banner 728x90

Sidadaun balun haksoit tama moru protesaun atu trata passaporte

banner 120x600
21 Views

G-NEWS (DILI) – Sidadaun timoroan barak ne’ebé atu trata pasaporte obrigatóriu tenke dudu malu, no balun tenke sae moru protesaun Notariadu nian, iha Mandarin Dili.

Tuir observasaun G-News iha Diresaun Nasionál Rejistu no Notariadu Mandarin, Dili hatudu, sidadaun barak mak mak iha tuku-5 madrugada nune’e iha oportunidade atu tama ba laran.

banner 325x300

Tanba portaun boot DNRN seidauk loke, sidadaun balun liu-liu mane sira, sae moru protesaun hodi haksoit ba laran.

Sidadaun ida, António Cardoso ba G-News, kuarta-feira (22112023) katak, nia parte mai notariadu iha tuku-5 madrugada, tanba nia sente ema barak mak sei dudu malu.

“Ha’u mai iha tuku-5 madrugada, atu trata passaporte. Se ita mai tuku-7 ka tuku-8, ne’e ema barak ona, entaun ita bele adia fali ba aban, nune’e hela de’it, kleur mak ita hetan passaporte”, António haktuir.

Tanba timoroan barak seidauk hetan passaporte hafoin tinan ida ho balun, kaderneta passaporte la iha, iha ne’ebé Governu da-sia, durante loron 120 konsege rejolve problema passaporte ne’ebé Governu da-walu hosik tiha. Nune’e sidadaun sira husu ba DNRN atu loke espasu atendimentu iha fatin seluk iha Dili.

António Cardoso husu ba Ministériu Justisa, atu loke tan prosesu atendimentu iha fatin ketak, tanba ema barak mak sei trata passaporte ho númeru boot.

“Atu labele dudu malu ne’e, di’ak liu Ministériu Justisa loke tán espasu atendimentu iha fatin seluk. Fulan ida hanesan mak normaliza fila-fali mós di’ak. Se nune’e nafatin, dudu malu hela de’it, loron ruma ema bele sama malu to’o mate mak ne’e, ita la hotar mais kondisaun mak halo bele nune’e”, António tenik.

Iha fatin hanesan, Ermenegilda Soares Ramos mós dehan, nia mai iha dadersan sedu nune’e bele tama hodi forma, nune’e to’o meúdia nia bele tama ona ba rejistrasaun.

“Ohin ha’u mai tuku-5 madrugada. Ne’e par forma lalais, tanba ema barak, hadau malu”, nia haktuir ba G-News.

To’o informasaun ne’e fó sai, G-News seidauk hetan komentáriu hosi Diretór Nasionál Rejistu no Notariadu (DNRN).

Jornalista                   : Ekipa G-News

Editór Testu             : Amito Qonusere Araújo

Response (1)

relavante