banner 728x90

Kliente EDTL forma naruk sosa pulsa iha kalan

banner 120x600

G-NEWS (DILI) – Sábadu (01042023) kalan, desde loraik tuku lima ho balum, sidadaun sira forma naruk iha semteu faan token/pulsa eletrisidade iha Sentra EDTL, EP, Pantai Kelapa, Lurumata no sentru sira seluk tán iha kapitál Dili.

Iha Sentru EDTL, EP Caicoli Dili, Sábadu kalan, kliente Laurentina Xavier preokupa ho situasaun sira ne’e, tanba tuir loloos EDTL tenke loke sentru barak, nune’e fasilita kliente sira, tanba númeru kliente aumenta kada loron.

banner 325x300

“Ita husu ba EDTL, EP loke sentru faan pulsa EDTL nian, tanba loron-loron númeru kliente aumenta. Se nune’e nafatin, ita mai sosa pulsa hanesan forma atu simu osan”, Nia lamenta.

Kliente seluk, Armanda Cardoso ba G-News ho lian makaas husu responsabilidade no atensaun sériu hosi Governu, tanba Prezidente EDTL kada fulan, hetan sálariu boot, maibé servisu atendimentu públiku lao neneik loos, no marka passu.

Iha Lurumata, kliente sira mós forma naruk. Kliente ida kestiona atensaum Governu, atu tau matan ba problema ida ne’e, no husu atu ezonera Prezidente EDTL, EP tanba la iha kapasidade atu halo jestaun diak ba servisu atendimentu ba kliente sira, liu-liu sosa pulsa eletrisidade.

“Ita ne’e sosa tiha pulsa, pois mai forma tán, hanesan fali mai simu osan ka simu sesta-bázika iha sede suku. Bainhira mak nai ulun sira ne’e bele rezolve problema ida ne’e. Ohin Ha’u haree mana balun lori oan nurak mai sosa pulsa, kuitadu, Governu ne’e delek duni”, nia koa’lia ho hirus.

Tuir Observasaun G-News, kliente barak lamenta ho situasaun ne’e. Kliente sira sente triste, tamba ne’e husu ba Governu atu tau matan ba situasaun tanba konsidera ne’e problema sériu.

Jornalista     : Ekipa G-News
Editór Testu  : Amito Qonusere Araújo

relavante