banner 728x90

Joven akadémiku sira konsidera deputadu atúal goza demais regalias estadu 

Imajen: Mídia Parlamentu Nasional
banner 120x600
14 Views

G-NEWS (DILI) – Estudante akadémiku sira deskorda proposta Lei númeru 4/VI hosi alterasaun lei númeru5/2004, loron 5 fulan maiu kona-ba estatutu deputadu sira nian atu hetan subsídiu kada fulan ba transporte ho válor osan dollares Amerikanu 1.600 no osan ba médiku nian ho válor dollares 600 kada fulan.

Estudante ida hosi Institute of Business (IOB) Marito de Jesus Soares, ne’ebé G-News hasoru iha Pantai-Kelapa, Dili, iha segunda-feira (04122023) katak, sente triste ho reprejentante povu iha uma fukun parlamentu nasionál, ne’ebé aprova orsamentu povu nian ba sira nia interese.

banner 325x300

Tanba tuir Nia, subsidiu transporte no saúde ba deputadu sira la tama lójika tan sira hetan kareta no regaliais sira ne’ebé bele sustenta sira nia nesesidade.

“Depois-de ita rona deputadu sira iha Parlamentu Nasional subsidiu transporte no saúde ba sira nia interese ne’e hanesan sira mak goja regaliais Estadu nian liu profisaun sira seluk ne’ebé kontribui mós ba administrasaun públika”, Marito lamenta kona-ba ne’e.

Iha parte seluk, Juventude Suku Madohi Agustinho Santiago Martins, informa ba G-News iha Tasitolu katak, la aseita ho deputadu sira ne’ebé aprova subsidiu ba sira nia an rasik, maske povu maiória sei moris iha liña pobreza.

“Hanesan joven, ami sente triste, tanba deputadu sira la hanoin ba povu nia moris, sira mak goza demais. Ita povu ki’ik nafatin, sira boot no riku, riku ba bebeik, ne’e hanesan ami povu sente ne’e hanesan ne’e. Ami la ejiji atu simu osan ka saida, maibé kria netik kondisaun ba ami povu no joven sira, hanesan sosa netik rede ba kail ikan, ka loke servisu ruma ba ami, maibé durante ne’e la iha”, Agustinho esplika.

Estudante akadémiku hosi Universidade da Páz (UNPAZ) Almerindo Ximenes dehan iha estrada diresaun Fumentu ba Kampus segunda-feira Domingu (03122023) husu ba Xefe Estadu atu veta tiha proposta Parlamentu Nasional kona-ba subsidiu transporte no saúde deputadsu sira nian, tanba nia konsidera ne’e hamosu diskriminasaun no klase sosiál iha Timor Leste.

“Ha’u nia sujestaun, di’ak liu Na’i Prezidente da Repúblika veta tiha proposta Parlamentu Nasional nian kona-ba subsidiu transporte no saúde ba deputadu sira tanba ne’e hanesan hamosu diskriminasaun no klase sosiál entre ukun na’in no povu sira, maske ita hotu hatene katak poder ne’ebé sira hetan ne’e fó hosi povu sira. Iha kampaña foin lalais ne’e, la iha partidu polítiku ida mak ko’alia kona-ba subsidiu, maibé kuandu manan ona, hetan konfiansa, sira halo buat hotu-hotu tuir sira nia hakatar, ida ne’e mak la di’ak ne’e, ne’e hanesan atu mai kari rai-rahun ba povu nia matan, kuandu hetan oportunidade, sama tán povu tanba sira halo delek ona”, Almerindo esplika ba G-News.

Antes ne’e, liuhosi konferénsia imprensa ida ne’ebé organiza hosi Forum Organizasaun Naun Governamental Timor Leste (FONGTIL), tersa-feira (28112023) husu mós ba Xefe Estadu José Ramos Horta atu veta proposta lei ne’e.

Portavoz FONGTIL Esterita Pereira kondena makaas aktus Parlamentu Nasional nian, ne’ebé konsidera katak reprejentante povu iha uma fukun la iha sentimentu.

“Na’i deputadu sira iha fuan ka la’e, povu barak moris iha terus no susar nia laran, kondisaun uma la dignu, no la han hahan nutritive, maibé deputadu sira moris di’ak no riku ba bebeik”, Esterlita hato’o lia ne’e liuhosi konferénsia imprensa, iha Fárol Dili. 

Liuhosi entrevista sira ne’ebé G-News halo, maiória akademista no juventude sira la aseita ho polítika deputadu sira nian kona-ba aprovasaun subsidiu transporte no saúde ba sira nian an rasik. Nune’e sira husu ba Primeiru-Ministru Kay Rala Xanana Gusmão atu uza nia karisma nu’udar líder nasional, no hanesan mós Xefe Governu, atu halo intervensaun imediata ba deputadu maioritáriu sira (CNRT no PD) atu dada hikas proposta refere hodi kansel tanba povu barak sei moris iha liña pobreza.

“Polítika deputadu sira nian iha parlamentu nasional ne’e, hanesan polítika ida atu hamonu integridade Avo Nana nian iha futuru”, rezumu entrevista sira hosi estudante no akadémiku sira kona-ba ne’e ba G-News.

Iha loron 22 fulan novembru tinan 2023, Parlamentu Nasionál liuhosi sesaun plenária extraordinária aprova ona iha Jeneralidade Projetu Lei númeru 4/VI(1ª) –Alterasaun datoluk ba Lei númeru 5/2004, loron 5 fulan maiu kona-ba Estatutu Deputadu sira nian, ho votus afavor 50, kontra 1, no abstensaun 6.

Hafoin aprovasaun iha jeneralidade, plenária deside hodi autoriza Komisaun A ne’ebé trata asuntu Konstitusionais no Justisa hodi halo diskusaun iha espesialidade antes haruka ba plenária hodi halo aprovasaun final global.

Jornalista                   : Ekipa G-News

Editór Testu             : Amito Qonusere Araújo

relavante