G—NEWS (INTERNASIONÁL) — Governu israelita apaga ona mensajen kondolénsia nian ba mate hosi líder katóliku Papa Francisco, ne’ebé publika iha rede sosial X.
Hanesan fó sai hosi Reuters, konta verifikadu @Israel di X nian uluk hasai mensajen ida ne’ebé hatete “Deskansa ho dame, Papa Francisco. Atu nia memória sai bensaun ida.”
Iha post ne’e inklui mós foto ida hosi Papa Francisco ne’ebé vizita Muru Osidentál iha Jeruzalén iha tinan 2014.
Lakleur depois, post ne’e hetan eliminasaun, lahó razaun ofisiál ruma hosi governu Israel. Asaun ne’e mós hamosu atensaun no polémika.
Hanesan fó sai hosi Jerusalem Post, responsável sira hosi Ministériu Negósiu Estranjeiru israelita nian konsidera postu ne’e hanesan “sala ida”.
Iha fulan-novembru liubá, Papa Francisco husu ba komunidade mundiál atu ezamina karik asaun militár sira Israel nian iha Gaza konstitui jenosídiu hasoru povu palestinianu.
Papa mós espresa beibeik nia krítika klaru sira hasoru hahalok Israel nian durante funu ho Hamas dezde tinan 2023.
Iha Janeiru, Papa Francisco konsidera krize umanitária iha Gaza hanesan “moe”.
Papa Francisco mate iha Segunda (21/4) dadeer oras Vaticano ho idade 88.
Wainhira tuir misa Paskoa hamutuk ho sarani Katóliku sira iha Prasa Saun Pedro iha Domingu (20/4), Amu Papa husu mós atu hakotu agresaun brutál Israel nian iha Gaza, nune’e mós funu entre Rúsia no Ukránia.
“Saida maka hamrook ba mate, ba oho, ita asiste loron-loron iha konflitu sira ne’ebé maka akontese iha parte oioin mundu nian! … Desprezu saida maka dalaruma diriji ba ema vulneravel sira, marjinalizadu sira, no migrante sira!” Papa Francisco sita hosi CNN.
Amu-Papa reza mós ba “dame ida ne’ebé justu no dura” iha Ukránia, no kondena sofrimentu hosi povu iha Gaza.
loading="lazy" />