banner 728x250

Governu foun presiza re-estrutura totál DNRN-MJ

banner 120x600

G-NEWS (DILI) – Relasiona ho stock Passaporte komun ne’ebé mínimu tebes, no hela deit kaderneta Passaporte atus-hat hodi atende ba nesesidade sidadaun sira nian ho orijente, halo sidadaun sira insatisfeitu tanba situasaun ne’e hatudu Ministériu Justisa (MJ), liuhosi Diresaun Nasionál Rejistu no Notariadu (DNRN) la iha preparasaun másimu hodi halo atendimentu públiku.

Estudante UNTL Filomeno Mendonça ba G-News, Sexta-Feira (17022023) hateten, Diresaun Nasionál Rejistu no Notariadu servisu la sériu, no la iha planu diak ba polítika Notariadu nian, liu-liu atendimentu passaporte. Rajaun tanba stock Passaporte komun menus maske timoroan maiória uza no trata passaporte komum hodi hala’o viajen internasionál.

banner 325x300

Tuir loloos, DNRN tenke prepara kaderneta passaporte ne’e tinan rua antes, tanba númeru sidadaun sira trata passaporte aumenta bebeik. Nune’e ho stock passaporte menus hatudu polítika no planu Ministériu Justisa la sériu.

“Diak liu Governu foun, re-estrutura Diresaun Nasionál Rejistu Notariadu, tau fali ema foun, tanba estrutura átual ne’e la iha planu, ikus mai halo sidadaun sira mak sai fali vítima ba Governu ninia polítika rasik”, informa nia.

Iha parte seluk, Joven partidu CNRT João de Deus dehan, diak liu re-estrutura DNRN tanba sira nia planu falla ona, no ikus mai sodadaun sira mak sai vítima kuandu trata passaporte, no tenke hein fali to’o kaderneta passaporte to’o Timor.

“Nu’udar joven partidu nian, Ha’u la aseita, no ha’u hanoin joven sira hosi partidu seluk mós la aseita tanba nu’udar sidadaun. Kuandu ita nonok deit, timoroan barak mak sei sai vítima ba polítika Governu ne’ebé la ho planu diak. Espera katak Governu bele rezolve lalais stock passaporte ne’ebé menus ona”, dehan João.

Hanoin hanesan mós hosi Lucas no Filipe hosi Partidu PD katak, presiza re-estrutura DNRJ tanba kestaun trata dokumentus sempre iha problema, hahú hosi Billete Identidade, Sertidaun RDTL, no agora Passaporte fali. Ne’e hatudu katak, Ministériu Justisa falla totál iha atendimentu públiku.

Tuir sira na’in rua katak, durante ne’e timoroan barak mak kestiona kona-ba servisu Notariadu nian, tanba lamentasaun sempre akontese kuandu sidadaun sira ba trata dokumentus Estadu nian.

Antes ne’e, Diresaum Nasionál Rejistu no Notariadu informa ona katak, stock ba passaporte komum menus ona, tanba kompanha sira ne’ebé atu konkore ba distribuisaun la priense kritéris sira ne’ebé iha.

Antes ne’e, iha loron 9 fulan Fevereiru tinan 2023, liuhosi desizaun Diretór Jerál João Fernando Martins Borges, hasai avizu kona-ba stock kaderneta passaporte ne’ebé menus.
“Hare katak dadaun ne’e stock kaderneta passaporte komum hela deit 400 kaderneta nune’e reserva deit ba atendimentu emergência ba ema moras nebe atu evakua ba rai liur (estrangeiro). Hare mos katak sei iha mudansa (upgrade) kualidade ba kaderneta passaporte Timor Leste nian tuir rekomendasaun ICAO (International Civil Aviation Organisation) nian.
Tamba ne’e atendimentu ba Passaporte taka provisoriomente hodi hein kaderneta foun nebe’e dadaun ne’e iha prosesu imprimi (produs) iha rai liur.
Diresaun Jeral Servisu Registo no Notariado sei halo fali atendimentu wainhira kompanhia fornecedor hatama ona kaderneta passaporte foun.
Ba atensaun no komprensaun, hato’o obrigado wa’in.

Dili, 09 de fevereiru de 2023

Diretor Geral

Assinado no Karimbu

João Fernando Martins Borges

Jornalista: Ekipa G-News
Editór Textu: Amito Qonusere Araújo

banner 325x300

relavante