banner 728x90

Investiga Prezidente RAEOA Arsenio Bano tanba faan rai no rezidénsia Estadu ba Alkatíri

banner 120x600

G-NEWS (DILI) – Movimentu Estudante Tane Oe-Cusse (METO), kuarta-feira (230820230) iha Jardim- 5 de Maio Colmera, Dili, lori Estudante no komunidade Oe-Kusi oan hotu sira-nia lian, hato’o ba publiku, liu-liu IX Governu konstituisional atu toma atensaun hodi foti medida imediata ba desizaun Prezidente Autoridade RAEOA Arsenio Paixão Bano ne’ebé uza nia kompetensia hodi fa’an tiha rai no rezidensia estadu Fulolo Oe-Kusi ba Eis-Prezidente Autoridade RAEOA Mari Bin Amude Alkatiri.

Iha karta imprensa ne’ebé G-News asesu katak, antes kriasaun RAEOA no estabelese ZEESM-TL iha Oe-Kusi, Rai Fulolo hanesan rai potensia ba komunidade 76 hodi utiliza rai refere halo toos no kuda produtu ne’ebé mak komunidade sira presiza, hodi sustenta sira-nia nesesidade, kontribui mós ba kresimentu soberañia ai-han no eradikasaun hamlaha.

banner 325x300

“Iha tinan 2015, bainhira halo ona Kriasaun RAEOA no estabelesimentu ZEESM-TL iha Oe-Kusi, bazeia ba Lei númeru 03/2014 de 18 de Juñu, kona-ba Kriasaun Rejiaun Administrativa Espesial Oe-Kusi Ambeno no Zona Espesial Ekonomia Sosial Merkadu iha Oe-Kusi no Atauro, ne’ebé hetan aprovasaun husi Parlamentu Nasional, atu implementa programa pilotu sira iha Oe-Kusi”.

Tuir Movimentu Estudante Tane Oe-Cusse (METO), eis-Prezidente Autoridade RAEOA Mari Alkatiri haree katak, Fulolo hanesan rai estratejiku ba Estadu hodi etabelese obra ruma nune’e bele koresponde ba interese públiku tuir nesesidade ne’ebé estadu presiza iha futuru.

Nune’e iha tinan 2015, Autoridade RAEOA hasai komunidade na’in 76 hodi hatama rai refere ba uzu públiku sem indeminizasaun, maibé hosi komunidade na’in 76 ho fuan boot konsege kolabora ho Autoridade RAEOA hodi oferese rai ba Estadu, atu halo konstrusaun ba uma 7 atu fahe ba Sekretáriu Rejionál na’in 7 hodi hela, atu hala’o servisu ba interese komun durante sira nia mandatu.

“Uma hirak ne’e harii uza Orsamentu Jeral do Estadu ho montante $. 1,687,037 (um milloes i tal). Osan hirak ne’e la’os ema ida mak foti hosi nia bolus, maibé, atualmente hamosu polémika ida ne’ebé mak sériu katak, rezidénsia ne’ebé estabelese hosi Eis-Prezidente Autoridade RAEOA Mari Alkatiri, nune’e mós Nia rasik halo ona deliberasaun iha loron 16 fulan Outubru tinan 2017 kona-ba Compra e Venda, hodi faan rezidénsia ba Eis-membru autoridade RAEOA, no ikus mai faan duni rezidensia Fulolo ba Eis-Prezidente Autoridade RAEOA rasik, bazeia ba deliberasaun Compra e venda ne’ebé nia rasik mak kria. (konformi husi akta ne’ebé Diretór Servisu Notariadu RAEOA Dr. Jóse Ase Neno, fo sai)”,

Haree ba deliberasaun Compra e venda hanesan estudante Oe-Kusi oan konsidera Eis-Prezidente autoridade RAEOA halo ho intensaun atu benefísia nia án la’os ba interese públiku, tanba nia rasik mak kria, ikus nia rasik mak sosa hodi privatiza tiha rai no uma estadu ba nia án. Haree ba deliberasaun ida ne’e parte ida bele loos no bele sala. Karik loos bainhira la viola normas no lei ne’ebé vigora.

Alende haree ba deklarasaun hosi Prezidente Autoridade Arsenio Paixão Bano katak, fa’an tiha rai inklui rezidensia estadu ne’e atu hatama fali osan ba kofre estadu, atu nune’e autoridade bele halo fali rezidénsia foun ba ema ne’ebé mak atu aluga tán no hateten mós katak nia fa’an bazeia ba baze legal. (Ne’e laloos no deskonfia iha indisiu krime korupsaun).

