PR Ramos-Horta nia solidariedade ba labarik orfanatu Santa Terezinha Quelicai, Baucau

G—NEWS (QUELICAI-BAUCAU) — Prezidénsia Repúblika Reforsa Apoiu Sosiál Liuhusi Doasaun Ekipamentu Desportu ba Orfanatu Santa Terezinha de Menino Jesus Baucau

Iha Kuarta-Feira, loron 3 fulan-Setembru tinan 2029, Prezidénsia Repúblika, liuhosi Unidade Sosiedade Sivíl no Apoiu Sosiál Palásiu Prezidensiál, ne’ebé lidera hosi Koordenadór Jerál Tereza dos Santos Ximenes, fahe ekipamentu desportu ba estudante sira iha Orfanatu Santa Terezinha de No Jesus (Dom Bosco) Quelicai, Baucau. Distribuisaun ida-ne’e la’ós de’it jestu simbóliku ida, maibé parte ida hosi estratéjia ida atu apoia dezenvolvimentu sosiál, fíziku no psikolójiku labarik sira-nian iha instituisaun edukasionál sosiál ida-ne’e.

Tuir Koordenadór Jerál Tereza dos Santos Ximenes, inisiativa ida ne’e hatudu solidariedade Prezidente Repúblika, Dr. José Ramos-Horta, ba labarik sira iha orfanatu. Nia hatete:

“Apoiu ida ne’e mak inisiativa direta husi Sua Exelénsia Prezidente Repúblika, Dr. José Ramos-Horta, ne’ebé atu hatudu nia solidariedade ba estudante sira, liu-liu iha orfanatu, alende nee apoiu ida nemos parte husi ekipamentu mak hetan donasaun husi belun Prezidente Ramos-Horta nia belun di’ak iha Honkong-Xina, ne’ebé distribui liu husi Palásiu Prezidensiál.”  Informa Koordenadora Jerál Tereza dos Santos Ximenes

Aprosimasaun ida-ne’e reflete Prezidente nia komprensaun katak labarik sira-nia dezenvolvimentu la depende de’it ba edukasaun akadémika, maibé mós ba oportunidade atu dezenvolve abilidade fíziku, serbisu iha ekipa, no dixiplina liuhosi atividade desportu. Estudu sosiolójiku sira hatudu katak partisipasaun iha desportu bele hasa’e labarik sira nia auto-konfiansa, solidariedade, no abilidade sosiál sira iha instituisaun sosiál sira nia laran, no ikusmai kontribui ba dezenvolvimentu umanu ne’ebé ekilibradu liu iha sosiedade.

Reitór Igreja St. Terezinha Quelicai, Padre Albino Fernandes, hato’o ninia apresiasaun kle’an ba Prezidente nia atensaun. Padre Albino subliña:

“Apoiu desportivu ida ne’e signifikadu tebes. Ne’e hatudu tebes Prezidente nia fuan nafatin iha estudante orfanatu sira, ne’ebé mak sai futuru Timor-Leste.”  Agradese Enkaregadu Lar Santa Terezinha Quelicai , Padre Albino Fernandes

Reprezentante estudante Angelino Rui Gomes mós hato’o nia agradesimentu:

“Ami sei bele iha farda no bola atu treina. Prezidente hatudu nia fuan bo’ot, hanoin ami iha orfanatu.” Haktuir Estudante Angelino Rui Gomes

Asisténsia ne’ebé fó inklui farda futeból 50, farda voleiból 50, sapatu par 60, no roupa desportu 60, hotu-hotu mai hosi doadór ida hosi Prezidente iha Hong Kong, Xina. Apoiu ida-ne’e dezeña atu fasilita atividade estrakurikulár sira, habelar oportunidade ba labarik sira atu partisipa iha desportu, no harii ambiente aprendizajen ida ne’ebé inkluzivu no olístiku liu.

Orfanatu Santa Terezinha Quelicai oras ne’e dadaun akompaña estudante hamutuk 51 husi munisípiu 12, inklui rejiaun RAEOA. Orfanatu ne’e serve la’ós de’it nu’udar instituisaun edukasionál no sosiál maibé mós nu’udar espasu ba harii karakter no haburas dezenvolvimentu jerasaun foin-sa’e Timor-Leste nian. Prezidenti nia intervensaun iha forma asisténsia desportiva hanesan ezemplu konkretu ida kona-ba oinsá governu bele fasilita dezenvolvimentu olístiku ba labarik sira, hodi kombina edukasaun formál, atividade fíziku, no valór sosiál sira.

Distribuisaun ajuda ne’e hatudu katak estadu nia preokupasaun ba labarik sira ne’ebé iha orfanatu bele realiza liuhosi programa konkretu sira, enkuantu simultaneamente hametin relasaun entre sosiedade sivíl, instituisaun relijioza sira, no ajénsia governu nian. Inisiativa sira hanesan ne’e afirma prinsípiu sira solidariedade no inkluzividade nian ne’ebé sai baze ba dezenvolvimentu umanu iha Timor-Leste no hatudu Prezidente nia kompromisu atu garante katak labarik sira, nu’udar nasaun nia jerasaun futuru, iha oportunidade hanesan atu buras no dezenvolve ho ótimu.