G—NEWS (DILI) — Restus mortais prelados na’in tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, sei to’o aban, Tersa-feira, 1 Setembru 2026, iha Aeroportu Internasional Nicolau Lobato, Dili, iha tuku 13:30 OTL, ho aviaun Aero Dili.
Ministru Administrasaun Estatal, Tomás do Rosário Cabral, informa katak restus mortais prelados na’in tolu ne’ebé mai hosi Évora, Portugal, to’o ona iha Bali, Indonézia, iha loron Sábadu, 29 fulan-Agostu tinan 2026, no sei kontinua viajen mai Timor-Leste aban.
Ministru hateten Governu Timor-Leste hamutuk ho Igreja Katólika forma komisaun ekipa konjunta ida atu simu restus mortais prelados na’in-tolu iha aeroportu.
Hafoin simu iha Aeroportu Internasional Nicolau Lobato, restus mortais sira sei entrega kedas ba parte Igreja tuir termus Igreja nian. Depois, sei hala’o transladasaun ba Altar Santo Tasitolu, no entrega kedas ba Defeza no Seguransa atu responsabiliza prosesu seguransa.
“Governu ho Igreja iha komisaun ekipa konjunta ida atu simu restus mortais prelados na’in-tolu ne’ebé mai hosi Portugal. Sira to’o ona iha Bali, Indonézia, iha loron Sábadu, 29 Agostu, no sei to’o iha Aeroportu Internasional Nicolau Lobato iha Tersa-feira, 1 fulan-Setembru tinan 2026, tuku 13:30 OTL, ho aviaun Aero Dili,” informa Ministru Tomás do Rosário Cabral Liu hosi Konferensia imprensa iha Altar Santo Tasitolu, Segunda-feira, loron 31 fulan-Agostu 2026.
Arsebispu Metropolitana Dili, Dom Virgílio Cardeal do Carmo da Silva, hateten katak Igreja Katólika Timor-Leste haruka ona konvite ba Bispu hosi nasaun viziñu, inklui Indonézia no Austrália, atu mai partisipa iha serimónia no simu prelados bispu na’in tolu.
“Ita fó mós konvite ba bispu nasaun viziñu sira hanesan Indonézia no Austrália atu mai partisipa, maibé seidauk iha resposta hotu. Bispu Darwin mak fixu ona atu mai partisipa,” afirma Dom Virgílio.
Relasiona ho serimónia transladasaun restus mortais prelados na’in-tolu, Ministru Interior, Francisco da Costa Guterres, hateten katak Polísia Munisipál Dili, liu hosi unidade Tránzitu no unidade espesial, sei organiza movimentu tráfegu iha kapitál Dili.
Ministru hateten númeru efetivu polísia ne’ebé sei mobiliza sei la boot, maibé sei fó prioridade ba organizasaun tráfegu atu evita konjesionamentu no problema movimentu iha estrada.
“Ita sei la hatun barak, maibé ita hatun de’it Polísia Munisipál Dili liu hosi Tránzitu no Polísia Espesiál atu organiza movimentu, nune’e labele iha problema tráfegu tun-sae,” hateten Ministru Interior.
Entretantu, Governu Timor-Leste aprova toleránsia pontu relasiona ho transladasaun restus mortais preladu katóliku sira ne’ebé hala’o servisu pastorál iha Timor-Leste.Desizaun ne’e bazeia ba Despaxu Primeiru-Ministru n.º12/PM/VIII/2026.
Pontu prinsipál sira:
- 1 Setembru 2026: toleránsia pontu durante loron tomak.
- 10 Setembru 2026: toleránsia pontu hahu hosi tuku 12:00 meiudia, ba parte loraik.
Governu no Igreja agora prepara ona prosesu simu, transladasaun no serimónia ba restus mortais prelados na’in tolu, ne’ebé konsideradu importante iha istória Igreja no Timor-Leste.
Jornalista: Martinho Belo
loading="lazy" />