G-NEWS (PORTUGAL) — Komunidade Maucola iha Suai, Timor-Leste, desde dia 8 de dezembro 2024, marka momentu istóriku ne’ebé bele realiza sira hotu nia mehi atu harii Kapela foun ida. Planu ba obras Capela ne’e, komesa iha fulan Fevereiru 2021, ho situasaun krizi Pandemia, maibe grasa Maromak nian, tempu ohin bele iha realizasaun ba mehi ida ne’ebé povu Maucola hein durante tempu naruk.
Desde tinan 1984, Kapela Antiga harii, iha tempu transmigasaun. No hahu husi tempu nebe Kapela nudar fatin ba ema hotu atu halo orasaun, aprende dutrina fé nian, sa tan ho situasaun no desafios ne’ebé ita enfrenta durante funu nebe naruk too iha tinan 1999.
Hanesan Maucola oan, nebe halo misaun iha portugal no nudar misionáriu SVD, ha’u sente iha obrigasaun atu bele buka dalan karik hetan ajuda ruma ba renovasaun fatin sagrado ida ne’e. Hahu halo komunikasaun ho pároku iha Suai, hodi imvolve mos komunidade Maucola, inklui jovem sira ne’ebé emigrante iha Korea, Austrália, Inglaterra no Indonézia, ami hahu halo planu ida atu mobiliza rekursu sira ne’ebé nesesáriu ba kontrusaun Kapela foun ne’e. Ho fiar no determinasaun, ha’u buka apoiu hosi Sekretariadu Missaun Missionárius Verbu Divinu (SVD) iha Portugal no ideia ne’e hetan apoiu diak.
Grasas ba projetu “Mãos Missionárias” husi Missionários do Verbo Divino (SVD) iha Portugal, no generozidade hosi leigu sira, kapela foun ne’e komesa hahu. Maski nune’e, momentu neba sei presija ajuda barak tanba kondisaun komunidade Maukola rasik la too. Ho bensaun hosi Maromak, ami hetan apoiu diak mos hosi doadores husi Portugal, Indonézia no jovem emigrante sira hosi Maucola nebe serbisu iha rai liur hanesan Correia, Australia e Inglatera. Sira hotu nia ajuda, esforsu, no lian ida, maka buat hotu lao ho diak, hamutuk mos ho komisaun lokal ne’ebé lidera husi Sr. Domingos Barreto, Sr. José Barros, Shra. Maria Toro, Caetano, Katekista Sr. Adelino Guterres no jovem intelektuál sira (ou profesór balu iha Maucola).
Jovem emigrante sira nebe lidera husi Joaquim-Akin no Stanislaus (iha Korea), hamutuk ho Abeto (iha Austrália), maka hanesan porta-vozes ba komunikasaun ba maun alin Maucola oan sira nebe serbisu iha liur. Sira hotu ho ulun malirin fo sira nia contribuisaun signifikadu. Desenhu kapela ne’e rasik hetan apoiu, ou oferese hosi arkitéktu Sr. Januário Maia Guterres.
Iha loron 8 Dezembro 2024, kapela foun ne’e inauguradu ona nebe Missa presida ho solenidade husi Amo pároku Padre Sebastião, iha ambiente ne’ebé nakonu ho haksolo no gratidaun. Grasa Maromak nian, buat hotu lao diak.
Hetan mos ajuda imagem padoreira Nossa Senhora Imaculada Conceição no Cristu Crucificadu nebe valiozo diretamente husi SVD Portugal, no iha mos imagem ou estatua Sagrado Coração Jesus (husi Atambua, Indonézia).
Inaugurasaun ne’e hanesan momentu úniku no histórico.
Ramata tiha missa de inagurasaun, komunidade sira haksolok hamutuk hodi hatudu mos bidu ou dansa tradisional kultura nian hanesan Tebe-Tebe.
Ita hotu kontente no haksolok, tanba liuhusi dedikasaun no esforsu bot, ita hotu bele halo mehi bot ida ne’e sai realidade.
Hanesan Maucola oan, ha’u fó gratidaun profundu ba doadores no maluk sira hotu ne’ebé kontribui ba misaun ida ne’e.
Fiar katak, imi hotu nia generozidade, la’ós de’it atu harii edifisiu Kapela ida ne’e, maibé hatudu sinal esperansa no fiar ba komunidade ou sarani Maucola tomak, katak hamutuk ho Maromak ita bele.
Kapela foun ne’e sei sai hanesan fatin lulik ba jerasaun tuir mai, no sai fatin diak, ba ema hotu hasae nia orasaun, fatin ba halao dutrina ba gerasaun foun sira no fatin ba sarani sira hotu. Neduni presija ita hotu nia kuidado no atensaun, atu fatin ne’e sai fatin lulik no uma fukun fiar nian, ba sarani tomak nebe presija.
Parabéns ba maun alin, no doadores sira husi fatin hotu-hotu.
Kapela hamrik ona ho diak. Sinal katak ita hotu nia esforsu iha resultadu. Maromak sei fo-bensa ba imi hotu ne’ebé fó ona imi nia kontribuisaun, desde hahu obra Capela ne’e too ramata ho inagurasaun.
Hamutuk iha fiar ba Maromak no domin atu hadomi malu hodi halao serbisu hamutuk, mehi maski bot, sei sai realidade.
loading="lazy" />