Governador IRNRI preokupa tranzasaun illegal iha fronteira

G-News (DILI) – Ministru Komérsiu no Indústria Filipus Nino Pereira hala’o reuniaun kortezia ho Governador Institutu Rezilénsia Nasionál Repúblika Indónezia (Lembaga Ketahanan Nasional Republik Indonesia – Lemhannas RI) Andi Widjajanto  ho nia delegasaun iha Gabinete Ministériu Comersiu Industria, Farol Dili Tersa-Feira semana (05092023) ne’e  .

Iha sorumutu ne’e, Ministru Komérsiu no Indústria aborda pontu situasaun ekonómia Timor-Leste nian, inklui polítika IX Governu Konstitusionál ba dezenvolvimentu ekonómia nasionál iha setór komérsiu no indústria.

“Iha sorumutu ohin Ita koalia kona-ba zona industria, zona komérsiu livre, eksportasaun no importasaun, inklui tranzasaun ilegál iha fronteira entre nasaun rua.” Haktuir iha karta komunikadu imprensa MCI

Asuntu ne’ebé konsidera pertinente mak zona komérsiu livre ne’ebé Timor-Leste no Indonézia diskute hela, no oinsá Timor-Leste bele aproveita merkadu Indonézia hodi eksporta Timor-Leste nia produtu potensiál sira.

“Maibé Ita konsentra ba free trade area ne’ebé durante ne’e sai ona diskusaun entre Governu Timor-Leste no Governu Indonezia, no dezenvolvimentu ekonomia iha área fronteira” Afirma Nino Perreira

Alende ne’e, diskute mós balansu komérsiu, tanba Timor-Leste atualmente depende maka’as ba produtu importadu. Maibé, Governu Timor-Leste halo hela esforsu oinsá bele halo balansu iha eksportasaun no importasaun.

“Indonezia iha esperiénsia barak kona-ba oinsá sira dudu sira-nia ekonomia liuhusi dezenvolvimentu empreza mikro no kiik sira. Ita opta polítika merkadu livre, ne’ebé ita hanoin kona-ba protesaun ita-nia merkadu, ida-ne’e importante hodi iha intervensaun seletiva, ne’ebé mak parte Ministériu Komérsiu no Indústria tenke haree hodi asigura ita-nia ekonomia rai laran.” Reforsa Governante ne’e.

Iha parte seluk, Ministru mós ko’alia kona-ba dezenvolvimentu kooperativa, ne’ebé bele foti esperiénsia husi Provínsia NTT – Indonézia, hodi dudu kresimentu ekonómia povu nian iha Timor-Leste.

Governadór Andi Widjajanto fahe sira-nia esperiénsia kona-ba dezenvolvimentu ekonómia iha Indonézia, no preokupa ho tranzasaun ilegál ne’ebé akontese iha fronteira Timor-Leste no Indónezia. Tanba ne’e, sira preokupa oinsá dezenvolve ekonómia iha fronteira entre Timor-Leste no Indonezia.

Jornalista       : Asensio Belo

Editór Testu : Amito Qonusere Araújo