banner 728x90

Tebe monu labarik ho inan-ferik iha motor leten hanesan Ninza

banner 120x600
6 Views

G-NEWS (DILI) – Relasiona ho labarik balun ne’ebé ataka komunidade sira iha dalan públiku sira ne’ebé do’ok hosi rezidénsia komunidade sira nian, iha ne’ebé atu selebra Natal 2023 no tinan 2024 ho família sira, hanesan akontese iha video ne’ebé viral tebes iha sosial mídia.

Tanba ne’e, utentes transporte privadu sira, liu-liu utilizador motor husu ba autoridade seguransa sira atu kontinua halo patrullamentu rutina iha estrada públiku sira ne’ebé do’ok hosi komunidade sira nia hela fatin, nune’e evita atu akontese atake ne’ebé taka oin.

banner 325x300

Jeronino Barreto Pinto, komunidade ida hosi Munisípiu Covalima, ne’ebé G-News hasoru iha estrada Manleu, segunda-feira (26122023) informa, sente tauk bainhira uza motor ba munisípiu, relasiona ho sidadaun balun ne’ebé falun oin metin hodi hapara motorizada sira ne’ebé hala’o movimentu.

Nia sente tauk hafoin nia parte asesu video iha ne’ebé labarik sira taka oin metin hodi hapara motorizada, ne’ebé transporte labarik no ferik.

“Ohin dáder ha’u haree video ne’e,ha’u tauk atu halo viajen ba foho. Ha’u atu ba Suai. Ha’u tauk iha dalan, maibé ami ba ho rombongan, ne’e di’ak”, Nia haktuir ba G-News.

Tanba ne’e, nia husu ba autoridade seguransa atu kontinua halo patrullamentu rutina iha estrada sira ne’ebé dook hosi uma komunidade nian, nune’e evita hahalok kriminál sira ne’e.

“Ita hotu husu ba parte seguransa atu halo patrullamentu nafatin, liu-liu fatin sira ne’ebé dook hosi uma komunidade nian. situasaun sira ne’e laos foin akontese, uluk ami hosi Suai mai, ema sempre palang, husu osan. Ne’e iha kalan, dalaruma ema tuda”, Jeronimo esplika.

Iha parte seluk, Ernestina Maria Valente, iha terminal Tasitolu, lamenta ho akontesimentu ne’ebé envolve hosi labarik sira, taka oin metin hodi hapara movimentu transporte privadu sira, liu-liu tebe monu labarik ho inan-ferik iha motor leten.

“Ita husu ba maun Polísia sira atu buka tuir labarik sira ne’ebé palang alin oan ida, baku pois tebe tán ho motor, halo inan-ferik no labarik sira monu hosi motor leten. Labarik sira ne’e inan-aman la eduka mak hanesan ne’e, la iha rasa kasihan”, hateten Ernestina ho sentimentu hirus, kuandu asesu video iha Facebook, segunda-feira dáder (26122023).

Armando Gomes, hosi munisípiu Ermera, husu ba autoridade seguransa, atu fó seguransa seguru ba sidadaun sira ne’ebé halo movimentu ba mai, hodi selebra festa Natal no tinan foun ho família sira.

“Ita husu ba Polísia, atu fó seguransa ba sidadaun sira ho másimu, liu-liu halo movimentu hosi munisípiu mai fronteira munisípiu seluk, nune’e evita labarik ka sidadaun sira atu hapara ema, ameasa ema”, Armando haktuir.

To’o informasaun ne’e fó sai, G-News seidauk hetan konfirmasaun hosi Komandu-Jerál PNTL kona-ba ne’e.

Jornalista            : Ekipa G-News

Editór Testu         : Amito Qonusere Araújo

relavante