G—NEWS (DILI) — Reitór UNPAZ, Adolmando Soares Amaral Simu Audensia ho Gabinete asesor asuntu seguransa Ministériu Interiór, tersa Feira ne’e iha kna’ar fatin, hodi ko’alia kona-ba asuntu seguransa nian ligadu ho konferensia nomós asaun pasifiku ne’ebé atu hala’o, hasoru Parlamentu Nasionál ba sosa kareta foun ba Deputadu sira.
Iha diskusaun entre Reitór UNPAZ ho ekipa husi Ministériu Interiór, hateten kampus hanesan Instituisaun akadémiku no ema akadémiku labele tur nonok de’it, maibé tenki haree no akompaña no fó nafatin hanoin ba Governu no Estadu atu akompaña sira-nia servisu ho di’ak.
Ba asuntu establidade ne’e responsabilidade, maibé buat ne’ebé maka laloos labele tur nonook de’it, labele na’in hira bolu malu ko’alia buat ne’ebé laloos, maibé tenki hala’o asaun ba buat ne’ebé maka ligasaun ho osan povo nian.
Nasaun ida ne’e agora povu la sente saida maka dezenvolvimentu maibé lori povu sira ba fali iha risku laran, labele ida rua de’it maka goja osan povu nian ho fasilidade oi-oin, depois tinan lima tun ba bosok tan sira ho ita nia argumentu no retorika sira.
“Kampus labele nonook ho situasaun sira henesan ne’e, tanba ne’e, saida de’it maka akontese ha’u prontu responsabilia maka husu atu kontinua halo konferensia, konsolida ho intelektual no sosiedade sivil atu hahú organiza manifestasaun pasifiku, nune’e bele fó hanoin ba Presidente Republika, Primeiru Ministru no ba deputadu inklui Ministru sira”, dehan Reitór UNPAZ.
Nia esklarese, deputadu sira tuur maka ko’alia de’it ho retorika falsu sira, aprova buat oi-oin no nia efeitu ita la sente, kresimentu ekonomia no imflasaun folin sasán iha merkadu mós sa’e bebeik no dezenvolvimentu la’o hakdasak hela, Primeiru Ministru loron kalan toba hela iha rai rahun laran, hodi dudu Emprezáriu Nasional sira ba dezenvolvimentu atu la’o lalais, maibé laiha ema atu komunga vizaun ida ne’e, tanba ne’e kampus haree hetan ida ne’e ladún di’ak no nafatin halo asaun ba situasaun ne’ebé maka iha.
Kampus kritika ba ema sira ne’ebé hetan oportunidade maibé la komprende vizaun Primeiru Ministru nian, atu dudu dezenvolvimentu la’o lalais.
Reitór reafirma, problema mosu intituisaun hotu iha atu rezolve ida ne’e, la’os mai fó hanoin ba malu buat ida ne’ebé la di’ak, taka malu nonook tia, ida ne’e labele akontese hanesan ne’e, labele la’o bebeik ho situsaun ida hanesan ne’e no kampus labele tur nonook de’it no tauk situasaun sira hanesan ne’e, hanesan nasaun atu sai di’ak tenki ho konsekuansia.
“Nasaun atu la’o ba oin ho di’ak tenki iha konflitu, se laiha konflitu nasaun nunka organiza ba oin, maibé UNPAZ, ami nafatin garante estabilidade no lakoi situsaun hanesan Indonézia nian atu akontese iha Timor, maibé sira kuandu nafatin obriga, ha’u hanoin mós la sala mós situasaun ne’e akontese iha Timor”, deklara reitór iha diskusaun ho ekipa Ministériu Interior iha Gabinete reitoria, UNPAZ.
loading="lazy" />