G-NEWS (PAPUA NEW GUINE) — Iha Papua Nova Guiné nia lalehan ne’ebé luan, klamar Katóliku rihun ba rihun halibur ho ksolok, prontu atu simu momentu santu ida ne’ebé nakonu ho solenidade no ksolok.
Missa aas ne’e lidera husi Papa Francisco, Líder Supremu Igreja Katólika nian, ne’ebé ho laran-maus hato’o bensaun no orientasaun espirituál ba nia povu. Eventu magnífiku ida-ne’e akontese iha Estádiu John Guise, sasin silensiu ida ba grandeza selebrasaun nian, ho nia medida ne’ebé bele akomoda devotu entuziazmu rihun ba rihun.
Iha estádiu laran, atmosfera nakonu ho gratidaun no ksolok, hanesan sikun hotu-hotu rezoan ho orasaun no esperansa. Papa Francisco tama iha estádiu iha tuku 07:35, simu ho dansa tradisionál animadu hosi ema lokál sira ho hatais tradisionál ne’ebé nabilan.
Estádiu John Guise nakonu ho tasi ida hosi katóliku fiel sira, akompaña pasu ida-idak hosi misa to’o rohan. Ema sira hosi nasaun viziñu sira, hanesan Illa Salomão, mós marka prezensa hodi anima atmosfera solene ida-ne’e.
Iha ninia omilia, Amu-Papa Francisco konvida ho laran-di’ak fuan hotu-hotu atu hakbesik família no ema ne’ebé ita hadomi ba fiar sinseru iha Maromak. Nia fó hanoin katak ita-nia kna’ar mak to’o ba sira ne’ebé marjinalizadu, lori sira atu sente Maromak nia besik no domin kle’an.
Ho esperansa nakonu, Santu Padre konvida ema ida-idak atu sai ponte ba sira ne’ebé seidauk sente tomak kbi’it fiar nian, atu sira bele sente Maromak nia prezensa iha segundu ida-idak moris loroloron nian.
Liu pursentu neen-nulu hosi Papua Nova Guiné nia ema millaun 12 identifika nu’udar sarani, maski sira nia fiar koeziste ho fiar lokál oioin, kostume no rituál sira.
Hafoin lidera misa signifikativu iha Estádiu John Guise, Santu Padre kontinua nia viajen santu ba provínsia Vanimo iha noroeste Papua Nova Guiné, iha ne’ebé nia sei hasoru sarani sira Dioseze Vanimo nian. Durante nia vizita, Amu-Papa sei selebra Santa Misa iha sentru misa oioin, ne’ebé sai hanesan pontu fokál espirituál katóliku sira iha rejiaun ne’e.
Iha ninia viajen apostóliku ba Ázia no Oseánia, Papa Francisco vizita de’it sidade rua iha Papua Nova Guiné: Port Moresby no Vanimo, hodi halo ninia vizita sai viajen signifikativu no bensaun ida.
Text Editor: Amito Qonusere Araújo
loading="lazy" />