banner 728x90

Uluk Jornalista, agora sai mídia PNTL “moris tenke hamnasa”

banner 120x600

G-NEWS (DILI) – Moris ne’e hanesan mehi, la hatene atu sai saida loos. Dalaruma bele ki’ik, dalaruma mós bele sai boot. Buat hirak ne’e depende ba kestaun tenpu deit. Ohin bele hamnasa midar, dalaruma mós bele tanis. Hirak ne’e hotu tenke simu ho liman rua, ho fuan no laran, tan buat hotu grasa Maromak nian.

Bainhira hakat ba Edifísiu boot Komandu-Jerál PNTL, iha Caicoli, kuandu hakat ba Salaun Relasaun Públika PNTL, sempre hasoru membru Polísia ida, isin mutin (naroman), ladun as, maibé ladun badak mós, maibé isin boot oituan, ho fíziku diak, Nia mak Ajente Prinsípal Estevão Pereira, sempre hamutuk ho ajente Polísia sira seluk iha fatin servisu Relasaun Públika PNTL.

banner 325x300

Atu rai memória ida bainhira hasoru malu ho Komandante-Jerál PNTL, Segundu Komandante-Jerál PNTL, no superior PNTL sira seluk, liuhosi imajen, Ajente Prinsípal Estevão Pereira ka Fanus, se lae ninia kolega sira mak sei lori imi ba hasoru, no sira iha responsábilidade atu hasai imajen sira, atu rai ba dokumentasaun Institusionál PNTL nian.

Nunka kolen, no nunka mós sura kontribuisaun. Estevão Pereira konhesidu iha família, sosiedade no kolega mídia nia matan FANUS. Fanus moris iha aldeia Aidabaleten, suku Atabae, Postu Atabae Munisípiu Bobonaro, hosi fuan domin Abilio Pereira no Albertina Sousa. Bainhira manu kokorek atu fó roman ba mundu, iha sesawan kmanek, teki-teki mane ida, airin família nian, iha uma lisan Uma Biru, Fanus hakat mai iha mundu, rai ne’ebé nia horik ba, iha kedan loron 15 fulan Agostu tinan 1988, hosi famílis simples, ho oan da-ruak, hosi maun-alin na’in 8 (mane-4 no feto-4).

Loron lao ba nafatin, sura fulan to’o tinan, Fanus forma família iha tinan 2012, hafoin remata ninia estudu eskola sekundária tinan 2009 iha Sidade Dili.

Fanus hahú nia kareira Jurnalístika iha Mídia Bussines Timor, desde tinan 2010 to’o 2013. La sente kolen, Fanus hakarak atu dedika ninian sai lutu ba nasaun nian. Tanba ne’e mak iha tinan 2013, hetan rekrutamentu hosi Komandu-Jerál PNTL, sai nu’udar Ajente rekrutadu Polísial.

Fanus, ne’ebé ho karakter umilde, gosta hasee ema, hamnasano habelun ba ema hotu-hotu, no sempre fó kontinênsia ba ninia superior PNTL nu’udar jestu membru PNTL ida ne’ebé kumpri lei no ordem.
“Ho hamnasa……. Ha’u gosta hasai foto, hakerek iha mídia PNTL”, Fanus koa’alia simples deit.

Loron-loron, Ajente Prinsípal Estevão Pereira, sempre akompanha atividade no serimónia Komandu-Jerál PNTL nian, hodi hasai imajen, halo transkripsaun ba informasaun Komandu-Jerál PNTL nian ba públiku.

Karater Fanus iha uma, nafatin habelun no halo kolega diak ba ema hotu-hotu, tanba tuir Nia, hamnasa diak ba ema mak atu lasu amizade, iha sosiedade nia le’et.

Fanus sempre kumpre ordem ninia superior sira iha PNTL. Nia hadomi nia kareira polísial hodi servi públiku.

Fanus ninia hakraik an, iha fatin hotu-hotu, liu-liu ambiente servisu PNTL, tanba nia sente katak nia hanesan iha ninia uma rasik, tanba kna’ar ne’ebé Fanus halo, mak fó moris ba nia ho nia família loron. Fanus ho mehi ne’ebé as mak aprende no aprende nafatin hosi kolega sira ne’ebé ho esperiensia boot, nune’e bele rai hamutuk hanesan bukae ida iha nia moris.

Moris ne’e simples deit, labele loko an. Tanba iha lia-fuan me’ebé ema sempre hateten “labele duni atu kaer borboleta ida, maibé kuda deit ai-funan ne’ebé iha funan furak, nune’e borboleta sei mai hobur, no sei kaer borboleta, no dalaruma bele kaer hotu mós borboleta sira seluk”. Nune’e mós hanesan mehi katak, labele duni mehi to’o as, maibé hosik tenpu mak bele deside buat hotu-hotu. Bainhira halo diak ba ema hotu-hotu, Maromak mak sei fila buat hotu hosi at ba diak, no hosi nakukun ba naroman.

Ida ne’e hanesan introdusaun pesoal ida ba Ajente Prinsípal Estevão Pereira konhesidu ho Fanus ninia pájina moris ho kareira Jurnalistika to’o Polísia.

Hanesan oan da-ruak hosi família simples, Estevão Pereira ka Fanus, iha responsábilidade, sempre tau matan ba nia papa no mama iha Atabae ne’ebá, liuhosi komunikasaun telemóvel no plataforma dijitál, hodi hatene kondisaun família ninian. Fanusnia domin ba Nia Papa no Mama, sukat labele, tetu mós labele, no klean hanesan tasi, as hanesan Foho Ramelau. (REMATA). 

Jornalista     : Ekipa G-News
Editór Testu : Amito Qonusere Araújo

relavante