banner 728x90

Insidente Lurumata laos entre PSHT ho Federasaun Wushu

banner 120x600

G-NEWS (DILI) – Liuhosi komunikadu imprensa ne’ebé G-News asesu Domingu semana rohan ne’e katak, insidente ne’ebé akontese iha Lurumata laos kazu ataka malu entre Organizasaun Arte Marsiais PSHT no Federasaun Wushu.

“Ohin, loron 14 fulan Maiu, Komisaun Reguladora Artes Marsiais (KRAM) urjentenmente bolu líderes Organizasaun Arte Marsiais rua, PSHT ho Federasaun Wushu, hodi husu klarifikasaun ba insidente ida iha Lurumata mak halo joven ida, sai vítima. Parte Federasaun Wushu ho PSHT aseita malu katak insidente ne’ebé akontese laos problema entre OAM PSHT ho Federasaun Wushu”, haktuir iha komunikadu.

banner 325x300

Iha komunikadu hosi KRAM ne’e mós haktuir katak, líder Organizasaun PSHT konfirma katak, loos duni membru ida ne’ebé sai vítima maihosi PSHT. Iha parte seluk, líder Federasaun Wushu rona katak, parte sira mak sai nu’udar suspeitu na’in ida maihosi OAM Wushu.

“Parte rua, PSHT ho Wushu, hakarak hosik kazu ne’e ba PNTL, no fiar iha PNTL nia investigasaun hodi estabelese faktu loloos, no lori justisa ba vítima ho nia família”, sita iha komunikadu.

Ho kazu ne’ebé akontese iha Lurumata, Koordenádor PSHT Rayon C Jaime da Cruz husu membru hotu-hotu atu kontinua mantein situasaun hakmatek, no la monu ba provokasaun oi-oin, ne’ebé tenta atu halo foer OAM PSHT nia naran.

“PSHT lakon nia membru ida, noami triste hamutuk ho família matebian mak lakon ona sira nia oan iha insidente horiseik. Ami husu atu membru hotu-hotu kontinua hakmatek no tau interese Estadu nian, interese Organizasaun nian boot liu interese pessoal. Mai ita hamutuk hakotu ona korente violénsia ida ne’e, no ita hamutuk asegura ita nia eleisaun” Jaime da Cruz alerta.

Iha parte seluk, Sekretáriu-Jerál Federasaun Wushu José Marcal sente triste ho insidente, no hakarak kontinua husu membru hakmatek no halo esforsu atu la envolve iha violénsia saida de’t.

Alende ne’e, Prezidente KRAM Fernando da Costa mós sente triste ho insidente mak akontese ona tanba joven ida mak tenke lakon nia vída. KRAM husu atu parte hotu-hotu tenke respeita prosesu investigasaun, no hein katak justisa sei hala’o ho justu duni.

“Hosi parte KRAM kontinua komunika ho OAM hotu-hotu hodi kontinua bolu atensaun ba nia membru sira atu labele monu ba provokasaun, no labele provokadu ho tentativa oi-oin mak bele estraga naran diak OAM sira nian. KRAM mós husu ba OAM ida-idak atu mantein kontrolu másimu ba nia membru sira, no kontinua implementa deklarasaun dame mak halo hamutuk ona entre membru OAM, iha Ginaziu, iha loron 13 fulan abril”, Prezidente KRAM haktuir, liuhosi komunikadu imprensa, ne’ebéG-News asesu.

Prezidnete KRAM husu ba membru OAM hotu-hotu atu koopera ho Polísia, no fo suporta másimu ba servisu PNTL hodi fo susesu ba eleisaun no mantein dame iha Rai-Timor.

Jornalista     : Ekipa G-News
Editór Testu  : Amito Qonusere Araújo

relavante