banner 728x90

Narrativa kona-ba Elementu F-FDTL halimar TikTok “maibé ho étika”

Tanba halimar TikTok demais, kuandu tun ba terrenu, labarik Joven sira goja halimar, ita nia maun Forsa sira gosta mak purada de’it, dehan fali labarik sira mak sala, la iha étika, mais asaun ne’e hahú primeiru hosi ita nia TikTokers sira

banner 120x600
21 Views

G-NEWS (DILI) – Relasiona ho deklarasaun hosi Tenente Forsas Armadas Lourenço José Cabral kona-ba membru Forsa F-FDTL ne’ebé uza atributu militár hodi halimar aplikasaun TikTok, ne’ebé sai viral tiha iha sosiál mídia hamosu pro no kontra hosi utentes sira. Iha mumentun ne’e kedan, G-News hetan kontaktu hosi joven sira atu sira fó sira nia deklarasaun no opiniaun nu’udar sidadaun ida, kona-ba deklarasaun refere. Nune’e G-News halo kedan entrevista. Iha sira nia deklarasaun, sira aseita hanoin hosi Tenente Lourenço katak, membru Forsas Armada labele uza atributu hodi halimar TikTok. Iha Sorin seluk, joven balun apoiu atu elementu militár sira halimar TikTok nu’udar divertimentu ida, maibé tenke ho étika.

Tuir mai, akompaña narrativa hosi Joven sira kona-ba assuntu ne’e.

banner 325x300

João Cabral, hela iha Tasitolu, Dili (Segunda-Feira, 21082023)

“Ba ha’u, Ha’u la aseita ita nia membru forsas Armadas halimar demais TikTok. Ita bele dehan atu halo kontente án maibé tenke respeita Instituisaun. Ne’e forsa armadas, dalaruma Ha’u ko’alia ne’e barak la aseita, maibé membru sira tenke hatudu án nu’udar ajente militár ne’ebé professional. Tanba sá mak ha’u dehan nune’e, katak kuandu ita nia forsa sira ba halo operasaun, daruma alin joven sira goja sira dehan, mana TikTok, ne’e ka goja. Ita bele halimar mais haree situasaun. Sira ba halo operasaun mak falla, ema ko’alia oi-oin, ohh loron kalan mak han toba, halimar tiktok, kuandu servisu rejultadu la iha, ne’e ka instituisaun mak moe, ida ne’e mak Ha’u nia hanoin”.

Marcelina Soares, hela iha Fatuhada, Dili (Domingu, 20082023)

“Nu’udar feto ida, ha’u apoiu maluk feto sira iha Forsa laran halimar TikTok, maibé di’ak liu ita prevene, tanba ita hotu akompaña, utilizasaun TikTok bebeik ona, ninia konsekuênsia tenke la di’ak. Di’ak liu ne’e ita prevene, duke akontese buat ne’ebé ita la espera mak foin arepende, baku rentos mais buat hotu liu ona”.

Orlando Pereira, hela iha Bairro-Pite (Domingu, 20082023)

“Ha’u la apoiu ita nia maluk sira hosi Forsa Armada halimar TikTok, tanba Timoroan sira nia hanoin ne’e orsida buat oi-oin. Tanba halimar TikTok demais, kuandu tun ba terrenu, labarik Joven sira goja halimar, ita nia maun Forsa sira gosta mak purada de’it, dehan fali labarik sira mak sala, la iha étika, mais asaun ne’e hahú primeiru hosi ita nia TikTokers sira, tanba ne’e mak tenke kuidadu, se lae ita rasik mak kria buat la di’ak pois ikus mai dehan joven sira mak la iha étika. Di’ak liu Xefe Estadu Maiór Jenerál Forsas Armadas tenke hatun orden ida nune’e elementu sira ne’ebé gosta halimar TikTok iha sosiál mídia, se lae loron ikus sira mak sei estraga imajen instituisaun F-FDTL nia naran iha públiku”.

Ermundo Costa Ximenes, hela iha Becora, Segunda-Feira (21082023)

“Ba ha’u ne’e buat ne’e normal, maibé membru F-FDTL sira ne’ebé halimar TikTok ne’e tenke ho étika. Buat ida durante ne’e ita hotu akompaña mak sira halimar tiha TikTok, pois hasai fali nanal, ne’e sá étika mak ida ne’e. Tuir loloos sira mak hatudu disiplina ba sidadaun sira. Ita nia alin feto-mane sira ne’ebé halimar TikTok to’o haluhan án iha sosiál mídia to’o ema ko’alia sira nia privasidade, ne’e tanba sá, ne’e tanba ita hotu fó apoiu, dehan demokrasia, mais ikus mai la di’ak, ita hotu julga, temi to’o sira nia inan-aman ka família mak dehan la eduka. Tanba ne’e mak ita nia mana forsa FDTL sira ne’ebé halimar TikTok to’o hasai nanal, kleuk tiha sira nia ibun, di’ak liu sira nia Komandante sira tenke fó atensaun ba sira atu labele halo tán, se lae loron ikus bele estragga, dalaruma estress, bele halo buat arbiru ho farad militár, ne’e mak foin rame iha ne’e, ne’e joven sira bain-bain dehan “Meledak”.

Maria Josefina Soares, hela iha Becora, Segunda-Feira (21082023)

“Ha’u hakarak husu ba ita nia maluk forsa F-FDTL sira katak, kuandu halimar TikTok ne’e di’ak, maibé tenke ho disiplina, ne’e mak importante. Ha’u nia hanoin TikTok ne’e atu halo kontente án, maibé ita kuandu la kontrola án, ita halo buat arbiru, ema hateten saida ba ita. Sá-tan dehan lutu ba nasaun, ne’e orsida ema barak dehan Forsa TikTok. Nu’uda feto ida, ha’u apoiu maluk feto sira iha Forsa laran ne’ebé halimar TikTok, maibé tenke uza ho disiplina, tanba agora modern, ema bele edit tun edit sa’e, kuandu la gosta ida, entaun sira uza ida ne’e hodi estraga ita, dalaruma edit ita nia foto ba (….deskulpa mais hasai tiha ita nia ulun, tau fali bai sin seluk ne’ebé la hatais ropa…) ne’e ita la nota, tanba ne’e maki ta tenke atensaun ba ida ne’e”.

Ida ne’e mak narrativa hosi ita nia sidadaun sira kona-ba elementu forsa armada sira ne’ebé uza atrbitu militár nian hodi halimar TikTok iha sosiál mídia.

Jornalista       : Ekipa G-News

Editór Testu : Amito Qonusere Araújo

relavante