banner 728x90

Pe. Martinho Gusmão Prontu Kandidata-án Ba PR, Oinsá ho vida Amu-Lulik?

Eis-Padre no Kandidatu Prezidente Repúblika 2022-2027, Martinho Germano Da Silva Gusmão // Foto : Média Gabinete PR.
banner 120x600
43 Views

Entrevista Eskluzivu ho Pe. Dr. Martinho G. da Silva Gusmão  (Parte I).

“Hodi Povo, ho Povo, iha Povo nia le’et, Timor bele manan”

banner 325x300

 

Besik ona bá eleisaun prezidensiál 2022-2027, Timor-oan lubuk ida nia naran hahu mosu sai mai atu konkorre bá kadunan Prezidente Repúblika (RDTL-1) 2022-2027.. Ema temi mak Kay Rala Xanana Gusmão (CNRT); Dr. José Ramos-Horta (Líder nasionál); Tenente Jenerál Lere Anan Timur; Dr. José Luis Guterres (Frente Mudança); Dr. Avelino Coelho (PST); Dra. Armanda Berta (KHUNTO); ho Virgílio Guterres (Independente); Dr. AntónioKalohan (PD); Adriano do Nascimento (PD); Constancio Pinto (PD) ho António Benevides (Deputadu PUDD). Husi lian anin barak ona mak temi Padre (Pe.) Martinho G. da Silva nia naran tama iha bursa kandidatura ba RDTL-1.

 

Ho razaun ne’e, jornalista G-RTV.com iha kurriosidade hakarak ajuda leitór sira hodi hatene, tambá sá, Padre eh Nain Lulik (Sacedote/sacerdotal) ida hakarak kandidata-an ba Prezidente Repúblika (PR)?, maibé molok leitór sira hakat bá pergunta sira relasiona ho entrevista eskluzivu ho Pe. Martinho Gusmão konabá nia kandidatura ba PR tinan 2022-2027, G-RTV.com lori uluk maluk leitór sira hodi hatene lai se mak Pe. Martinho ho nia estudu sira?.

 

Pe. Martinho, Moris iha Baukau, loron 22 fulan Maio Tinan 1968, nia hahu eskola primaria iha Salesiano sira nia missão iha Baucau (1974-1985). Tama iha SMA (ensinu Sekundáriu) Semináriu San Dominggo Hokeng, Flores (1985-1989). Alunus husi Sekolah Tinggi Filsafat dan Teologi Widya Sasana, Malang Indonesia(1998) ho Pontificia Universidade Gregoriana Roma, Italia (2005); nia mos hasai kursu dalen Italiano husi Istituto Dante Alghieri ho Colegio Pio Brasiliano iha Roma (2001); kursu dalen francês iha Institut pour la Langue etCulture husi Universidade Catolica, Paris, França (2002); hasai kursu English Language and Literature iha Oxford University (2003); nu’udár akadémiku no ativista, nia tuir mos kursu konabá Religions and Political Pluralism iha University of California (Santa Barbara) hamutuk ho Department of State(Washington-Amérika)), halo study tour ba Georgia State University iha (Atlanta) Mormonism Center iha SaltLake City (2016). Ordenadu hanesan Padre iha loron 8 fulan Setembru tinan 1998.

 

Hahu 2006, nia hanorin ética geral, filozofia polítika, filosofia de linguagem (hermenêutica ho retórika) no ateísmo contemporâneo iha Seminário Maio S. Pedro e S. Paulo tutan ba Instituto Superior de Filosofia e de Teologia (ISFIT) Dom Jaime Garcia Goulart, Fatumeta, Dili; hanorin mos teoria diplomacia iha UNPAZ (2005-2007) no teoria geral da politica iha UNTL (2006-2007); hanorin mos ética e cidadania, filosofia da educação ho sociologia da educação iha Instituto Católico para Formação dos Professores (ICFP), Baucau (2006-2008).

 

Uluk sei estudante universitáriu, nia hakerek artigu sira iha media Kompas, Mingguan Hidup, Surya ho Suara Timor-Timur (Indonézia); ohin loron nia hakerek barak iha Timor Post, Suara Timor Lorosae, Diario Nacional, Independente, Seara, Oasis, Fini ho media online balun (hakerek ho dalen Indonézia, Tetun, Ingles ho Português; balun traduz iha Japones ho Frances); publika livru sira iha filozofia, polítika no teolozia hamutuk 12; nia sai mos orador ka panelista no moderadór iha seminário/ conferénsia lubuk ida iha nível nasionál ho internasionál, hanesan iha Darwin, Denpasar, Geneva, Jakarta, Manila, Oslo, Paris, Perth, Santa Barbara (California), Seoul, Singapura, Stockholm, Tokyo, Ulaan Batar (Mongolia) Waitangi (New Zealand) hoYogyakarta. Iha 2007-2013, nia hola knar nu’udár Komissáriu (reprezenta Igreja Católika) iha Comissão Nacional de Eleições (CNE), iha ne’e mos nia hakerek livru 5; paper 7 ho artigo 39 konabá sistema no prosessu eleitoral iha Timor-Leste (Kompara ho CPLP). Amu Martinho hatene ko’alia Makasae, Uaimaa, Midiki ho Kairui (rona no hatene Naueti); hatene ko’alia dalen moderna sira hanesan Inglês, Italiano, Português no Indonézia, nia mos bele rona no hatene Francês ho Espanhol.

