banner 728x90

Hanoin lisuk: notifikasaun PN hasoru deputadu CNRT

banner 120x600
82 Views

G-NEWS (DILI) – Relasiona ho deklarasaun Prezidente Parlamentu Nasionál Aniceto Guterres, ne’ebé atu notifika Deputadu sira hosi bankada CNRT, tanba auzente iha plenária dala-6 tui-tuir malu. Maske nune’e, deputadu sira ne’ebé heta notifikasaun, sei fo respostas.

Tanba ne’e, sidadaun Timoroan tomak sei fo sira nia hanoin kona-ba polítika demokratizasaun ne’ebé akontese iha órgaun Estadu, Parlamentu Nasionál.

banner 325x300

Tuir mai G-News, fó sai hanoin oi-oin hosi sidadaun timoroan rasik.

João de Jesus Santos, Juventude Munisípiu Liquiça: “Ha’u akompanha informasaun iha Parlamentu Nasionál, ne’e kómiku liu. Tuir loloos deputadu sira konsentra ba lei sira hanesan alterasaun ba lei pensaun vitalísia, duke sibuk liu ba nomeiasaun Komisáriu KAK. Sira ejiji tanba keta iha interese karik”.

Martinho Freitas, sidadaun ida iha Munisípiu Baucau: ” Ita la komprende, ita atu lori Timor ne’e ba ne’ebé? Boot sira iha Parlamentu Nasioná ne’e ba mak loron tiha, kalan tiha, selok malu la para. Fulan-fulan osan tama bolsu, atendimentu ba deputadu sira diak tebes, maibé saida mak la diak, ne’e mak sira loron kalan istóri malu hanesan Estadu ka Povu deve hela sira. Triste tebes ho situasaun polítika iha Parlamentu Nasionál ne’e”.

Olga Madeira, sidadaun iha Munisípiu Aileu: “Ba Ha’u ne’e kómiku, tanba tuir loloos Parlamentu Nasionál ne’e atu diskute povu ninia moris. Ita haree Povu ne’e sei enfrenta problema bee moos, eletrisidade, estrada, maibé assuntus ne’e sira la tau atensaun, sira fó prioridade liu ba kargu polítika. Signifika sira troka tun sae Komisáriu KAK ne’e tanba keta tauk komisáriu atúal ne’e karik? Diak liu besik eleisaun ona ne’e, labele buka razaun. Ami iha baze ne’e sadik deputadu sira atu diskute kona-ba alterasaun lei pensaun vitalísia, se ida ne’e mak la muda, signifika imi tauk lakon benefísiu. Kakuta sira ne’e kakutak ida la iha interese ba povu. Ibunmak hakilar defende no reprejenta povu, maibé fuan buka lukru deit ba sira nia an no família”.

Armindo Lopes, Sidadaun Postu Maubara, Liquiça: “Ha’u sente triste ho polítika iha Parlamentu Nasionál. Sira iha ne’ebá la hanorin jerasaun foun sira ho buat diak, maibé hanorin ódiu no vingansa ba malu”.

Lucas Freitas, Militante Partidu CNRT “Triste tebes ho desizaun polítika iha PN, tinan-tinanmak selok malu, la tau interese ba povu nia moris. Deputaduno deputada mesak kakutak kanten deit”.

Francisco Gomes, Militante Partidu Frente-Mudança: ” Ita haree deputadu sira iha Parlamentu Nasionál ne’e, hanesan labarik sira hadau malu rebusadu. Ida tanis, ida mai hamaus, pois ida hirus oituan”.

Ermundo de Araújo, Militante FRETILIN :“Ha’u haree polítika iha PN ne’e demais. Fó votus saugate deit ba deputadu kanten poder”.

Miguel Bartolomeu de Jesus, Militante Partidu PLP “Selok malu ba nafatin, imimak ukun, imi faan fali Nasaun ne’e mós diak. Polítika la saúdavel liu. Itania Parlamentu Nasionál ne’e órgaun hariku an”.

Armando Pereira, Militante Partidu KHUNTO ” Bou sira iha Parlamentu Nasionál ne’e halo buat ida atu hatudu ba públiku ne’e tenke hatudu ida diak. Ita nia Parlamentu ne’e fatin atu konta istória. Ha’u jujur, Ha’u militante Partidu KHUNTO, maibé Ha’u sei fó votus ba Avo Nana. Obrigadu”.

Ida ne’e mak Vox Pop ne’ebé mídia G-News hala’o hafoin mosu dezentendimentu iha Parlamentu Nasionál kona-ba karta notifikasaun hosi Prezidente PN Aniceto Guterres hasoru deputadu CNRT.

Iha rezumu hosi Vox Pop ba sidadaun sira ne’e, G-News halo ánaliza katak, sidadaun no joven sira maduru ona iha polítika, tanba sira konsiente katak, ho situasaun polítika ne’ebé akontese la fó edukasaun diak ba jerasaun foun sira, no konsiente katak reprejentante povu iha Uma Fukun PN la fó prioridade ba Povu no Nasaun, maibé interese ba sira nia an ka grupu sira nia interese.

G-News sei kontinua Up_Date informasaun kona-ba ne’e liuhosi entrevista audiovisual ba iha edisaun tuir mai. Akompanha nafatin kanál G-News iha Youtube: G-News tatoli ita lian, no Facebook Rádio Televizaun G-News.

Jornalista      : Ekipa G-News

Editór Testu  : Amito Qonusere Araújo

relavante