G-NEWS (INTERNASIONÁL) — Australianu na’in lima ne’ebé kumpri ona tinan 20 resin iha prizaun Indonézia tanba tráfiku heroína, iha loron-domingu (15/12) fila ona ba nasaun kanguru tuir akordu ne’ebé hetan entre governu rua ne’e. Sira na’in lima ne’e halo parte iha kondenadu droga nian ne’ebé koñesidu ho naran “Bali Nine”.
“Bali Nine” hanesan apelidu ba kondenadu australianu na’in neen ne’ebé hetan kaer iha Bali iha tinan 2005 tanba kazu sindikatu droga nian. Sira hetan prova katak, sira lori heroína kilograma 8.2. Dadur na’in neen maka Andrew Chan, Myuran Sukumaran, Si Yi Chen, Michael Czugaj, Renae Lawrance, Tan Duc Thanh Nguyen, Matthew Norman, Scott Rush no Martin Stephens. Andrew no Myuran hetan ezekusaun iha 2015. Renae hetan liberdade iha 2018, enkuantu Tan Duc mate iha 2018 bainhira kumpri hela prizaun perpétua. Agora daudaun hela ema na’in lima, maka Si Yi, Michael, Matthew, Scott no Martin.
Adjuntu Koordenadór ba Imigrasaun no Korresaun iha Ministériu Koordenadór Direitu, Direitus Umanus, Imigrasaun no Korresaun (Kumham-Imipas), I Nyoman Gede Surya Mataram konfirma katak transferénsia detidu ne’e akontese iha Domingu. Filmajen vídeo ne’ebé divulga hosi autoridade indonéziu sira hatudu Ministru Koordenadór Direitu no Direitu Umanu Yusril Ihza Mahendra no Ministru Asuntu Internu australianu Tony Burke asina dokumentu entrega, ne’ebé sai sasin hosi prizioneiru na’in lima ne’e. Tuirmai sira lori ba aviaun ida ne’ebé atu bá Austrália.
Dokumentu sira Transferénsia Prizioneiru nian
Diskusaun sira kona-ba transferénsia kondenadu droga na’in lima hahú ona iha fulan hirak ikus ne’e. Yusril aprezenta projetu koperasaun ida ba transferénsia prizioneiru sira nian – ne’ebé iha pontu rekizitu oioin ne’ebé propoin hosi Governu indonéziu – ba Burke iha Jakarta iha inísiu fulan-Dezembru.
Entre pontu sira ne’e maka governu Australia tenke rekoñese soberania Indonézia no respeita desizaun tribunál Indonézia nian; no katak Indonézia sei transfere prizioneiru sira ba estatutu kondenadu, maibé karik iha futuru hafoin transfere governu Austrália fó kleménsia, amnistia ka remisaun entaun Indonézia sei respeita.
Primeiru-Ministru Anthony Albanese fó benvindu ba informasaun kona-ba sidadaun australianu na’in lima ne’e fila no liuhosi X hato’o agradesimentu ba Prezidente Indonézia, Prabowo Subianto.
Iha komunikadu ketak ida nia hatete katak sira na’in lima fila ba Austrália nu’udar sidadaun livre.
Fontes: : VOA Indonézia (em/hour)
Editór Testu : Amito Qonusere Araújo
loading="lazy" />