G-RTV News (28/04/2021): Primeiru Ministru Taur Matan Ruak Tersa-Feira dadér simu vizita husi luta na’in ba ukun-rasik-an iha frente Diplomata, José Ramos Horta iha nia rezidénsia, Faról, Dili.
Objetivu husi hasoru malu ne’e, atu koalia ‘’husi fuan ba fuan’’ hanesan Timor-oan no luta na’in atu tau hanoin hamutuk hodi apoiu malu iha luta foun hodi hasoru Covid-19.
‘’Ohin hau mai vizita ho PM, hodi koalia assuntu ida importante liu konabá Covid-19, ne’ebé aumenta ba bebeik tamba sosiedade ladun kumpri desijaun ne’ebé guvernu halo, liu-liu mosu Covid-19 tamba movimentasaun ilegál iha fronteira terrestre ho indonézia’’ fo sai Eis-PM José Ramos-Horta bainhira remata hasoru malu ho atuál PM Taur (27/04).
Diplomata senior ne’e deklara mós, sei apoiu guvernu konabá fornesimentu astrazaneka barak liu mai Timor Leste.
‘’Ha’u mós koalia ho PM, oinsá atu hetan fornesimentu vasina barak liu mai Timor Leste iha tempu badak, nune’e ha’u husu Primeiru Ministru halo kontaktu offisiál, hafoin ha’u ajuda husi kotuk’’. Espressa Diplomata Senior ne’e.
Konabá vasinasaun, Premiadu Nobel ba Paz fo esperansa katak Astrazaneka liu husi sistema COVAX mak diá’k liu ba Timor Leste no husu atu labele kahur barak.
‘’Konabá vasina, Astrazaneka liu husi sistema COVAX mak di’ák liu ba TL, lalika kahur ho vasina oi-oin tamba astrazaneka prodúz husi kompañia Englaterra, suíza no universidade oxford, rezultadu efikaz duni’’. Fo sai Premiadu Nobel Ba Paz.
Antes hakat mai hasoru ema númeru ida iha VIII Guvernu, Eis-Primeiru Ministru informa katak ne’e iha ona kontaktu ho kompañia, sientísta no nasaun balun atu estuda vasina ne’ebé oras ne’e Timor Leste utiliza molok hatama barak liu mai Timor.
Jornaslita : Julio Paixão.
Editót: Arménio.
