PM Xanana diskute estratéjia fronteira marítima

G—NEWS (LONDRES) — Primeiru-Ministru (PM) Kay Rala Xanana Gusmão hamutuk ho Konselleiru Superiór no ekipa jurídika kona-ba kestaun Fronteira Terrestre no Marítima, hala’o enkontru estratéjiku ida iha Londres, Reinu Unidu, durante loron rua (19–20 setembru 2025). Objetivu enkontru ida-ne’e mak atu esplora estratéjia ba Timor-Leste hodi defende posisaun nian iha negosiasaun ho Indonézia kona-ba Fronteira Marítima, ne’ebé sei hahú iha inísiu Dezembru 2025.

“Hau mai Londres hamutuk ho ekipa tomak husi Gabinete Fronteiras Marítimas Timor-Leste nian, hodi hasoru malu ho advogadu sira ka legal counsel. Iha fulan Agostu liu-ba, ekipa hosi Repúblika Indonézia ona mai Dili hasoru malu ho ekipa Timor-Leste atu hahú ko’alia kona-ba Fronteira Marítima,” hateten PM Xanana Gusmão hafoin enkontru.

Negosiasaun formál uluk sei akontese iha prinsípiu Dezembru 2025. Tuir ne’e, durante loron rua iha Londres, ekipa Timor-Leste no konselleiru jurídiku fó-an ba diskusaun detallu hodi garante katak posisaun TL sei harmoniza ho lei internasionál.

Xanana Gusmão mos rekoñese kontribuisaun importante husi Michael Charles Wood hosi Reinu Unidu, hamutuk ho matenek sira seluk ne’ebé iha tempu ikus ajuda teb-tebes Timor-Leste. Agora, sira seidauk para atu kontínua fó kontribuisaun, inklui mos iha kazu seluk, no sei fila fali ba Timor-Leste atu akompaña prosesu negosiasaun ho Indonézia.

“Durante loron rua, ita hasoru malu hodi kombina no haree klaru saida mak Timor-Leste bele defende bainhira tama iha negosiasaun ho Indonézia iha inísiu Dezembru,” deklara Xanana.

Governu Timor-Leste hela iha fase preparasaun ba negosiasaun fronteira maritima, ho PM Xanana hato’o rekoñesimentu boot, iha naran Prezidente Repúblika no povu TL, ba matenek internasionál sira ne’ebé fó apoiu ida ne’ebé importante durante prosesu negosiasaun ho Austrália. PM mos hateten nia konfiansa katak apoiu hanesan-ne’e sei kontinua mos bainhira TL enfrenta negosiasaun ho Indonézia.

Empreza advogadu internasionál DLA Piper, ne’ebé iha eskritóriu iha nasaun liu-40 iha Amérika, Ázia-Pasífiku, Europa, Áfrika no Médiu Oriente, mak kontinua fó asisténsia ba TL. DLA Piper mesak harii iha tinan 2005, liu hosi fuzaun entre tolu empreza advogadu: Gray Cary Ware & Freidenrich LLP (San Diego), Piper Rudnick LLP (Baltimore), no DLA LLP (Reinu Unidu).

(Média-GPM)