G-NEWS (DILI) – Sidadaun sira agradese ba Polísia Trânzitu munisípiu Dili ne’ebé tula na’in ba transporte sira, liu-liu motorize ne’ebé prende bainhira hala’o passa revista iha kapitál Dili.
Joven ida, hela iha área Becora, ne’ebé ninia motor hetan prende iha área Ministériu Estatal nia oin, tanba kontra regras sinais trânzitu, agradese ba autoridade seguransa liu-liu Polísia trânzitu munisípiu Dili, ne’ebé konsege tula sira ba ida-idak nia bairro tanba kestaun seguransa liu-liu iha tempu kalan.
“Polísia tula hanesan ne’e di’ak, tanba ita hela dook, ita tauk ema lanu ka tuda ita iha dalan, ne’e ita lakon boot. Motor ida ohin ne’e mós maun sira nian, hanesan ne’e tiha ona, ita ba mesak mak ba ema tuda ka hanusa, ne’e aumenta tán problema”, Joven ida ne’ebé hela iha Becora, haktuir ba G-News, bainhira Polísia hatun sidadaun balun iha dalan ba Comoro.
Ihan parte seluk, Oekusioan ida ne’ebé ninia motor mós prende, hela iha área Fatuhada (Edifísiu Kuartél-Jenerál F-FDTL Fatuhada nia oin) hateten, maske polísia prende ona motor, maibé ho responsábilidade atu tula ba ida-idak nia rezidénsia ne’e importante tebes.
“Maun Polísia sira tula ita hanesan ne’e di’ak, tanba lae ohin ita mai ne’e ita tauk, lao kalan tán. Ita atu telefóne ba família mós ita hanoin barak, ba mak sira tilang tán fali ka, hetan asidente ruma, ne’e problema aumenta tán problema”, haktuir hodi hakotu konversa.
Bainhira G-News dadalia ho Polísia Trânzitu Dili, (25082023) ne’ebé lakohi fó sai nia identidade, sira informa katak, Polísia iha responsabilidade atu fasilita sidadaun sira ba ida-idak nia rezidénsia bainhira prende sira nia motor, maske sira hela ho distánsia ne’ebé dook malu.
“Ita iha responsábilidade. Ita tenke asegura ita nia sidadaun sira, tanba sira ita nia família, tanba ne’e kestaun seguransa. Regra sira ne’e ita bele ko’alia, ne’e iha ninia fatin, maibé responsabilidade ne’e ita hotu nian atu asegura, ne’e importante”, konversa entre ekipa G-News ho polísia trânzitu Dili.
Membru Polísia trânzitu iha munisípiu Dili, hatudu duni sira nia responsábilidade, maske kalan boot, maibé sira kumpre sira nia obrigasaun nu’udar servidór ba povu no nasaun. Sira la ko’alia sira nia kolen, sira la ko’alia sira nia terus, maibé sira ko’alia oinsa atu sidadaun hotu-hotu kumpre regras, no sira esforsu atu lori mentalidade sidadaun sira nian ne’ebé la di’ak ba di’ak ninian. Ita hotu hatene, dalaruma sidadaun sira haree polísia trânzitu ne’ebé halo pasa revista, dehan fali halo arbiru, dalaruma prega lia-fuan oi-oin, maibé ita la sente katak, ajente balun sira nia tinan la merese ona atu hamrik iha Estrada, tanba balun iha ona bei-oan, sira presiza deskansa, maibé tanba nesesidade no lei, sira la preokupa, no sira husik sira nia família, oan ka bei-oan iha uma, hodi hala’o servisu ida ne’ebé bele asegura vída úmanu.
Tuir observasaun G-News iha fatin pasa revista, Polísia Trânzitu munisípiu Dili ne’ebé hala’o ona pasa revista ba transporte privadu sira, liu-liu haree asesoria sira transporte hanesan lampu, espellu, kapassete no seluk tán, ne’ebé la kompletu, iha obrigasaun atu prende ka aplika surat tilang. Pasa revista ne’e atu konsensializa ka muda mentalidade sidadaun sira nian, laos atu estraga, maibé hanesan edukasaun sívika ida iha Estrada públiku, nune’e bele asegura vida utilizador transporte sira hodi prevene hosi asidente tráfiku.
Tanba ne’e, Polísia trânzitu sira komunga ona filozófia polisiamente komunitáriu ne’ebé identíku ho VIP katak, Vizibilidade; hatudu presenza polísia nian liuhosi atividades polísial iha komunidade nia leet, Involvementu ; Involvementu komunidade nian iha lala’ok seguransa hodi nune’e eduka ona komunidade sai mos na’in ba asaun sira seguransa, no Profesionalismu; hatudu matenek iha ita nia atuasaun no atendementu, nakonu ho disiplina.
Hodi atinji objetivu aumenta vizibilidade PNTL nian iha komunidade, estabelese parseria metin liu-tán ho lider komunitária no autoridade relevante seluk no harii konfiansa komunidade nian ba PNTL iha asaun sira seguransa nian.
Tanba ne’e, labele tauk Polísia trânzitu bainhira hamrik iha Estrada públiku. Sira hamrik iha ne’ebá atu kontrola sidadan sira ne’ebé uza transporte privadu no públiku ne’ebé kontra regras, liu-liu motorista sira ne’ebé ho kondisaun lanu, asesoria transporte la kompletu. Sira hasee ita tanba hadomi ita, sira hasee tanba preokupa ita nia vída.
Lia-fuan importante ida ne’ebé sita iha ne’e katak, “kuandu prende ona motor, labele halai, labele hasai lia-fuan mal, kona-ba regra sira, ita bele ko’alia iha ninia fatin, maibé koopera ho polísia nune’e bele asegura ita hotu nia vída. Habelun ho Polísia, tanba Polísia ó nia kolega”.
Redasaun G-News
loading="lazy" />