 

Husi introdusaun ne’e, lori ita hatene se mak Pe. Martinho hanesan ema Nai-Lulik ida (sacerdote) ida, tuir mai ami aprezenta pergunta no resposta konabá Pe. Martinho nia kandidatura bá PR períodu 2022-2027 liu husi Entrevista eskluzivu Jornalista G-RTV.com ho Pe. Martinho.

 


 

 

Matak malirin, Amu. Iha sosiedade Timor-Leste nia laran, ema barak temi Amu nia naran atu sai Kandidatu ba PR 2022-2027! Amu sente oinsa?

 

Los! Kleur ona ema ko’alia nune’e. Hau fiar katak “Voxpopoli vox Dei” – populasaun nia lian ne’e Maromak nia Futar-Lia. Hau bele deit dehan “Gratia sagimus tibi, Domine” (Kmanek wain ba Ita, Na’i”. Uluk kedas, maluk lubuk ida husi RENETIL no PD mak lori mina ho ai-kose atu sunu hau sai kandidatu ba PR, ou Ministru ka Deputadu. Partidu Fretilin dehan bebeik, “kolu tiha batina mak halo polítika”. Iha 2016 Prezidente Repúblika Jenerál Taur Matan Ruak mak husu atu hau sai kandidatu bá PR, maibe hau la iha hanoin liu ba ida ne’e. Iha 2020, wainhira mosu golpe de Estado nebe halao husi Partido Fretilin, KHUNTO no PLP, hau hahu sente ulun halai ona. Satan wainhira iha 20/Maio/2020, PR Lu-Olo halo diskursu estadu hau sente chocado (terguncang-lian Indonézia) los. Iha loron 20 fulan Maio tinan 2002, Dr. Lú-Olo hamutuk ho Dr. Mari Alkatiri solenemente deklara konstituisaun  RDTL (KRDTL) tama iha vigor; agora, sira rua mak halo derrota KRDTL. Husi loron ne’e ba oin, hau sente vontade bo’ot tebes atu halo netik buat ruma ba Timor-Leste. La hatene los saída, maibé ha’u hanoin ha’u la bele ona ko’alia de’it, hakerek deit …

 

Maibé oinsa mak Amu bele to’o iha desijaun  ne’ebé brani tebes hanesan agora ne’e?

 

Molok mosu trazédia 20.05.2020 ne’e, partido PUDD mak husu no hato’o sira nia prontidaun atu lori ha’u ba Palásio Ai-Tarak Laran. Ha’u simu, maibé laran rua-rua hela. Partidu PD bolu ha’u partisipa iha reflesaun hamutuk iha Maliana, ha’u koalia ho Koordenador munisípiu sira, maibé sei namlele hela. Iha loron 13 fulan Outubro tinan 2020, CNRT konvida ha’u atu tuir “tour” ba Mehara (Munisípiu Lautém). Iha loron tuir mai, Xanana ko’alia konabá ninia istória iha reorganizasaun luta ba liberrtasaun nasionál, 1979. Iha momentu ida, Xanana lori “kakalafai” Ramos Horta bá fatin ne’ebé uluk iha 1982, Liurai Miguel dos Santos ho Padre Afonso Maria Nacher,SDB, no Padre Luigi Parreto,SDB planea ba Mgr. Martinho da Costa Lopes hodi hasoru malu. Ferik faluk dona Domingas Fernandes (Liurai Miguel nia kaben) kaer ha’u nia liman lori tama ba uma ne’e.

