Dili área Delta 3. Deonisia hanesan jogador feto ida ne’ebé durante ne’e hala’o atividade desportiva iha kampu futebol. Deonisia, oan hosu fuan domin Ildefonso Guimarães no Juvita Moreira. Deonisia oan ba dá-toluk hosi maun-bin alin sira hamutuk na’in-6.

Ba G-News, Tersa-feira (19122023), Deonisia espresa ninia sentimentu kona-ba ninia envolvimentu iha atividade desportu. Nia gosta tebes atividade ida ne’e.

banner 325x300

“Pessoalmente, Ha’u gosta tebe bola tanba futebol sai hanesan Ha’u nia passa tempu ou hobby ne’ebé iha vantajen mai Ha’u tanba bele aumenta ha’u nia koneksaun iha parte desportu no bele hasae desportu nia skill iha área futebol nian”, Deonisia informa ba G-News.

“Ha’u envolve iha tebe bola Ida ne’e la’os ha’u nia mehi uluk sei ki’ik maibé ha’u hetan influência atu mete tebe bola liuhosi ha’u nia kolega sira. No sira maka sai hanesan ha’u nia motivador iha tebe bola”, Nia kontinua tán.

Bainhira G-News husu kona-ba família nia apoiu ba Deonisia nia atividade, feto morena ne’e haktuir, parte família fó apoiu másimu ba atividade desportiva ne’ebé nia envolve ba, tanba família hatene kona-ba interese Deonisia nian.

“Ha’u hahú treinu tebe bola iha klubu Maudoko Fc durante tinan ida nia laran no dadaun ne’e muda fali ba iha Klubu Buibere até a data”, Deonisia konta tuir. 

“Ha’u nia mehi ba aban bainrua nian hakarak atu sai atleta ne’ebé di’ak no hakarak atu hamorin ha’u rai doben Timor liuhosi futebol. Hanesan feto, ha’u mós iha atividade uma nian maibé ha’u sempre maneja tenpu ho di’ak atu nune’e ha’u labele abandona ha’u nia atividade refere tanba ida nu’udar Hau nia responsabilidade no ida nu’udar Hanesan ha’u nia mehi”, Deonisia haklean tán.

Deonisia partisipa ona eventu nasionál Sira hanesan; liga futebol Feminina e copa, maibé nia mós seidauk partisipa iha eventu internasional sira.

Deonisia konta ninia esperiênsia fou-foun bainhira partisipa atividade desportu.

“Ha’u nia experiênsia primeira vez treinu bola iha Klubu Maudoko Fc iha kampu federasaun ne’e sai hanesan experiência foun ida mai ha’u iha momentu ne’ebá tanba ne’e primeira vez mai ha’u sama kampu bola nian”, Deonisia esplika. 

Difikuldade sira ne’ebé nia hasoru durante hala’o treinu ka tuir kompetisaun mak Hanesan; transporte, dala barak nia husu ajuda ba kolega Sira mai tula ba treinu ou tuir kompetisaun ruma tanba kauza hosi oráriu treinu ou joga ne’ebé la asertu ou la permite.

Experiência ne’ebé nia hetan hosi kolega sira ne’ebé treinu hamutuk barak tebe-tebes, no dala barak nia aprende skill joga nian hosi kolega sira ne’ebé iha experiência liu Deonisia.

Iha mundu futebol nian, jogador internasionál sira ne’ebé sai hanesan ninia inspirador mak hanesan; Cristiano Ronaldo no Alex Morgan jogadora feto hosi América serikat(AS) sai hanesan Deonisia nia modelu iha futebol.

Ho envolvimentu joven Timoroan sira iha konflitu, Deonisia fahe ninia hanoin kona-ba ne’e.

“Tuir ha’u nia hanoin joven sira ne’ebé mete problema ou sempre halo konflitu tanba sira menus atividades okupadu sira, hodi nune’e sira fásil afetadu ba buat ruma ne’ebé negativu mas se kuandu ne’e so ba Sira ne’ebé laiha konsiensia, tanba ema ne’ebé iha konsiensia sei la fásil atu afeta ba hahalok negativu Sira ne’ebé la fo benifisiu ba sira nia an. Tanba ne’e ha’u nia lia menon ba maluk jovem sira di’ak liu buka atividade hodi halo okupadu ba ita Nia an hodi nune’e bele hadook tiha Ita hosi kauza negativu sira. No la haluha sugere ba maluk jovem sira atu mete atividade desportivu nian tanba desportu di’ak ba ita nia saúde tantu físiku no psique ou mentalidade”, Nia esplika.

Deonisia esplika, partisipasaun feto no mane iha atividade desportu hanesan tane as nafatin dignidade feto nian, no liuhosi partisipasaun feto Timor iha atividade desportu, hanesan la hamosu diskriminasaun.

“Ha’u la presija ko’alia buat barak ba ha’u nia família sira, tanba sira sempre suporta ha’u iha ha’u nia atividade liu-liu iha futebol, laos kestaun joga hanesan Mane maibe ne’e hanesan hanoin primitivu tanba igualdade de gênero, feto no Mane iha direitu ne’ebé hanesan, labele halo diskriminasaun ba feto bainhira hakarak envolve iha área saida de’it”, Deonisia haklean liu tán. 

Deonisia partisipa ona kompetisaun Sira hanesan Liga futebol Feminina, Taxa Rosa Muki Bonaparte no eventu ki’ik hanesan futebol salaun Sira.

Jornalista      : Ekipa G-News

Editór Testu  : Amito Qonusere Araújo

relavante