G-NEWS (LAGA) – Prezidénsia Repúblika José Ramos Horta kontinua tulun, kbi’it la’ek sira iha área rural, hodi hakma’an sira nia difikuldade.
Ekipa Prezidénsia Repúblika, Tersa-Feira ne’e, ajuda família vulnerál ida iha Aldeia Boleha, Suku Soba, Postu Administrativu Laga, Munisípiu Baucau.
Duarte sofre Asidente Vascular Cerebral – AVC ka Stroke (iha inglez) iha tinan 2019, hodi halo nia sai difisiénsia no susar atu halo mobilidade.
Difísiensia fízika ne’e obriga Duarte hodi husu ba nia kaben atu halo divórsiu, hodi fila ba nia família hamutuk ho nia oan-mane ida no Duarte hela ho oan-mane rua ho feto-ikun ho idade 12.
Oan-Mane dahuluk hanesan estudante Ensinu Sekundáriu Tekinomata, daruak deside la eskola hodi tau matan ba família.
“Duarte hela mesak, nia fen divórsiu tambá kondisaun moris. Mézmu kondisaun nune’e, nia (Duarte) sempre hetan mos tulun husi nia oan, família viziñu inklui Suku rasik ne’ebé sempre oferese hahan balun. Durante ne’e, hetan assisténsia maka’as husi nia oan-feto ho idade 12 ne’e. Tau matan ba nia apa nia hahan (tein) no nessesidade seluk ne’ebé nia apa presija, Haktuir Xefe Suku Soba, Francisca Mónica de Fátima Soares.
Tuir Xefe Suku Soba, Nísia tenke prepara matabixu, ai-han meiu dia no mo kuru bé, molok ba eskola no uza de’it lampra hodi estuda iha tempu kalan, tanba Aldeia Boleha seidauk asesu ba eletresidade.
“Agradese tebes ba apoia ne’ebé mai husi Prezidénsia Repúblika ba ha’u nia komunidade vulnerável ne’e. Agradese liu tan, bele mos halo terapia ba nia,” Hateten Autoridade Lokál ne’e.
Apoiu ne’ebé kompostu husi fós, mina te’in, kulxaun no nesesidade bázika seluk, oferese direta husi Asessór Prezidente Repúblika ba Servisu Sosiedade Sívil no Assuntu Sosiál Quintiliano Moníz Carvalho.
Hafoin ne’e, ekipa Prezidénsia Repúblika kontinua distribui apoiu ba família vulnerável iha Munisípiu Lautem no Viqueque.
Jornalista : Ekipa G-News
Editór Textu : Amito Qonusere Araújo
loading="lazy" />