Horta Simu Vizita Husi Enviadu Espesiál Singapura, Mohd Apresia Kafé Timor

Jornalísta: Arménio //

G-RTV.com (Dili) : Enviadu espesiál husi nasaun Singapura, vizita prezidente eleitu, José Ramos-Horta iha nia rezidénsia eis-titulár, faról, Dili hodi espressa nia kontente mai iha Timor Leste.

‘’Ha’u kontente tebes hasoru malu ho prezidente repúblika eleitu, Horta, agora, Timor Leste ho Singapura  nia relasaun sólidu tebes, no ami koalia mós kooperasaun ne’ebé sei la’o iha futuru,’’ Dehan enviadu espesiál, atuál Segundu Ministru Negósiu Estranzéiru Singapura, Mohd Osman, hafoin enkontru ho Horta, Kuarta feira, ohin, 18/05/2022.

Nia espressa liu tan, ‘’Haksolok tebes bele mai partisipa investuradu prezidente eleitu, José Ramos-Horta no komemorasaun tinan 20 restaurasaun independénsia Timor Leste,’’ Espressa Nia.

Enkontru ne’e hala’o kuaze óras ida ne’ebé akompaña husi delegasaun Singapura no ekipa tranzitóriu prezidente eleitu nian, no hafoin enkontru troka prenda bá malu.

Tuir observasaun, iha troka prenda ne’e, enviadu espesiál ne’e simu kafé ne’ebé oferese husi premeiadu nóbel bá páz no apresia ho kafé Timor nia morin.

Reprezentante estadu Singapura ne’e to’o iha Timor Leste, ohin, iha óras tuku 11:00 resin dadér ho aviaun Citilink no aban sei partisipa iha serimónia investedura iha tasi-tolu.

(REMATA).