banner 728x90

Turista lokál nakonu iha tasi ibun Tutuala no To’otina

banner 120x600
33 Views

G-NEWS (TUTUALA) – Timoroan barak hosi rejiaun I hanesan Lospalos, Baucau, Viqueque no Manatuto, barak mak vizita ona tasi ibun iha postu Tutuala munisípiu Laútem, inklui ba haris tasi no pasear iha Illa Jaco (To’otina) hodi selebra tinan foun nian hamutukn ho amigu, kolega no família sira, ho kareta no motor.

Vizitante ida hosi munisípiu Baucau Gregorio Ximenes ba G-News iha Lospalos villa, tersa-feira (02012024) hateten, sente kontente vizita tasi ibun iha postu Tutuala, hamutuk ho família sira hodi selebra tinan foun 2024 ho kontente tanba manan ona tinan 2023.

banner 325x300

“Ami hosi munisípiu Baucau, mai paseu iha Tutuala ho família sira. Ami kontente loos, tanba ita manan ona tinan 2023, no ita espera katak tinan 2024 ita kontinua moris hamutuk família, sosiedade”, Gregorio espresa nia sentimentu kontente ba G-News.

Lospalos oan ida Julmenio Pereira ba G-News hateten, ohin ba paseu iha Tutuala atu espresa nia sentimentu kontente ba nia família sira, hodi luta ba moris iha tinan 2024 ba oin.

“Ohin mai paseu iha ne’e, atu kontente hamutuk ho família sira. Haris tasi, karik iha tenpu ba tan To’otina ka Illa Jaco, rai-ketan. Ha’u kontente loos, tanba kolega sira hosi munisípiu seluk mós mai hotu”, Julmenio dehan.

Iha sentru abastamentu iha Lospalos villa, Carlos Ze ne’ebé ense mina ba ninia motor, dehan ba G-News katak, nia ho nia kolega sira ba paseu iha tasi ibun Tutuala, hodi selebra natal 2023 no tinan foun 2024.

“Ha’u ho kolega sira, no família balun mós, ami ba paseu iha tasi ibun Tutuala, atu kontente hamutuk, no karik ami ba maki ha tenpu, ami hakarak atu ba Illa Jaco, hodi haree rai henek mutin, ikan sira iha tasi laran, no rusa fuik iha rai-maran Illa Jaco nian”, Carlos dehan.

Iha tasi ibun Tutuala, Clarisia Irene dehan, sente kontente mai paseu iha tasi ibun Tutuala, tanba natureza no paisajen ne’ebé furak.

“Ha’u foin primeira-vez mai iha ne’e, iha Tutuala. Fatin ne’ebé furak, natureza ne’ebé kapas loos. Ha’u gosta loos mai iha ne’e”, Clarisia informa ba G-News.

Iha fatin hanesan, Bento hosi minisípiu Baucau, mai hamutuk ho nia família sira atu paseu iha rai-ulun Tutuala, atu festeza tinan foun 2024.

“Ohin ami mai, atu paseu iha ne’e, ho família sira, atu selebra tinan foun 2024. Ami kontente loos, no gosta tebes, tanba ema barak tebes”, Bento ko’alia hafoin haris tasi.

Turista lokál sira ne’ebé ba paseu, ida-idak lori ninia bukae nune’e bele han bainhira hamlaha iha meúdia no lorokraik nian.

Tuir observasaun G-News iha Lospalos villa, komunidade hosi Lospalos villa barak ho kareta no motor ba paseu iha tasi ibun iha Tutuala, To’otina ka Illa Jaco, no balun fali ba iha tasi ibun Tenu-Laútem ninian.

Jornalista            : Ekipa G-News

Editór Testu         : Amito Qonusere Araújo

relavante