G-NEWS (DILI) – Fulan setembru tinan 1999, fulan ida ne’ebé povu Timor Leste tenke simu konsekuênsia todan ninian, tanba hafoin Sekretáriu-Jerál ONU Koffi Annan, anúnsia rejultadu referendu, hatudu timoroan sira ne’ebé pró-Independênsia rejeita autónomia ho votu 344 580 ka 78,50%, no pró-Autónomia ho votu 94 388 ka 21,50% ne’ebé hakarak hamutuk ho Indonézia.
Bainhira rejultadu ne’e públika sai iha Kuartél-Jenerál ONU nian iha Nova Iorke, milísia sira pró-integrasaun ho armada, ne’ebé hetan apoia hosi autoridade seguransa Indonézia, halo asaun assasinatu hasoru pró-independênsia sira, oho, no obriga atu refujia ba Timor Osidentál Indonézia. Laos ida ne’e de’it, maibé milísia sira mós oho timoroan hotu iha territóriu laran tomak, ne’ebé hamosu masakre nakukun, iha ne’ebé populasaun tenke lakon vida hosi rohan ukun-rasik-án nian. Família sira barak triste ho asaun milísia sira, tanba kontra direitu umanu, no sira lakohi atu simu realidade ba ukun-rasik-án.
Masakre barak ne’ebé akontese iha tinan 1999 hanesan Masakre Negro Igreja Suai, iha ne’ebé masakre ne’e, milísia sira tiru mate labarik, joven sira, ferik-eh katuas, inklui Bibi atan na’in 3 iha Igreja laran. Laos ida ne’e de’it, akontesimentu ida tán Masakre iha Igreja Likisa, Masakre Tumin Oekusi. Asaun sadizmu ne’e akontese mós ba joven no Madre sira iha Laútem, masakre Polres Maliana, rezidénsia família Carascalão nian no fatin seluk tán.
Iha territóriu nasionál, povu barak halai ba ai-laran atu salva vída, balun tenke subar iha rezidénsia autoridade relijiozu ninian, balun tenke halai ba foho, no balun fali la biban atu subar án tanba milísia sira ninia rede okupa fatin hotu-hotu, hodi deskobre pró-Independênsia sira nia movimentu, no tenke tiru mate. Alende halo asaun asssinatu sira ne’e, milísia sira mós hala’o asaun des-umanu tanba milísia sira halo violasaun seksual ba feto timor sira, tanba de’it sira nia ina-aman ka família luta ba Indepedênsia. Nune’e mós sira hasai lia-fuan ne’ebé la merese atu ko’alia sai katak, “Timor mak ukun-án, manu nehan moris fali, no balun dehan Timor ukun-án han tee de’it, no Timor mak ukun-án, sei sapurata”.
Maibé ida ne’e mak situasaun, tinan-24 liu ba, tina ne’ebé nakonu ho triste, tanba tuir loloos família barak tenke goza sira nia sofrimentu durante luta naruk nian, maibé la goza tanba sai vítima ka lakon vida iha tinan rohan atu hetan naroman ba ukun-rasik-án. Timoroan barak konta hotu katak, milísia sira nia atuasaun ne’e kontra direitu umanu, ho apoiu tomak hosi forsa Indonézia.
Tinan 1999, liu-liu fulan Setembru, fulan ida ne’ebé ran fakar, sulin tanba de’it timoroan sira nia hakilar, baku hirus matan, hodi defende rai-Lafaek, rai-Timor, atu labele monu ba inimigu nia liman. Rejultadu hosi hirak ne’e, tenke selu ho ran, pinta ho ran, ikus mai Timor Leste tenke restaura hikas ninia ukun-rasik-án iha loron 20 fulan maiu tinan 2002.
Ohin loron matanbeen família nian balun seidauk maran tan de’it ninia oan, bei-oan, maun-alin sira lakon loos de’it, la iha rate, to’o agora la fila mai uma bainhira sai ba liur hodi defende liman-ran sira nian hosi inimigu Indonézia nian.
Asaun sira ne’ebé pró-autonómia sira halo hasoru pró-independênsia sira, nunka lakon iha pájina ukun-rasik-án nian, maibé hirak ne’e hotu hadame malu ona liuhosi Rekonsiliasaun. Rekonsiliasaun ne’ebé akontese, halo sidadaun sira ne’ebé lakon ema, lakon sasan tan de’it pró-autonómia sira la simu rejultadu hosi eleisaun ba referendu ninian, halo asaun des-umanu hanesan oho ema, kontra direiru umanu liu-liu Liberdade espresaun, komete violasaun seksual, no violasaun seluk tán.
G-News rekolla informasaun lubuk ida haktuir, rekonsiliasaun ne’e laos solusaun atu kura ona kanek no fitar ne’ebé hela iha ami nia laran no isin. Jerasaun milisia sira ne’ebé agora dadauk fila-fali mai iha rai-laran, diak liu hakmatek no lalika halo provokasaun, tanba vítima sira barak mak sei sente situasaun moruk ne’ebé milísia sira halo ba sira. Vítima sira husu ba jerasaun sira, atu lalika aproveita rekonsiliasaun atu halo asaun sira ne’ebé konsideradu nu’udar krime ka provokasaun.
Maske nune’e, nu’udar timoroan respeita nafatin desizaun Estadu nian kona-ba rekonsiliasaun, nune’e rai bele hakmatek, nune’e lider sir abele konsentra de’it ba Dezenvolvimentu nasionál, atu hadia povu nia moris.
Povu Timor Leste sira nia esperansa mak, tenke hatur dignidade povu maubere nian liuhosi dezenvolvimentu hanesan dada eletrisidade to’o iha povu sira iha área remota, bee moos, Estrada, edukasuan ne’ebé di’ak, tratamentu saúde ne’ebé saudavel. Ida ne’e mak meiu importante atu garante ukun-rasik-án ne’e, ho situasaun sira ne’ebé povu hakat liu.
Redasaun G-News
loading="lazy" />