G—NEWS (DILI) — Deputadu sira iha Parlamentu Nasionál, liu husi sesaun Plenariu Ordinaria, iha loron 23 fulan setembru tinan 2025, halo diskusaun no aprovasaun ba Proposta Rezolusaun Parlamentu Nasionál (PN) nian No.66/VI (3º) – Apoiu Prosesu Admisaun Timor-Leste iha Asosiasaun Nasaun Sudeste Aziátiku (ASEAN), ne’ebé aprezenta husi Deputadu sira, ho votus unanimidade a favor 41, konta 0 no abstensaun 0.
Iha relatóriu no pareser Komisaun B, ne’ebé trata asuntu Negosiu Estranjeiru, Defeza no Seguransa, iha parte analiza ba Proposta Resolusaun nº 19/VI (2ª) hatete, “Iha planu jurídiku-prosedimentál, Parlamentu Nasionál la bele delibera kona-ba atu ida ne’ebé la eziste; nune’e, proposta bele admite, maibé diskusaun no votasaun tenke agenda depois assinatura deklarasaun nian no dokumentu finál ne’ebé asina ona nia tau hamutuk ba prosesu aprovasaun nian. Iha planu polítiku, rekoñese deklarasaun nian karakter desizívu, Parlamentu bele, hahú agora ona, espresu apoiu tomak ba prosesu adesaun nian, tuir koerénsia ho interese nasionál nian.
Iha pareser dekreve katak, “Proposta rezolusaun ne’e reúne kondisaun konstitusionál, legál no rejimentál sira hotu hodi bele apresia no aprova, maibé nia diskusaun no votasaun tenke agenda depois assinatura instrumentu internasionál nian no depois haruka testu finál ba Parlamentu.”
Ho razaun sira ne’ebé menciona, plenáriu aprova ba rezolusaun ne’ebé apresenta husi Deputadu sira.
Alénde ne’e, Meza Anúnsiu kona-ba vizita privadu Prezidente Repúblika ba Portugal entre loron 1 to’o 8 fulan outubru tinan 2025; Iha intervensaun diversas, Deputadu sira manifesta preokupasaun liga ba assuntu infraestrutura basika, Estrada, edukasaun, subsídiu idosos; bee-moos, plano konstrusaun stadiun Foteball iha Tasi-Tolu; funsionáriu saúde iha Bobonaro seidauk simu insentivu ba servisu turno nian; Lixo barak iha Ilha Jaco inklui Cristo Rei-Díli; Igreja Aitara Soebada, sempre xave hela deit; renovasaun Casa Europeia; estasaun kombustivel iha Díli barak liu; inklui informasaun importante sira seluk ne’ebé presija atensaun husi Ministériu no instituisaun relevante sira.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira, no hetan presença husi Vice-Ministru Asuntu Parlamentar, Adérito Hugo da Costa.
loading="lazy" />