Jornalísta : Arménio //
G-RTV.com (Dili) : Universidade Católica Timorense (UCT), ohin, hala’o abertura da-uluk ba tinan akadémiku 2022 iha inísiu istória universidade no inagurasaun sala aula.
Iha abertura ne’e, Reitór UCT informa iha entrevista, tuir regra doutrina igreja katólika nian katak antes forma família tenke prepara-án didi’ák.
‘’Tama iha ne’e, edukasaun katólika, hotu-hotu tenke tuir doutrina katólika nian, katak antes forma família tenke prepara-án, ami la bandu atu hala’o relasaun espesiál (Namora), ha’u rasik dehan ba estudante sira, mai iha ne’e buka matenek la’ós buka parseria moris nian (Forma Família)’’, Informa Reitór UCT, Frei Prof. Dr. Pe. Joel Casimiro Pinto, OFM, iha Kampuz UCT, Balide, 24/03/2022.
‘’Sei iha tempu atu forma família hafoin tinan 4 ka 5 remata estudu atu prepara-án didiak, ami ajuda família sira, inan-aman sira ne’ebé kolen no lakon osan, selu karun, mai eskola iha ne’e atu termina estudu ho di’ák’’, Hatutan preimeiru Reitór ne’e.
Nia esplika liu tan, hakarak ajuda jóvem sira atu termina estudu, mínimu lisensiadu iha eskola refere to’o hetan servisu hodi la fó ona todan ba inana-aman sira, bele ona forma família tambá bainhira sedu, sei impede prossesu estudu tomak inklui fó todan ba inan aman bainhira hein bei-oan.
UCT iha inísiu ano letivu, rezista estudante hamutuk 490 iha fakuldade 4, aumenta ho estudante husi institutu relijioza ne’ebé integra hamutuk 600-resin ho missaun mak atu promove intelektuál ne’ebé nakloke bá dezenvolvimentu intelektuál no dezenvolve fuan atu hadomi siénsia. (REMATA).
