banner 728x90

PAM Dili tenke hasai obrigatóriu faan sasan iha estrada Delta

banner 120x600

G-NEWS (DILI) – Atividade negósiu iha area Elemloi, Delta Dili, Diresaun ba Merkadu Manleuana ne’ebé sempre akontese iha lorokraik, to’o tuku 10 kalan, sempre hamosu engrafamentu iha rotunda Elemloi nian.

Situasaun ne’e akontese, tanba atividade negósiu ne’ebé akontese iha loja Xina nia oin iha Elemloi, Delta ka faan sasan iha estrada públiku.

banner 325x300

Nune’e iha Kinta-Feira (16032023), Motorista ida Camilo Martins, ne’ebé konduz motorizada sente triste ho engrafamentu ne’ebé sempre akontese iha tempu lorokraik to’o kalan. Tuir loloos Prezidente Autoridade Munisípiu Dili tenke sériu atu foti medidas ruma, tanba fatin ba atividade negósiu, Governu prepara hotu ona.

“Merkadu Manleu iha, tanba sá mak la ba hala’o atividade negósiu iha ne’ebá. Maibé ita labele fó sala ba sira, tanba ne’e kompeténsia hosi Autoridade Munisípal Dili, atu foti desizaun rígor. Se lae, loraik-loraik ita atu ba fatin ruma liuhosi fatin ne’e, susar loos, tanba macet par mate”, tenik Nia.

Nia aumenta tan, governu tenke uza kompeténsia hodi hasai obrigatóriu atividade negósiu iha estrada públiku, nune’e evita engrafamentu iha lorokraik.

Taxista ida Lourenço Xavier dehan, área ne’e sempre mosu engrafamentu tanba atividade negósiu ho espasu ki’ik.

“Ha’u husu ba Autoridade Munisípal Dili atu foti desizaun ruma, se lae kada loraik, ita liuhosi ne’e, sempre macet. Ida ne’e kan responsábilidade hosi seguransa ninian. Labele haree deit, nonok pois povu mak sai fali vítima ba desizaun sira ne’e. Ha’u sente triste ba ida ne’e”, haktuir Nia.

To’o informasaun ne’e fó sai, relasiona ho atividade faan sasan iha estrada públiku iha area Elemloi, besik rotunda Delta nian, G-News seidauk halo konfirmasaun ho Prezidente Autoridade Munisípiu Dili.

Jornalista     : Ekipa G-News

Editór Testu  : Amito Qonusere Araújo

 

relavante