G-NEWS (WEST PALM BEACH, FLORIDA) — Prezidente eleitu Estadus Unidus, Donald Trump, sábadu (30/11), ameasa atu impoin tarifa pursentu 100 ba grupu nasaun neen bainhira sira foti pasu ne’ebé nia konsidera bele hafraku dolar amerikanu.
Trump halo nia ameasa ba nasaun membru sira aliansa BRICS nian, maka Brazil, Rúsia, Índia, Xina, Áfrika-Súl, no mós membru foun sira hanesan Ejiptu, Etiópia, Iraun no Emiradus Árabes Unidus.
Türkiye, Azerbaijaun no Malázia aplika ona atu tama iha aliansa, enkuantu nasaun sira seluk mós hatudu interese atu sai membru.
Dólar Estadus Unidus nian sai nafatin moeda prinsipál iha komérsiu globál no konsege mantein nia dominasaun maski hasoru dezafiu oioin iha pasadu. Maibé, membru aliansa sira no nasaun sira seluk ne’ebé sei dezenvolve hela hatete katak sira baruk ona ho Amérika nia dominasaun iha sistema finanseiru mundiál.
Iha komunikadu ne’ebé publika iha plataforma Truth Social, Trump afirma katak, “Ami ezije garantia hosi nasaun sira ne’e katak sira sei la kria Moeda BRICS foun ka apoia moeda seluk hodi troka Dólar Estadus Unidus ne’ebé maka’as. Se lae, sira sei hasoru tarifa pursentu 100 no tenke preparadu atu lakon asesu ba merkadu ekonómiku estraordináriu Estadus Unidus nian.”
Iha simeira BRICS nian iha fulan-Outubru, Prezidente rusu Vladimir Putin akuza Estadus Unidus “arma” dolar no konsidera medida ne’e hanesan “sala boot ida”.
“La’ós ami maka rekuza atu uza dolar”, Putin hatete iha momentu ne’ebá. “Maibé se sira la husik ami serbisu, saida maka ami bele halo? Ami obrigadu atu buka alternativa sira.”
Rúsia dudu ativamente ba kriasaun sistema pagamentu foun ida hanesan alternativa ida ba rede globál mensajen bankáriu SWIFT, hodi permiti ba Moskovu evita sansaun osidentál sira no kontinua halo komérsiu ho nia parseiru internasionál sira.
Trump afirma katak BRICS “laiha fatin atu troka dolar Estadus Unidus nian iha komérsiu globál, no nasaun ruma ne’ebé tenta halo ida-ne’e “sei tenke dehan adeus ba Amérika”.
Font: VOA Indonesia [ah/ft]
loading="lazy" />