G-NEWS (PAPUA NOVA GUINÉ) — Iha loron 7 fulan-Setembru tinan 2024, Santu Padre Francisco, iha nia diskursu ba bispu no relijiozu sira iha Papua Nova Guiné no Illa Salomaun, fó hanoin ba sira kona-ba importánsia atu to’o ba sira ne’ebé iha marjen sosiedade nian.
Papa Francisco subliña nesesidade atu habelar esperansa no apoiu, maski iha dezafiu no dezentendimentu sira ne’ebé bele hasoru iha prosesu ne’e. Mensajen ne’e subliña Kreda nia kompromisu atu fó atensaun espesiál ba grupu marjinalizadu sira no ultrapasa obstákulu sira ne’ebé bele difikulta sira-nia esforsu atu habelar domin no justisa.
Papa Francisco hala’o vizita apostólika iha Papua Nova Guiné (PNG) iha loron 6 to’o 9 fulan-setembru, nu’udar parte ida hosi ninia viajen luan ba Ázia no Áfrika. Vizita ne’e ho objetivu atu hametin relasaun Igreja Katólika ho komunidade lokál no autoridade relijioza sira iha PNG.
Iha kontestu ninia viajen istóriku ba Ázia no Áfrika, vizita ida-ne’e subliña Amu-Papa nia kompromisu atu hasoru no fó apoiu ba komunidade sira ne’ebé karik la hetan atendimentu. Vizita ida ne’e hein atu fó enkorajamentu espirituál no fó atensaun ba asuntu lokál ne’ebé PNG hasoru, hanesan dezafiu sosiál no ekonómiku.
Iha enkontru sira ho bispu no relijiozu sira, Amu-Papa Francisco rona didi’ak sasin hosi indivíduu na’in haat ne’ebé iha orijen oioin iha Kreda: amlulik ida, madre ida, katekista ida, no madre mesak ida.
Momentu ida-ne’e halo parte iha Sínodu Bispu sira-nian kona-ba Sinodalidade, iha-ne’ebé sasin ida-idak hakarak fó hanoin kle’an kona-ba aplikasaun prinsípiu sinodalidade nian iha Kreda nia moris loroloron. Hodi rona sira-nia esperiénsia no hanoin, Amu-Papa Francisco buka atu komprende di’ak liután dezafiu no realidade ne’ebé grupu oioin iha Kreda laran hasoru.
Papa Francisco bolu santuáriu ne’ebé hala’o eventu ne’e nu’udar pontu referénsia importante ba igreja lokál. Nia subliña katak fatin ne’e harii nu’udar hahalok fiar nian, reflete dedikasaun no esforsu sira ne’ebé halo liuhosi tinan barak servisu no evanjelizasaun nian.
Ho liafuan seluk, fatin santu ne’e la’ós de’it lokalizasaun fíziku ida, maibé mós símbolu jornada fiar nian no komunidade Igreja nia kompromisu atu habelar hanorin sarani sira.
Papa Francisco subliña mós nesesidade atu fó prioridade ba grupu sira ne’ebé marjinalizadu liu iha sosiedade, liuliu iha nasaun ne’ebé populasaun liu porsentu haat-nulu moris iha liña pobreza nia okos no hasoru nível aas violénsia no krime nian. Iha ninia diskursu, Amu-Papa subliña katak tenke fó atensaun no apoiu espesiál ba sira ne’ebé vulneravel liu no presiza, nu’udar parte husi responsabilidade Kreda nian atu luta ba justisa no bem-estar sosiál.
Molok hasoru malu ho bispu sira no relijiozu sira, Amu-Papa Francisco hala’o vizita ba labarik sira iha jináziu ne’ebé nakonu iha Eskola Sekundária Téknika Caritas. Iha ne’ebá, labarik sira simu nia ho dansa no kanta tradisionál ne’ebé entuziazmu.
Momentu ida-ne’e la’ós de’it hatudu labarik sira-nia ksolok no entuziazmu, maibé reflete mós Amu-Papa nia besik no preokupasaun ba jerasaun foun no komunidade lokál sira. Vizita ida-ne’e hatudu Papa Francisco nia kompromisu atu hakuak no fó apoiu ba nivel hotu-hotu sosiedade nian, inklui sira ne’ebé desfavoresidu liu.
Papua Nova Guiné, hanesan nasaun ida iha oseánia, hetan independénsia hosi Austrália iha loron 16 fulan-Setembru tinan 1975. Molok independénsia. rejiaun ida-ne’e hanesan kolónia no mandatu hosi poténsia koloniál oioin inklui Olanda, Alemaña no Reinu-Únidu.
Iha sékulu 19 nia rohan, Papua Nova Guiné ne’e fahe entre Alemaña no Inglaterra. Hafoin funu mundiál, Papua Nova Guiné sai hanesan mandatu liga nasaun sira nian iha administrasaun Austrália nia okos .
Iha tinan 1949, Papua no Guiné foun hamutuk iha administrasaun Austrália nia okos. Ba independénsia, mosu dudu maka’as ba soberania, ne’ebé hetan apoiu hosi grupu polítiku oioi.
Prosesu ba independénsia hala’o ho dame liuhosi negosiasaun entre líder lokál sira no governu austrália. Hafoin hetan independénsia, Papua Nova Guiné sai hanesan Repúblika Parlamentár no hasoru dezafiu oioin kona-ba dezenvolvimentu no integrasaun sosiál.
Editór Testu : Amito Qonusere Araújo
loading="lazy" />