banner 728x90

Sidadaun sira nia hanoin kona-ba KomJer foun lídera PNTL

banner 120x600

G-NEWS (DILI) – Relasiona ho Desizaun Governu hodi nomeia Komandante-Jerál PNTL foun, hanesan Superintendente Xefe Henrique da Costa, promove ba Komandante-Jerál PNTL hodi troka Komisáriu Polísia Faustino da Costa, no Superintendente Xefe Pedro Belo, promove ba Segundu Komandante-Jerál hodi troka Komisáriu Mateus Fernandes, ba mandatu tinan tolu oin mai.

Tuir mai ita le’e sidadaun no Observádor sira nia hanoin, ne’ebé G-News hala’o entrevista ohin loraik ne’e.

banner 325x300

1. Estudante UNTL Francisco Pinto “Ha’u nia esperansa ba Komandante-Jeral Polísia foun, sei lídera instituisaun ne’e ho diak liu tan. Espera katak bele kontinua obra sira ne’ebé antigu Komisáriu sira husik. Importante ida fali mak, husu ba Komandante Jerál PNTL foun sira atu hadia sistema Investigasaun ne’ebé lao neneik loos durante ne’e. Ezemplu, kazu Joven ida ne’ebé mate iha sela Polísia Munisípiu Dili, to’o oras ne’e ita seidauk hatene kronólojia hosi akontesimentu loloos. Ida tán fali mak Joven ida ne’ebé hetan sona iha Elemloi, to’o oras ne’e ita la hatene ninia paradeiru. Espera situasaun sira ne’e bele aselera iha mandatu Komandante-Jerál Polísia foun ne’e, tanba sistema investigasaun ne’ebé kleur, laos ona novidades foun ba sira”.

2. Estudante IOB Marcos Mendonça “Ha’u nia esperansa ne’e, Instituisaun PNTL ne’ebé lidera ona hosi ema foun, mais laos ema foun iha servisu polísia nian, sira mesak superior deit, sira iha planu diak, atu hadia Instituisaun. Importante mak hadia fallansu sira ne’ebé akontese, liu-liu prosesu investigasaun ne’ebé kleur tebes, hadia servisu Migrasaun, no halo rotasaun ba membru Polísia Fronteira nian, tanba membru sira barak mak tinan barak mantein nafatin iha fronteira. Ida ne’e mak Ha’u nia sujestaun. Obrigado ba G-News”.

3. Juventude Luis Filípe de Jesus, hela iha Bekora “Tuir Ha’u nia esperansa, Komandante Jerál PNTL foun sei servi diak liu tan Komandu-Jerál PNTL. Ita akompanha deit sira nia servisu, no Ha’u fó Parabéns ba nomeiasaun foun. Matebian sira sei kontinua akompanha sira atu susesu iha kareira Polítika ne’e. Parabéns dala ida tán ba sira. Susesu nafatin”.

4. Helder Lavera “Ho lideransa PNTL foun bele kria kondisaun ne’ebé diak ba membru PNTL tomak liu-liu iha munisípiu atu nune’e bele melhora Kualidade servisu iha implementasaun lei no Ordem hanesan;
1. Lojístika hodi fasilita servisu ( transporte, rádiu komunikasaun, farda)
2. Uma Dinas ba membru PNTL
3. Orsamentu hodi fasilita servisu (perdiem)
4. Kapasitasaun ba membro PNTL
5. Promosaun ba membru tuir nia antiguidade”

5. Estudante UNTL Martinha da Silva “Fó Parabéns deit ba Komandante-Jerál Polísia foun, espera katak sei hadia Instituisaun ho diak. No fó ordem ba membru sira atu labele baku arbiru sidadaun sira, liu-liu joven sira, maibé atu konflitus ho professionál. Se lae imajen Instituisaun la diak iha públiku, no halo sidadaun sira tauk bainhira hetan PNTL iha fatin públiku. Ida tán fali mak ho operasaun ka patrulla iha fatin públiku, labele halo tauk movimentu sidadaun sira nian, hanesam ho kareta halai makaas. Maibé Parabéns ba Komandante-Jerál Polísia foun, susesu nafatin. Obrigado”.

6. Manuel Correia “Komandante Jerál PNTL foun, ha’u sujere atu orienta servisu patrollamentu dulante oras 24 nia laran iha kada bairu. Prosesa no fo rejultada ba públiku hosi motivu kazu joven ida ne’ebé mate iha sela kaikoli. Obrigado”.

7. Dosente Lingua no Literáriu Iha Fakuldade Arte Umanidade UNTL Alexandra de Araújo Tilman “Hau nia hanoin kona-ba ideia saida mak presiza hato’o ba Komandante-Jerál foun PNTL mak nomeia.

a. Aumenta liu tan formasaun estraordináriu ba diresaun sira hodi aumenta no hasa’e konhesimentu liutan ba area ne’ebé mak sira tau matan ba.

b. Atendimentu Públiku hanesan ba diresaun Trânzitu-nian, se bele bainhira hala’o kna’ar iha trânzitu nian Labele bok telefone durante oras servisu públiku (Lantas iha estrada)

c. Bainhira halo atendimentu ba kauza ruma iha dalan públiku ka Sentru polisia nian, se bele koalia mamar, Labele oin-buis no profesional iha kna’ar atendimentu Públiku ne’e.

d. Bainhira membru trânzitu sira hala’o swipping/check motorizada iha estrada tenke Firme ba Regras Labele hare’e ba Kolega ka maluk, Husik livre liu de’it

e. Bainhira hala’o kna’ar iha atendimentu Administrasaun nian membru polisia sira Labele uza óklu Metan (dala barak ami sinte) no ne’e ladi’ak tebes bainhira hare’e hosi estranjeiru sira.

f. Ba membru polísia trânzitu durante hala’o kna’ar iha estrada Labele uza Headset

g. Membru oknum polísia balun iha postu área rural dalaruma uza motor, la uza xapa matríkula

h. Presiza halo proposta ba Governu hodi haruka superior sira ba tuir treinamentu ka estudu komparativu iha rai liur. Fo lisensa ba membru sira mak hakarak hasa’e konhesimentu iha nivel Universidade (S1/S2) tuir área mak membru polísia sira hili”.

Ida ne’e entrevista hosi G-News ba sidadaun sira, kona-ba nomeiasaun Komandante-Jerál PNTL foun ho nia Segundu Komandante-Jerál.

Jornalista        : Ekipa G-News

Editór Testu     : Amito Qonusere Araújo

relavante