banner 728x90

Lideransa PSHT no IKS kasu lia ba membru sira

banner 120x600
1 Views

G-NEWS (DILI) – Relasiona ho konfrontu sira ne’ebé akontese iha iha fatin-fatin, ne’ebé envolve direta hosi membru organizasaun arte marsiais sira, liu-liu Organizasaun Persaudaraan Setia Hati Terate (PSHT) no Família Boot IKS PTL Kera Sakti Timor Leste.

Tanba ne’e, Komisaun Reguladora Arte Marsiais, bolu lideransa másimu Organizasaun rua ne’e (PSHT no IKS), atu fó atensaun ba membru sira atu kria pás no estabilidada iha sosiedade nia leet, hodi selebra festa demokrasia iha eleisaun suku, ne’ebé sei akontese iha loron 28 fulan Outubru ne’e, no preparasaun ba selebrasaun kada tinan ba loron nasionál matebian nian iha loron 2 fulan Novembru.

banner 325x300

Prezidente PSHT Baltazar Lemos, ba Jornalista sira, Kinta-feira (26102023) apela ba membru tomak PSHT nian iha Timor laran tomak, atu pasiensia no kalma, hodi hatudu ezempla di’ak, hodi kria estabilidade iha sosiedade nia leet.

Tuir nia, problema ne’ebé akontese entre joven sira, konsidera problema pesoal no laos responsabilidade organizasaun nian.

“Problema ne’ebe akontese problema pesoal, responabiliza pesoal. Organizasaun iha regras, organizasaun sei suspende ba membru sira ne’ebé la lao tuir regras ne’ebé, sei foti medida rigor no demite hosi organizasaun”, Baltazar Lemos esplika.

Alende ne’e, Lideransa másimu Organizasaun PSHT ne’e haktuir tán, Organizasaun PSHT sei foti sansaun seluk mak foti atributu, sei la autoriza atu fó treinu, no kuandu grau violênsia boot, sei hasai hosi organizasaun.

“Ami lideransa ne’e atu eduka ema sai ema”, Baltazar apela kona-ba ne’e.

Iha parte seluk, Prezidente Família Boot IKS PTL Kera Sakti Timor Leste Silvestre Sufa husu ba membru Organizasaun IKS tomak atu hakribi violênsia no hakruk de’it ba lei ne’ebé iha.

 Apela ba membru IKS tomak katak, hahú ohin, hotu-hotu tenke hakribi violensia, hakruk ba lei, hakruk ba autoridade sira”, Silvestre apela.

Nia hateten tán, problema privadu ne’ebé akontese ne’e responsabiliza ida-idak nian tanba Organizasaun la hanorin membru sira atu kria problema. Tanba ne’e nia husu atu membru hotu-hotu tenke garante estabilidade, no atu fo seguransa ida hakmatek ba eleisaun suku.

“Fó seguransa hakmatek iha eleisaun suku, no iha loron finadu, ida-idak hakmatek. Iha fatin ne’ebé de’it kria pás no unidade”, nia aumenta tán.

“IKS tomak tenke promove ba desportiva, tanba iks hatudu ona talentu liu hosi kompetisaun foin lalais ne’e. IKS nunka fó lisensa ema atu halo problema. Organizasaun iha regras, iha estututu atu lao tuir”.

Tuir Prezidente Família Boot Organizasaun IKS PTL Kera Sakti Silvestre Sufa katak, Organizasaun nia responsabilidade mak mosu problema iha ranting ka fatin treinu, no remata treinu fila ba uma, maibé liu ida ne’e, laos responsabilidade organizasaun nian.

Jornalista                   : Ekipa G-News

Editór Testu              : Amito Qonusere Araújo

relavante