banner 728x90

Polísia tarde halo operasaun tiru fugetes

Imajen: Supply
banner 120x600
41 Views

G-NEWS (DILI) – Hafoin autoridade seguransa no defeza hamutuk ho autoridade munisípiu Dili, alerta ba públiku atu halo operasaun konjunta ba fugetes ne’ebé tiru hosi sidadaun sira iha tempu, âmbitu Festa Natal 2023 no tinan foun 2024.

Tuir observasaun, sidadaun sira kontinua tiru fugetes maske Komandu-Jerál PNTL no Instituisaun F-FDTL sei halo operasaun konjunta espesial ida.

banner 325x300

Tuir sidadaun ida Calisto Mendonça, ne’ebé G-News hasoru iha nia rezidénsia Aimutin. Kuarta-feira (27122023) kalan hateten, susar atu autoridade seguransa kontrola atividade tiru fugetes iha tempu kalan.

“Maun, Ha’u hanoin ne’e susar atu kontrola. Ha’u dehan susar tanba ita nia Polísia tarde ona. Antes ne’e iha ne’ebé mak labele halo operasaun, tamas ai loja sira, agora balun tiru to’o kona ema, kanek, pois mak halo operasaun, ne’e susar oituan”, Calisto haktuir ba G-News, iha estrada aimutin, Dili.

“Tuir loloos, iha fulan outubru ka Novembru, Komandu-Jerál PNTL hamutuk ho Forsa sira, tenke alerta ona, nune’e ema tauk. Ema sira ne’ebé halo bisnis mós tauk atu faan. Agora hela de’it loron hira atu tama tinan foun mak bandu. Timor ne’e ita koñese malu, kuandu operasaun iha, sira subar tiha, Polísia sira liu tiha, tiru fali. Buat ne’e halo barullu liu, halo labarik sira toba kalan mós la di’ak tanba tarutu dala ida, hanesan ema tiru kilat, ita hakfodak, satan labarik sira ne’ebé sei ki’ik”, nia esplika.

Iha parte seluk Mariana de Jesus, tinan 68, hekla iha Tasitolu Dili, informa ba G-News katak, ho tiru fugetes hanesan aktus ida ne’ebé hatauk komunidade sira ne’ebé hela iha bairru laran, liu-liu labarik sira ne’ebé tinan zero to’o tinan 8.

Tanba ne’e, nia husu ba Polísia atu tau atensaun másimu kona-ba ne’e.

“Ita husu ba Polísia buka labarik sira ne’ebé sunu buat ida lian-lian iha kalan, halo ita kalan toba la dukur, halo bei-oan sira mós toba la dukur, sira hakfodak. Sira sunu ne’e hanesan ema tiru kilat”, nia haktuir. 

Iha parte seluk, Caetano Soares, kuarta-feira (27122023) kalan ne’e, inform aba G-News iha Delta hateten, autoridade seguransa tarde ona atu kontrola atividade tiru fugetes iha tempu kalan.

“Ita nia Polísia tarde ona atu halo operasaun. Kalan-kalan joven sira tiru hela de’it, foin mak ita hakfodak ne’e, ha’u hanoin ne’e susar maun, maibé ita espera sira nia operasaun ne’e susesu, tanba antes no depois Natal kalan, ita haree Dili ne’e lian kintu-kantu”, Caetano esplika.

“Ita haree, ita nia sidadaun sira, joven sira mós atu koko Polísia sira nia tensaun karik, tanba labarik ne’e mós la tauk ne’e, ema aviza ona dehan sei halo operasaun espesial ba tiru fugetes, maibé sira hakarak tiru nafatin, ne’e signifika katak, sira koko Polísia sira nia tensaun, maibé kaer toman fali mós, ita ut kedan”, Caetano ko’alia ho hamnasa.

Komunidade sira ne’e husu ba autoridade seguransa atu tama sai bairro hodi halo passa revista ba sidadaun sira ne’ebé tur iha estrada públiku, nune’e kontinua atu evita tiru fugetes.

Jornalista            : Ekipa G-News

Editór Testu         : Amito Qonusere Araújo

relavante