banner 728x90

Estado Maiór Forsas Armadas “Tauk” foti asaun hasoru Xineza baku membru F-FDTL

banner 120x600
1 Views

G-NEWS (DILI) – Komunidade no utentes Sosiál Mídia Timor nian, krítika makas hasoru Estadu Maiór Jenerá Forsas Armadas, tanba la aseita ho deklarasaun Komandante Unidade Polísia Militár (PM), Maijór de Infantária Abel da Costa Xavier “NIKI”, ninia deklarasaun, relasiona ho kazu sidadaun Xineza ne’ebé halo agresaun fíziku hasoru membru F-FDTL ida, iha área Kaikoli, hanesan dezastre ida.

Joven ida Martinho de Jesus, ne’ebé G-News entrevista iha Kolmera, kuarta-Feira (08032023) informa, ho deklarasaun Komandante PM hanesan loke oportunidade ba sidadaun estranjeiru, tenta no koko atu kontinua halo agresaun fíziku hasoru sidadaun orijin, membru forsas armadas ka autoridade seguransa.

banner 325x300

“La aseita ho Komandante PM ninia deklarasaun dehan Xineza ida foin lalais baku membru forsas Armadas ne’e hanesan dezastre. Deklarasaun ida ne’e atu fo oportunidade ba ema rai liur sira atu la fó respeita ba timoroan rasik, no mais pior liu baku luta nasaun, hanesan F-FDTL”, Informa Nia.

Deklarasaun Komandante PM ne’e, deskonfia iha intervensaun polítika, tanba haree ba kooperasaun entre Timor Leste ho Xina ne’ebé diak tebes durante periódu ukun rasik an.

“Kooperasaun bilateral ne’e buat ketak ida, krime ne’e buat ketak ida. Ida ne’e hatudu katak Estadu Maiór Jenerál Forsas Armadas F-FDTL tauk atu foti asaun rígor hasoru aútor prinsípal ba kazu ne’e”, tenik Nia.

Iha parte seluk, estudante akadémika IOB Humberto Piedade dehan, kuandu joven timoroan mak halo agresaun fíziku hasoru membru forsas armadas, atuasaun hosi instituisaun F-FDTL lalais tebes hodi halo kapturasaun, no foti asaum rígor.

“Ita nia autóridade seguransa no defeza ne’e la neútru hodi halo asaun bainhira mosu dezentendimentu ka asaun kriminal hasoru membru F-FDTL sira. Sidadaun Xineza mak baku, ne’e dehan dezastre, maibé Joven timoroan sira mak halo hanesan ne’e, ohin Dili laran ne’e nakonu ho farda loren, Hicom rua tolu mak tun, sira mesak oin buis deit. Kuitadulei ne’e vale ba ema kbiit laek deit, vale sira ne’ebé la iha poder, maibé sira ne’ebé mak iha osan barak, sira sei manan; ezemplu hanesan Xineza ida baku membru F-FDTL ne’e”, lamenta ho oin triste.

Antes ne’e, Komandante PM Maijór de Infantária Abel da Costa Xavier “NIKI” informa ona katak,  akontesimentu ne’e nu’udar Dezastre ida.

“Realidade ida mosu ne’e, ita labele koalia buat ida, sidadaun sivil ida tula liman ba militár ne’e tula liman ida oinsa lai, tula liman ne’e laos nia lao arbiru mak baku, se nia tur ninia mak nia baku ne’e labele, mais buat ida lao mak asidente ne’e oin seluk, buat ida dezastre ne’e dezastre”, dehan Maijór Niki iha Unidade Apoiu Servisu (UAS) Metinaru, Segunda-Feira (06032023).

Entertantu, kazu Sidadaun Xineza baku membru F-FDTL ne’e kontinua hala’o investigasaun hosi Polísia Militár.

Jornalista     : Ekipa G-News

Editór Textu  : Amito Qonusere Araújo

relavante