G-NEWS (COVALIMA) – Veteranu Balasius Bere “Bola Cassa” lakon vida tan Lafaek tata iha Lagoa Hasan Foun Salele, Tilomar Sexta-Feira (15092023), iha tuku walu dáder, bainhira saihosi uma atu ba kail ikan.
Saudoso nia oan mane bo’ot Carlos Agustinho dos Santos konta katak, nia aman mate iha sexta-feira dáder bainhira ba kail ikan iha lagoa Hasan Foun iha fronteira entre Tilomar (Covalima) ho Malaka (Indonézia). Matebian sai hosi uma la fó hatene ba família kuandu ba kail ikan iha Lagoa refere.
“Ha’u nia aman nia mate, ne’e hahú iha loron Sexta, sai hosi uma iha dader tuku 8:30, tun ba iha kolan atu kail ne’ebé besik iha fronteira ho Indonezia, maibe ha’u rasik hanesan oan mane bo’ot ho ha’u nia ama la hatene tanba matebian sai husi uma la fo hatene ami” informa Matebian nia oan Mane Bo’ot Carlos Agustinho dos Santos hafoin hetan nia aman nia isin sorin, Sábadu (16092023).
“Iha tuku 7 atu tama ba tuku 8 kalan, Saudozu Bola Cassa seidauk fila uma, ho ida mak, família sira ba buka, no hetan duni matebian nia pasta, xinelus, sabit inklui kail iha kolam ninin, maibé la konsege hetan matebian nia isin lolon. Familia kontinua buka to’o Sabado dadersan maka foin hetan fali matebian nia parte sisin lolon balun “ten kabun sorin” tanba isin lolon tomak Lafaek han hotu ona”, Carlos tenik.
Ho akontesimentu ne’e, autoridade Protesaun Sivil Munisípiu Covalima, ekipa Bombeiros, hamutuk ho komunidade Salele ho família buka matebian Bola Cassa nia mate isin iha Lagoa Hasan Foun, konsege hetan matebian nia isin lolon maibé la kompletu, no hetan de’it matebian nia ten rohan ho nia roupa, tanba isin lolon Lafaek han hotu ona.
“Ohin haleu oras tuku 8 hamutuk ho ekipa kompostu husi Komandante Eskuadra Tilomar ho membru sira, komandante Bombeiros ho nia membru, autoridade protesaun civil hamutuk ho familia no autoridade lokal xefe aldeia no xefe suku ba iha fatin akontesimentu, halo buska, fahe ekipa, konsege hetan mate isin nia rohan balu konsege foti lori transporta mai kedas iha nia rezidénsia Salele”, informa Komandante Autoridade Protesaun Civil Munisipiu Covalima, Flavio dos Santos Mendes,
Saudozo Balasius Bere “Bola Cassa” moris iha loron 20 fulan Juñu tinan 1957, no matebian mate husik hela oan na’in 4 kompostu husi feto na’in-3 no mane 1.
Hafoin hetan matebian nia isin rohan, ekipa konjunta transporta mate-isin ba nia rezidénsia iha Suku Maudemo, Postu Administrativu Tilomar Munisípiu Covalima, hodi hein prosesu funeral.
Jornalista : RCCT Suai
Editór Testu : Amito Qonusere Araújo
loading="lazy" />