G-RTV.Com (Dili): Guvernu da-VIII liu husi Sekretáriu Estadu bá Formasaun Professionál no Empregu (SEFOPE) haruka tan traballadór Timor-oan ba servisu iha nasaun Korea Súl.
Tuir Diretór Diresaun Nasionál Empregu Exterior (DNEE)-SEFOPE hateten, agradese bá disponibilidade guvernu Korea Súl ne’ebé manda tan ona servisu na’in hamutuk 65.
“Agradese wa’in bá guvernu Korea Súl tamba ohin ita manda tan ona traballadór na’in 65 atu bá servisu, iha area peska no fábrika, na’in 25 ba fábrika no nain 40 ba parte peska”, hateten diretór DNEE, Filomeno Soares bainhira akompaña viázem da-uluk traballadór sira iha Aeroportu Internasionál Nicolau Lobato, Segunda ne’e.
Diretór ne’e reforsa tan, traballadór Timor-oan ne’ebé rezistradu iha sistema hamutuk ema na’in 1400 resin no promete katak sei servisu hamutuk ho Guvernu Korea Súl nian hodi hare traballadór sira ne’e.
Iha sorin seluk, traballadór Virgílio de Jesus haktuir, sira halo teste no preparasaun husi kedas 2019 hein to’o tinan rua nia laran foin mak arranka.
” Durante ne’e, ami halo prossesu preparasaun tinan rua ona, foin mak arranka tambá ho situasaun covid-19’’ haktui traballadór Virgílio de Jesus iha Aeroportu Nicolau Lobato.
Iha fatin hanesan, família ida husi traballadór, Gaudénsia Martins do Rego sente kontente no triste tambá husik ona familia ida ba servisu iha ema nia rain hoditau-matan fali nia família iha rai Timor.
“Hanesan bin husi hau nia alin José Amarál (Traballadór Kore Súl) sente triste no kontente , triste tamba husik ona alin ba servisu iha ema nia rain no dook husi ami família, kontente tambá nia bá atu hadia família nia moris ne’ebé durante ne’e iha difikuldade barak’’. Konfesa família husi traballadór ne’e.
Ho Matan-ben ne’ebé falun, husi Aeroportu Internasioná Nicolau Lobatu nia sasin, bin husi traballadór José Amarál hasa’e lia korázem bá nia alin.
‘’ Ami fó lia korázem bá nia katak kuidadu-án didiak no servisu didiak atu tau matan ba inan faluk ho ami oan kiak nain 8 “ Gaudénsia Espresa nia sentimentu.
Tuir Observasaun husi G-RTV iha terrenu, família husi traballadór kuaze hamonu matan-ben inklui traballadór rasik hodi hatudu sentimentu solidáriu no korázem bá família ne’ebé husik malu tambá atu hadia moris família nian.
Jornalista: Dircia Crisanta / Melánia Moníz (Estaziada) .
Editór : Arménio.
