G-NEWS (DILI) – Institutu Defeza Direitu ba Labarik (INDDICA_sigla Portugés), halo ona asesmentu ba komunidade ne’ebé mak afeita hosi eviksaun, liu-liu iha área Bidau no mos Aitarak-laran.
Hosi resultadu asesmentu hatudu katak, familia balun ne’ebé maka laiha fatin atu hela, sira hili fila ba sira nia munisípiu, no hosi parte edukasaun sei la rejeita labarik ida bainhira atu kontinua nia eskola iha munisipiu.
Prezidente Institutu Defeza Direitu ba Labarik (INDDICA_sigla Portugés), Dinorah Granadeiro hateten ba G-News, tersa-feira (30042024) katak, INDDICA prontu kolabora ho inan-aman no mós Ministériu Edukasaun hodi ajuda labarik ida bainhira sira transfere hosi Dili ba Munisípiu. Ba sira ne’ebé maka mantein iha Dili sei la sai problema boot atu nafatin kontinua asesu ba eskola.
“INDDICA nu’udar órgaun supervisiona ho nia kna’ar halo monitoriza, promove no mós advokasia ba direitu labarik, ho nune’e INDDICA halo ona asesmentu ba kondisaun hirak ne’e, no hosi rezultadu asesmentu hatudu katak, labarik sira ne’ebé maka hela iha Dili nafatin hetan fatin toba hosi familia no mós komunidade maske provizoriumente, se karik sosiedade sivil iha duni dadus kona–ba labarik lai ha toba fatin no la asesu ba edukasaun tanba eviksaun ne’e, bele fahe mai INDDICA”. Dinorah Granadeiro esplika.
Iha parte seluk, INDDICA halo ona koordenasaun ho parte relevante hanesan Ministériu Solidariedade Sosiál no Inkluzaun (MSSI) hodi bele hetan apoiu umanitária.
Tuir Dinorah, kona-ba edukasaun sei la sai problema tanba Ministériu Edukasaun garante edukasaun gratuita ba sidadaun hotu-hotu, no eskola públiku mós sei la taka dalan bainhira iha labarik ida atu transfere eskola ba eskola seluk.
Iha artigu 36 hosi Konvensaun Direitu Labarik (KDL) hateten katak, nasaun hotu tenke proteze labarik hosi formas eksploitasaun hotu-hotu, ho nune’e husu ba sidadaun hotu tenke respeitu direitu labarik, no labele uza labarik hanesan alvu hodi atinji sira nia objektivu.
Timor-Leste mos iha ona Lei Protesaun Labarik no joven iha perigu ne’ebé fo protesaun tebes ba labarik sira ne’e, tanba ne’e, husu ba maluk sosiedade sira atu bele respeita tebes Labarik sira nia Direitu tanba ita nia Estadu RDTL rekoñese no fó protesaun as ba direitu Labarik tanba ho ezisténsia Lei Protesaun Labarik no Joven iha perigu bele utiliza hodi kondena ba asaun sira mak la respeita Direitu Labarik.
“Hanesan umana no inan ida, ha’u rasik hakarak husu ba Ina–aman no kuidador labarik sira, atu respeita labarik sira nia direitu, tenke hala’o ita nia dever atu kompleta labarik sira nia direitu hanesan konsagra ona iha Kosntituisaun RDTL no Konvensaun Direitu Labarik”, Prezidente INDDICA Dinorah Granadeiro, esplika ba G-News.
Tuir nia, labarik hotu-hotu iha Timor iha direitu hanesan, tanba ne’e labele utiliza labarik sira atu sustenta ita nia nesesidade familia tanba ne’e laos sira nia respondabilidade.
“Tenke kaer ba lei do trabalhadores artigu 76 ne’ebé maka ko’alia kona–ba protesaun traballador, estudantes, hodi fo espasu ba traballador atu tuir aula ka kursu eskolar. No tuir lei ne’e rasik iha artigu 68 hatete katak, sira ne’ebé mak servisu labele ses hosi idade mínimu ne’ebé maka admite hodi halo servisu (15 anos ba servisu kaman la liu hos horas 4 nia laran no tenke iha tempo ba deskansa ba sira ne’e)”, nia hakotu.
Editór Testu: Amito Qonusere Araújo
