banner 728x90

Polísia UPM Ataúro salva Indonéziu na’in-15 mout ho Ro KM. Artomoro II

banner 120x600
66 Views

G-NEWS (ATAÚRO) — Komandu Polísia Marítima Atauro salva sidadaun Indonézia na’in-16 ne’ebé mout ho ró ho identidade KM. Artomoro II, iha loron 02 fulan-Jullu tinan ne’e entre fronteira tasi Timor parte Ataúro ho illa Liran, Indonézia nian.

Tuir kronolójia hosi kapitaun Suhardi ró ne’e katak, sira nia viajen ne’e hosi diresaun Surabaya, Indonézia atu ba Papua, maibé viajen ne’e la to’o fatin destinasaun tanba hetan dezastre iha tasi klaran.

banner 325x300

“Viajen, ami hahú hosi Surabaya ( Indonézia) atu ba Papua ( Indonézia), mai to’o iha dalan klaran ami hetan dezastre. Ami na’in 16, hela ida mak seidauk hetan. Ami iha ne’e nain 15 ona”, tenik Suhardi.

Vítima hirak ne’e salva-an ho “boia salva vida” no na’in-11 mosu iha Beloi, no na’in-3 seluk mosu fali iha Varuana.

Polísia Unidade Marítima (UPM) postu Ataúro evakua ona sidadaun Indonézia hirak ne’e ba iha postu Polísia Marítima Atauro, no ohin dáder, hahú iha tuku 06:00, UPM Ataúro kontinua buka tuir na’in ida ho tinan 60-resin ne’ebé seidauk hetan iha tasi-laran.

Oras ne’e iha Illa Atauro, laloran bo’ot, no tuir observasaun G-NEWS katak, difísil ba Polísia Marítima-PNTL atu buka tuir.

Tuir informasaun ne’ebé G-NEWS asesu katak, Ro ne’e Ro Kargu ne’ebé lori Matérial konstrusaun ho todan 1050 toneladas, ho kór azul.

Ro KM. Artomoro II dezasatre iha tuku 11.30 otl, tula material hanesan alkatraun bidon, simente, profile/tanke bee, batako mutin, ai-riin enerjia nian, no material elektróniku hanesan rádiu, televizaun, dispenser no sasan seluk-tán.

“Iha oras maizumenus 11.00, loron tersa-feira (02072024). Ro ho naran KM. ARTOMORO II, sai hosi Surabaya ho objetivu ba Papua, lori sasan/material konstrusaun, maibé to’o iha barat Liran, aninn no tasi boot, halo ro halis ba liman loos, tanba tula sasan todan liu, mak ro refere baku fila, hodi rejulta sira nani fahe malu hodi mai iha Ataúro”, tuir relatóriu ne’ebé G-NEWS asesu hosi fontes konfiável, kuarta-feira (03072024).

Entretantu, Prezidénsia Repúblika liuhosi assesoria Apoiu Sosiál fó mos apoiu urjente hanesan ropa no sandalla ba vítima sira, no hetan mos assisténsia husi PNTL Ataúro inklui protesaun sivíl Ataúro.

Editór Testu: Amito Qonusere Araújo

relavante