Deklarasaun ofisiál PR ba falesimentu Papa Francisco

G—NEWS (DILI) — Prezidente Repúblika José Ramos-Horta, fó sai deklarasaun ofisialmente kona-ba Amu-Papa Francisco ne’ebé lakon vida.

Liu husi komunikadu ne’ebé G—NEWS asesu, Xefe Estadu José Ramos-Horta sente triste bainhira rona informasaun kona-ba falesimentu Amu-Papa Francisco.

“Ho laran triste tebes mak hau rona kona-ba falesimentu Sua Santidade Papa Francisco, ne’ebé ohin fila hikas ona ba Maromak ita-nia Nai, hafoin tinan sanulu resin rua pontifikadu ne’ebé marka ho haraik-an, aten-barani, no sasin naroman ba fiar, justisa, no domin ba umanidade”, haktuir iha komunikadu.

Prezidente Repúblika hodi Povu Timor-Leste nia naran, hato’o sentidu kondolénsia profunda ba Igreja Katólika no ba sarani sira hotu iha mundu tomak durante tempu triste no orasaun ida-ne’e.

“Memória Papa Francisco sei moris nafatin iha povu Timór nia fuan, partikularmente hafoin nia vizita Apostolika mai Timor-Leste iha Setembru 2024, ne’ebé nunka atu bele haluha, iha momentu ne’ebé nia kona tebes ita-nia Nasaun nia espíritu ho liafuan kona-ba esperansa, inkluzaun, no fraternidade”.

Xefe Estadu ne’e haktuir, ho ninia prezensa iha ita-nia leet nu’udar sinál ligasaun espirituál ne’ebé halibur povu Timor-Leste ho Santo Padre no Igreja Roma nian, no sei hanoin ba nafatin nu’udar bensaun ida.

“Mane ida ne’ebé mai husi “kuaze besik mundu nia rohan,” hanesan nia rasik hatete iha nia eleisaun, Papa Francisco mak, husi inísiu, Papa ida ne’ebé la’o besik ho ema kiak sira, ema ne’ebé sai exkluidu, ema marjinalizadu, migrante, no vítima funu no indiferensa sira. Nia mak Papa ba Justisa, Paz, Diálogu, Ekolojia Integrál, no renovasaun Igreja nian hodi hasoru dezafiu sira iha ita-nia tempu”, sita iha komunikadu.

Nia hili naran Francisco hatudu kedas husi momentu primeiru espíritu ninia ministériu: sinplesidade evanjélika, kompaixaun, no kompromisu ba ema vulneravel liu. Nia husik hela ba ita legadu fiar ne’ebé moris no dinámiku, hodi inspira ita atu kontinua servisu ba rekonsiliasaun, perdaun, no serbí nian.

Timor-Leste hamriik iha komunhaun espirituál ho Santa Sé, no katóliku millaun ba millaun iha mundu tomak ne’ebé ohin loron halerik ba Santu Padre nia saída.

Iha tempu lutu ida-ne’e, Timor-Leste deklara semana ida lutu nasionál nian ho bandeira sira ho bandeira meia hasta hahú husi loron 22 fulan-Abril tinan 2025.

Ita hamutuk iha ita-nia orasaun ho sarani sira iha mundu tomak, hodi intrega Papa Francisco iha Maromak nia laran luak no domin rohan-laek.