“Alende ita haree ba Prezidente Autoridade RAEOA nia deklarasaun mos la razoavel atu konvense publiku, tanba alokasaun orsamentu Jerál Estadu kada tinan, komesa hosi tinan 2015 mai to’o tinan 2023 hanesan Alokasaun orasamentu jeral do estadu husi 2015 mai to’o 2021 nian ho montante ne’ebé boot tebes, no Alokasaun orsamentu estadu ba RAEOA iha tinan 2022 nian ho montante $ 84 Millaun maibé ninia ezukusaun foin mak atinji de’it 19% no mai fali iha alokasaun orsamentu jeral estadu 2023 nian Governu sentral aloka tan orsamentu ho montante $ 120 Milliaun”, Portavoz METO Abilio da Cruz Quefi haktuir.

Hosi alokasaun orsamentu Jerál Estadu tinan 2022 ba RAEOA, ezekusaun mínimu tebes, maibé Prezidente Autoridade RAEOA hakarak faan tán rai no rezidénsia Estadu iha Fulolo Oe-Kusi hodi hatama ba kofre estadu.

“Ida ne’e, ita haree katak Prezidente Autoridade manifesta nia inkapasidade no laiha seriedade servisu durante nia mandatu. Signifika katak prezidente autoridade inkapasidade ba ezekusaun orsamentu tanba kada tinan la ezakuta hotu orsamentu no lahatene mós hodi buka osan tanba la iha alternativu seluk no nia alternativu ikus mak uza autoridade hodi fa’an rai no rezidensia estadu ne’ebé mak konstroi uza osan povu nian. Alende ne’e mós, Prezidente autoridade deklara katak, nia faan rai no rezidénsia bazeia ba baze legál, maibé lei ida ne’ebé, no sita iha artigu hira mak fó dalan ba Prezidente Autoridade RAEOA hodi faan rai no rezidénsia Estadu”, Portavoz METO Abilio da Cruz Quefi esplika

Tanba polemika alineasaun rezidénsia ofisiál Fulolo, primeiru autoridade RAEOA tenke hatene domíniu ou rezidénsia ofisiál hanesan produtu Expropriasaun ou lae? Se produtu Expropriasaun, entaun autoridade labele uzufruir ou sai hanesan privadu, razaun tanba propriedade ou dominiu ne’e nia titularidade de direitu seidauk klaru. Bazeia ba lei nú. 3/2014 de Juñu, artigu 26 ne’e koalia kona-ba utilizasaun da terra estadu liuhusi autoridade rejional “Garantia direitu uzu no fruisaun da terra para fins dezenvolvimentu de prozetos de investimentu dentru dos limites” ne’ebé previstu iha lei inan KRDTL. art 54. Maibé la signifika katak autoridade uzu fruir expropriasaun hanesan privadu. Iha artigu 27 hateten katak, autoridade so proteje konformidade bazeia ba lei ne’e atribu. Outra vertente sr. prezidezidente Autoridade Arsenio Bano, nia tenke haree didiak rezidensia ofisial ne’e tama iha jestaun imovel estadu tuir lei atribui ka lae? Liuhusi eskritura publika  ho baze legal iha lei númeru 10/2011 de 14 de Setembru, artigu 809 CCTL, ho forma kontratu kompra e venda”. Portavoz METO Abilio da Cruz Quefi haktuir.

Bainhira Autoridade RAEOA halo ona deliberasaun liuhosi Prezidente autoridade mak konvoka tenke haree efeitu ezisensias artigu 813 CCTL katak, atu transmite propriedade nia titularidade direitu tenke klaru. Tanba públiku konsidera rezidensia ofisial ne’e hanesan “bens existensia ou titularidade incerta ho base 815 CCTL, katak kuandu autoridade sei fa’an beins de existencia ou titularidade incerta no nia kontratu hanesan mensaun inserteza bele dividu ona nia presu ne’e autoridade investe ba konta bankária autoridade ninian, maibé bens imoveis la eziste, la pertense ba vendedor, exeptu hosi parte kompetente rekuza ba kontratu natureza aleatória.

Atravez hosi problema hirak ne’e, Estudante Oe-Kusi oan husu ba parte Notariadu RAEOA atu mantein emite kontratu definitivu hanesan eskritura públiku dokumentu auténtiku, ba Parlamentu Nasionál atu halo inkeritu parlamentar, no Komisaun C atu halo fiskalizasaun ba Prezidente Autoridade RAEOA. Husu mós ba Comisaun Anti Corupsaun (CAC) atu hola investigasaun imediata ba patrimóniu estadu ne’ebé mak faan ba pesoal ida.

“Husu mós ba IX Governu Konstituisional atu toma atensaun hodi halo intervensaun lalais ba Prezidente Autoridade nia desizaun faan rai no rezidénsia estadu iha Fulolo Oe-Kusi”, Portavoz METO Abilio da Cruz Quefi hakotu.

Jornalista       : Ekipa G-News

Editór Testu : Amito Qonusere Araújo

relavante