G-NEWS (DILI) – Maker da Silva, joven ida hosi postu Uatucarbau munisípiu Viqueque, asiste de’it sosial mídia liu-liu Youtube kona-ba oinsa atu hadia telefone ne’ebé avária.
Tanba ho esperiênsia edukasaun iha nível Sekundária de’it, Maker da Silva la iha oportunidade atu servisu iha Instituisaun Estadu ka organizasaun naun governamentais, nune’e nia deside hodi hadia telemovel hanesan hadia layar telemóvel, hadia karega fatin, halo installasaun kódigu telemóvel no flashing ka hamoris fila fali telefone ne’ebé labele moris ka lakan.
Ba G-News, segunda-feira (27112023), Maker da Silva hateten, atividade installasaun telefone ne’e hala’o ona durante fulan neen, iha ne’ebé Maker da Silva ho nia kolega na’in 3.
“Ami hala’o ida ne’e fulan neen ona. Ami na’in 3 mak hamutuk. Ami troka layar telefone, karega fatin, install kódigu, halo moris fila-fali telefone ne’ebé labele lakan ona”, Maker informa.
Maker dehan tán fali, atividade ne’e sira hetan rendimentu kada loron hosi dollar 40 to’o 50, maibé depende ema ne’ebé mai hadia telefone.
“Konforme ema mai. Loron ida bele hetan dollar 40 ka dollar 50”, nia haktuir tán.
Maske ho esperiênsia edukasaun iha nível selundária de’it, maibé nia iha vontade boot hodi bele aprende mesak, no la depende ba ema seluk, tanba nia sente katak, esforsu mak solusaun di’ak atu hetan benefísiu durante nia moris, no importante mak labele ba sateia ema.
“Ami halo ida ne’e tanba nesesidade”, Maker haktuir.
Nia dehan, sasan ne’ebé sira hetan hodi halo hadia no instalasaun telemovel, maiória sosa iha ajensia, no instalasaun ne’e depende ba telefone marka saida de’it.
“Sasan sira ne’e ami sosa iha ajensia Audian, depois mak mai troka iha ne’e. Telefone marka saida de’it bele hadia”, Nia esplika.
Ema sira ne’ebé hadia telefone mai ne’e maihosi estudante no servisu na’in sira. Sira nia atendimentu ne’e hosi dáder tuku-8 to’o tuku-5 lorokraik. Tuir Nia, Osan sira ne’ebé hetan hosi atividade negósiu ne’e, sira sei fahe ba malu iha fulan ida laran.
Buat ida ne’ebé úniku mak Maker ho nia kolega na’in rua seluk aprende mak liuhosi sosiá mídia hanesan Youtube, hafoin sira deside hodi hala’o prátika. Rejultadu hosi sira nia servisu instalasaun ne’e, ho rejultadu di’ak.
“Aprende hosi Youtube, no rejultadu hosi hadia telefone ne’e di’ak tanba sasan maihosi rai-liur”, Nia haktuir.
Hadia layar no monta anti gores ho presu dollar 17, install kódigu ho folin dollar 5, no presu dollar 10 ba fleshing ka hamoris fila-fali telefone. Ekipamentus ne’ebé sira uza mak Xafenda no lem.
Maker da Silva, husu ba joven sira atu envolve iha atividade sira ne’ebé bele fó benefísiu ba an rasik, no evita partisipa iha konflitu sira ne’ebé fó impaktu negativu família no sosiedade.
Stand hadia telemóvel ne’e, Maker ho nia kolega na’in rua, hala’o iha Largo de Lecidere, Dili.
Jornalista : Ekipa G-News
Editór Testu : Amito Qonusere Araújo
loading="lazy" />