 

Ida ne’e hanesan momentu místico ida, maibe mos existencial tebes. Agora mak ha’u hatene lolos no momos kedas, katak teoria “desmistificação” ne’eba ema ne’ebé hun ho abut la iha Timor mak bele ko’alia, maske namlele hanesan ai-lele. Hanesan ne’e … wainhira Xanana haktuir saída mak mosu iha tempu ne’ebá, ha’u sente isin-fulun hamriik no matan manas los atu tanis. Ha’u sente hanesan hare thriller filme Enemiesatthe Gates, hare drama boot oinsa líder nasionál Xanana ho Raja Miguel (iha film karik Vassili ho Danilov) halai hasoru ameansa perigoza bo’ot ida: sira joga Povo Timor nia destinu no Nasaun tomak nia moris iha injury time nia laran. Kois dala ida, “kaka lafai” ne’e lafaek han mohu kedas. Iha tempu ne’ebá, cerco e aniquilamento ne’e metin no todan tebes. Injury time ne’e tan Amu Martinho Lopes no Amu Afonso labele kleur iha Mehara. Ho minutu oituan ne’ebé iha, Xanana ho Liurai taru sira nia kakorok, la iha kilat la iha bala hodi loke serku, atu teri netik Bispo ho Padre nia dalan hodi entrega dokumentu konabá Paz, ho esperansa atu hatama iha “batina nia bolsu”, lori destinu tomak Povo Timor nian atu mundu hatene. Liurai nia kaben, feto jovem Domingas involve iha drama ne’ebé perigu tebes. Ha’u imajina, oinsa mak destinu rai ida nian, moris povo ida nian depende ba ema na’in 5 deit. Kois dala ida, Timor tomak namtate! Iha film ne’e hatudu duni Batle for Stalingrad hanesan funu ideológika entre Nazismo hasoru Marxismo, nune’e mos bele dehan iha Timor hahu a paz iguamento (pendamain) ideológico, wainhira Comunismo rende ka foti liman ba Catolicismo. Hodi sadere-a’an ba catolicismo, ha’u hare oin sa mak Xanana lori comunismo tama ba limbo, husik FRETILIN moris rasik nu’udár partidu maibé hasai FALINTIL husi partidu no sai liman kroat ka lutu matan Povu nian. Xanana mak hatur novo paradigma ne’ebé hanaran novo nacionalismo. Iha ne’e la’ós ona partidu mak luta, maibé Povo  ne’ebé hetan hikas sira nia hun no abut, mahan no tatis iha Uma Kreda ho Uma Lulik.

 

Husi Mehara, ha’u halo voto ida – se Amo Martinho Lopes bele husik nia pozisaun saída de’it, maibé nia la husik Timor monu lakon iha akudesan laran, nune’e mos, Amu Martinho Gusmão brani foti risku atu tane metin rai-doben ida ne’e, keta monu rahun no lakon iha akudesan laran. Fila husiMehara, ha’u hasoru fali PUDD no dehan ba sira, uluk susar no todan hanesan ne’e Povu ki’ik no kbi’it laek brani foti oin hasoru pressaun husi militar Indonézia, tansa mak ho Partidu ki’ik ida hau la bele foti hirus matan? Ha’u brani! Loronsa’e husiTutuala ba to’o Oe-Cusse! Ha’u ho PUDD ne’e hanesan “David” deit, kiik no foinsa’e, maibe bele hatan ba polítika “Golias” sira nian …

 

PUDD de’it la to’o, Amu. Oinsa mak Amu sukat suporta bá kandidatura ne’e? Se mak sei apoia ita iha prossesu administração eleitoral ne’e?

 

Ha’u ba nu’udár kandidatu “independente”. La iha partidu. Ha’u hare duni katak Partido Fretilin, CNRT, PLP, KHUNTO, PD. PUDD. FM no UDT tetu ba tetu mai, sura tun sura sa’e hodi hamosu opsaun rasik. Partidu hanesan Fretilin, CNRT ho PD lori kandidatu rua ka tolu. KHUNTO hatudu ona Armanda Berta; PUDD dehan atu halo esforsu tomak ba ha’u nia alkansa. Maski nune’e, ha’u nia naran hatur iha sira hotu nia meja leten; iha sira nia lista laran. Ne’e duni, partidu ida-idak iha sira nia “opsaun” ba sira quadro dirigente rasik; maibé ha’u sai nafatin sira hotu nia “alternativa”. Ha’u bele de’it dehan katak too agora CNRT, PD ho PUDD mak temi ha’u nia naran ho sériu. Partidu 3 ne’e hakarak atu salva no restaura Estado Timor-Leste hodi tau preferênsia ba kandidatu independente. Chefe de Estado labele mai de’it husi partidu.

Maibé, ema hatene hela katak Amu rasik no Amu ida-rua tan mak sai hanesan Fundadór Partidu Demokrátiku (PD) nian; ne’e laos segredo ona…?

