banner 728x90

Razaun Natercia bolu joven labele envolve krime !

banner 120x600
6 Views

G-NEWS (DILI) – Komandu Polísia Munisípiu Dili husu joven sira atu evita envolve iha krime públiku, tanba autoridáde seguransa sei aplika rígor tuir lei ne’ebé iha.

Komandante Polísia Munisípiu Dili Superintendente Xefe Naterçia Martins, ba G-News Sexta-Feira (07042023) husu ba sidadaun hotu, mesmu chateado hela assuntu ka interesse ruma, bainhira deside atu halo krime ka halo ona krime ruma, sei simu nia konsekuênsia legál.

banner 325x300

“Konsekuênsia sira ne’ebé sei mosu ba imi nia an maka; Sorte diak, imi sei moris naruk, maibé sei simu konsekuência legál hodi husu imi nia responsabilidáde penal tuir lei penal haruka, hodi lori imi ba hatan iha sela Polícia, Prokuradória no tribunal tanba imi nia aktus Kriminal sira, maibé dala-ruma iha situasaun balun imi sei hasoru risku ba imi nia integridade físika no tenke lori imi halai ba tratamentu iha Óspital”, Naterçia Martins haktuir.

Tuir Superintendente Xefe ne’e katak, sei aplika lei hodi limite direitu no liberdade, no ikus liu sei lori ba hela hakmatek iha prizaun ka kadeia, fatin ne’ebé limite tebes direitu ba sirkulasaun ka movimentu sira hodi halibur hamutuk ho ema sira ne’ebé imi hadomi.

“Sorte at liu mak bainhira ema liman laís liu ba imi ho sasan kro’at ruma kona imi nia mate fatin, pasiência imi muda imi nia hela fatin hodi ba hela iha fatin foun, ne’ebé bain-bain ema dehan ba aldeia lá fila. Fatin ne’ebé sei fahe imi nia hakarak totalmente ho imi nia família. Tanba kuandu autoridade seguransa lá to’o lalais hodi assegura imi nia direitu ba moris, ema ruma liman lais tanba hanoin vítima, bele fo konsekuênsia hanesan ba imi no bele mate ka kanek”, Naterçia afirma tán.

“Tanba ne’e, maun-alin sira, tau didiak iha imi nia neon no hanoin, mesmu chateadu ba assuntu ruma, kolia diak ba malu, se lae buka autoridáde seguransa hodi rezolve. Labele rezolve problema, ho dalan halo fali tan problema ne’ebe belé hamosu aktu kriminal”, Nia hatutan.

“Ne’e duni, tenke hatene an katak iha konflitu ne’ebé rezulta krime, sei lá lori benefísiu diak ba imi, maibé sei halo klót imi nia liberdade hodi goza Ukun rasik-an ne’e, no garante ema hotu atu goza sira nia direitu ho livre. Laos imi fo an atu hetan kanek, mate tan deit interese grupu ne’ebé sei lá responsabiliza imi nia-an no imi nia familia sira”, Superintendente Xefe Naterçia Martins re-afirma tán.

Pior liu, iha períodu eleisaun parlamentar tinan 2023 ne’e, diak liu lalika halo krime, disiplina ba rona polítika sira apresenta sira nia programa iha kampanha, se konvense imi, vota ba sira, se lae vota tuir imi nia konsiênsia.

Iha polítika, polítiku sira halo polítika para hetan poder, simplesmente hadau malu kadeira, kriminozu sira hadau malu mak Óspital, kadeia no kaixaun hodi ba aldeia la fila.

“Hau fiar katak, durante períodu eleisaun parlamentar iha kampanha, to’o loron votasaun 21052023, no apuramentu sira iha sentru votasaun iha Munisípiu ka Nasionál, liu-liu iha munisípiu Dili, ema hotu-hotu, liu-liu Joven, militante, no simpatizante sira partidu konkorrentes sira, sei disiplina no lá halo aktu kriminál. Mai ita hakribi aktu kriminál hodi selebra festa demokrásia ho diak”, Komandante Polísia Dili ne’e hakotu.

Antes ne’e, Segundu Komandante-Jerál PNTL Komisáriu Pedro Belo husu joven sira iha territóriu Nasioná atu kontribui paz no hakmatek, tanba autoridade seguransa sei foti medidas rígor hasoru sidadaun sira ne’ebé perturba ordem públiku, durante prosesu kampanha eleitóral, loron eleisaun, apuramentu nasionál to’o anúnsia rezultadu eleisaun hosi Trinunál.

Jornalista      : Ekipa G-News
Editór Testu  : Amito Qonusere Araújo

relavante