banner 728x90

Kondisaun ambulánsia ida no multifunsaun 3 avaria iha Manufahi

Kondisaun ambulánsia 4 avaria iha Manufahi

banner 120x600

G-NEWS (MANUFAHI) – Sosiedade Sivil Kestiona Kondisaun Ambulansia Avaria Semana 2, no kompañia SAMDILUNA 0110 Unipesoal Lda Halo Ona Manutensaun.

Sosiedade Sivil (SS) iha munisipíu Manufahi kestiona kondisaun kareta ambulansia multifunsaun iha Manufahi kompostu husi postu Fatuberliu,  Alas no Same villa kondisaun a’at hotu, no pasiente tula deit ho kareta bombeirus no kareta privadu hodi ba ospital.

banner 325x300

Tuir jestor programa iha Fundasaun Luta Ba Futuru (F-LBF), Armando da Silva husu Ministériu  Saúde atu buka dalan hodi rezolve problema kareta ambulansia ne’ebé iha Manufahi a’at ona kuaze semana rua.

“Ami husu Ministériu tenke haree asúntu ne’e ba responde ho sériu, urjentemente no rápidu tanba ligadu ho ema nia vida”, dehan Armando ba jornalista sira iha nia kna’ar fatin, Kuarta (14/06) semana ne’e.

Tuir nia, Manufahi iha kareta ambulánsia multi-funsaun lima, maibé haat avaria totál tanba kampas no travaun at ona kuaze semana rua, no hela de’it ambulannsia husi sentru saúde Turiskai maka sei diak, maibé tanba turiskai area luan nune’e labele kobre fali mai Same, Alas no Fatuberliu.

Nune’e nia hateten, durante ne’e ambulánsia multi-funsaun sira at hotu nune’e pasiente sira transfere ba óspital hetan apoiu husi parte bombeirus inklui kareta privadu balun.

“Situasaun ne’e ami hare katak defisil, tanba ne’e ita husu Ministériu liu-liu diresaun (SNAIM) Serviso Nasionál  Ambulánsia no Emerjénsia Médika tenki hare ekipamentus balun resposta lalais komunidade Manufahi ninia ejijiensia”nia sujere.

Nune’e Armando husu ba parlamentu nasionál atu hare mós ba situasaun ne’e, tanba dadaun ne’e rumoris dehan deputadu sira atu halo leilaun kareta ba an rasik, maibé husu kareta ne’ebé ho kondisaun diak ne’e tenki apoiu fali ba ministériu saúde hodi transforma ba ambulánsia oferese ba óspital sira hodi halo atendimentu ba pasiente.

“Ami hare durante ne’e kareta ministériu ninian maibé saude munisipíu hanesan kareta operasional uza hodi tula mós pasiente”nia subliña.

Ba asuntu ne’e Diretora Serbisu saúde munisípiu Manufahi, Florença Corte Real Tilman konfirma, ambulánsia SNAIM iha Same a’at tiha ona tanba essu tohar, ambulánsia multi-funsaun roda mentus rahun, ambulánsia Fatuberliu Tiroid a’at, Same nian disku embrazen mohu.

“Maske ami nia kareta multi-funsaun a’at maibé ami nia kareta operasional bele tula pasiente sira hodi ba óspital, Maibé ambulánsia SNAIM ne’e kompeténsia SNAIM mak hadia maibé multifunsaun ohin ba oin ami hadia ona”,nia relata.

Portantu ho kondisaun hirak ne’e mak, foin lalais atu muda pasiente husi sentru internamentu tuan ba sentru internamentu foun Bubur laran Luak pasiente tula ho kareta bombeirus.

“Ho menus ambulansia maka foin lalais ha’u halo ona pedidu ida ba SNAIM atu apoiu tan ambulansia rua mai hodi fasilita tula pasiente ba óspital referal Maubise no óspital Nasionál Guidu Valadares (HNGV) maibe ladauk responde, maibé parte SNAIM apoiu tan kareta ambulánsia ida mai Manufahi, hodi fasilita pasiente sira, hodi hein prosésu manutensaun remata,”nia haktuir.

Entretantu kareta hirak ne’ebé a’at ne’e ohin kompañia Samdiluna 0110 hahú ohin husi Dili mai ona Manufahi, hahú komesa hadia ona kareta ambulánsia ne’ebé avaria iha Munisípiu Manufahi.

Iha sorin seluk, Xefe departamentu servísu emerjensia Médika munisipiu Manufahi Agusto Amaral reforsa katak, iha Munisípiu Manufahi, iha deit ambulansia 1 ne’ebé durante ne’e uza hodi tula pasiente husi suku no aldeia, no hetan apoiu kareta multi-funsaun 4 husi saude munisipal, maibé ambulansia ida no multi-funsaun 3 hetan avaria hotu, no oras ne’e dadaun tama ona prosésu manutensaun.

Ho situasaun ne’e, Xefe departamentu ne’e husu Ministériu Saúde apoiu tan ambulánsia foun ba iha Munisípiu Manufahi hodi atende komunidade sira.

 

 Jornalista                   : Júlio Guterres Bosi-Cai

Editór Testu                : Amito Qonusere Araújo

relavante