 

Ida mos mak ne’e … hehehe. Uluk partido ida joga maka’as lori ha’u ba Tribunál mos ‘’deskonfia’’ katak ha’u hetan ajudu husi dirizente PD hodi hala’o kna’ar Igreja nian. Maibé, PD la’ós ha’u nia kusta ka propriedade. Polítiku balun nian aat mak ne’e, sai “fundador” hanoin katak sira mos sai “proprietário”. Política labele la’o hanesanne’e. Lae! Ba ha’u, ha’u sente honradu tebes wainhira PD temi hau nia naran nu’udár fundadór, satan apoiu ha’u nudar kandidatu RDTL-1 ne’e privilézio bo’ot tebes. Husi biban seluk, PD ne’e kaer metin “cultura democrática” nu’udár ninia filozofia bázoka. Ha’u ko’alia fila ba fila mai ida ne’e ba sira, no ikus liu iha Maliana, 2020. Ne’e duni, wainhira sira lori kandidatu seluk, ne’e mos lezítimu. Importante, kandidatu se de’it mak ba, PD hatene-an didiak ona saída mak KRDTL dehan “democraticamente eleitas são as suas bases inquestionável”. Diak hela, PD ha’u mak “urus” nia …

 

Agora, problema ne’ebé kalsu hela prosessu ne’e, Estatutu nu’udár “Amu Lulik/Padre”. Oinsa ita rezolve ida ne’e?

 

Los duni, iha Código de Direito Canónico (CDC), cân.285, §3 koalia konabá “Os clérigos estão proibidos de assumir cargos públicos que importem a participação no exercício do poder civil”. Liafuan chave mak “proibidos” ho “poder civil” – bahasa Indonézia dehan “Para klerikus dilarang menerima jabatan-jabatan publik yang membawa-serta partisipasi dalam pelaksanaan kuasa sipil”. Hare didiak, CDC la bandu padre sira halo política, maibe padre sira labele hadau poder civil. Ne’eduni, bele halo polítika maibé padre labele tama klaran hadau kadeira arbiru atu ukun mangame.Iha ninia regra no dalan rasik.

 

Iha fali cân. 287, §2 hatur katak, “Não tomem parte activa em partidos políticos ou de direcção de associações sindicais, a não ser que, a juízo da autoridade eclesiástica competente, o exija a defesa dos direitos da Igreja ou a promoção do bem comum” – iha tradução lian-Indonézia dehan, “Janganlah mereka turut ambil bagian aktif dalam partai-partai dan kepemimpinan serikat-serikat buruh, kecuali jika menurut penilaian otoritas gerejawi yang berwenanghal itu perlu untuk melindungi hak-hak Gereja atau memajukan kesejahteraan umum”. Liafuan importante mak “a não ser que” –, ka“kecuali jika”! Labele hadau malu “poder civil”, maibe wainhira hasoru ona Povu nia destinu no bem comum, Igreja fo liman no kbi’it tomak atu tulun Povu. Importante mak Povu nia diak.

 

Dalan oinsa? Ha’u ko’alia ho Bispu sira – Dom Basilio, Dom Norberto, Dom Virgilio to’o bispo emérito Dom Carlos Filipe (iha Portugal) konaba Estado de Emergência ne’ebé lori Timor-Leste sei tama ona iha Emergência de Estado nia laran. Bispo sira konkorda atu ha’u ho Amu Domingos Mau-Bere promove Movimento do Patriotismo Constitucional hamutukho eis-seminarista sira no leigo barak! Ha’u tur hakerek no ko’alia barak, balun bolu hau “matandok politica”, balun dehan “harmoko” (hari-hariomongkosong). Ita nia perito iha CDC, saudozo Padre Domingos Sequeira hakerek tese doutorado “Os presbíteros diocesanos e o seu envolvimento na política: proibição e excepção”, iha Pontificia Universidade Gregoriana Roma, 2004. Nia hetan voto suma cum laude. Nia halo estudos klean no naruk konaba saída no oinsa mak “bele halo polítika” ka “labele halo polítika”. Iha Roma, ha’u estuda hamutuk ho Amu Sequeira iha Universidade ida maibe fakuldade la hanesan. Wainhirania halo pesquisa no hakerek teze doutorado, ha’u mos hare no le ninia draft. Ha’u aproveita estuda gratuita. Amu Domingos mos hakerek draft konkordata, 2015 nian. Nia konta buat lubuk ida ba ha’u. Ne’e duni, hau hatene saída mak “proibição” (larangan), saída mak “excepção” (kecualian) …

Interesante … se Bispu Baukau la simu padre nia rezignasaun! Saida mak Amu bele halo?

‘’…los duni, Bispu Baukau no nia mesak de’it mak halo prosessu ne’e hamutuk ho ha’u. La iha ema seluk! Iha 2016 ha’u husu ba Bispu’’…….

….. Akompaña nafatin Entrevista ida ne’e iha parte da-ruak nian iha loron balun tuir mai….

 

Jornalista : Arménio.

Editór : Ekipa G-RTV.com.

relavante