banner 728x90

Membru PSHT lori fatuk, besi kanu, no fiska ataka uma komunidade

banner 120x600
13 Views

G-NEWS (DILI) – Liuhosi Konferénsia Imprensa, Kinta-Feira (11052023) semana ne’e, komunidade Aldeia Rai-Na’in Suku Bairro-Pite Postu Dom-Aleixo Dili, kondena makaas aktus kriminál hosi membru Organizasaun Persaudaraan Setia Hati Terate (PSHT) ne’ebé halo rahun uma komunidade, iha tuku-7 kalan óras Timor Leste.

Reprejentante Komunidade vítima Bobiana Soares konta kronolójia akontesimentu ne’e.

banner 325x300

“Konferénsia imprensa kontra membru arte marsiais ne’ebé halo rahun komunidade nia uma no loja iha loron 10 fulan maiu, kuaze tuku 7 atu ba tuku 8. Iha konvoiu motor besik atus rua la uza kapasete, hatais farda Organizasaun PSHT ho kareta balun tun mai hosi diresaun PU Fatumeta nian ba diresaun loja Supermerkadu”, Nia haktuir.

Iha altura ne’ebá, komunidade sente Partidu polítiku sira mak halo konvoiu hafoin remata kampanha eleitóral, maibé hanoin ne’e sala.

“Ami komunidade hanoin karik Partidu ruma mak liu, maibé derepente tarutu, hakilar, halo komunidade hakfodak. Grupu ne’e kontinua tuda komunidade nia uma, kios, tuda labarik no feto sira, hamrik tan sasan estraga meja, faan modo, has iha meja leten, rahun hotu. Ema nia uma vidru rahun, labarik balun kanek, no joven balun kanek”, Bobiana Konta tuir.

Tuir komunidade katak, momentu akontesimentu, joven sira la iha, iha de’it feto ho labarik sira iha uma laran, no ikus mai uma, kios, faan sasan fatin mak sai vítima. Alende ne’e labarik balu hetan kanek tanba hetan tuda ho fatuk.

“Grupu ne’ebé hatais farda PSHT, sira liu lori kedas fatuk, besi kanu, fiska no la tau kapassete tan, tanba ne’e ami povu Aileba kondena makaas aktus krime ne’e hodi husu ba Polisia no F-FDTL atu tau matan ba grupu ida ne’e hodi identifika no konsidera tanba ami povu presiza hakmatek”, Nia haktuir tán.

Komunidade sira mós admira katak, ema barak ho movimentu maibé la uza kapassete, no Polísia la tahan no husik liu deit, no komunidade triste tanba hafoin akontese suspeitu halai hosi tiha hosi aktus kriminál ne’e.

“Iha patrulla hosi Polísia BOP to’o iha fatin, maibé to’o fatin BOP sira la duni suspeitu maibé Polísia hosi BOP COP A ne’ebé Komandante bain-bain bolu Nandu baku fali vítima sira”, Bobiana konta tuir.

Iha fatin hanesan, Xefe Aldeia Rai Na’in Suku Bairro-Pite Carlos Ribeiro lamenta ho akontesimentu ne’e.

“Asaun ne’e asaun la diak depous estrada ne’e públiku. Ha’u mai mak Komunidae sira aprezenta Ha’u hakfodak”, Nia lamenta.

Autoridade komunitáriu la simu ho aktus ne’e, no konsidera suspeitu sira hakarak atu estraga nasaun ne’e.

Jornalista     : Ekipa G-News
Editór Testu : Amito Qonusere Araújo

relavante